¹ Polo tanto, teñamos temor, non sexa que aínda que permanecendo na promesa de entrar no seu acougo, algún de vós pareza non o ter acadado. ² Porque a nós anuncióusenos a boa nova, así como tamén a eles; mais a palabra que eles escoitaron non lles foi de proveito por non ir acompañada pola fe dos que a escoitaron. ³ Pero os que crimos, entramos nese acougo, tal como El dixo: "Como xurei na miña ira: non entrarán no meu acougo", aínda que as súas obras estaban rematadas dende a fundación do mundo. ⁴ Porque así dixo nalgún lugar no que respecta ao sétimo día: "E Deus descansou no sétimo día de tódalas súas obras"; ⁵ e outra vez nesta pasaxe: "Non entrarán no meu acougo". ⁶ Polo tanto, xa que aínda falta que algúns entren nel, e aqueles aos que se lles anunciou antes a boa nova e non entraron por mor da súa desobediencia, ⁷ Deus determina de novo un día: "hoxe". Dicindo despois de moito tempo, por medio de David, como denantes se dixera: "Se escoitades hoxe a súa voz, non endurezades o voso corazón". ⁸ Porque se Xosué lles dera acougo, Deus falaría doutro día despois deste. ⁹ Polo tanto, queda un acougo sagrado para o pobo de Deus. ¹⁰ Xa que o que entrou no seu acougo, tamén el mesmo descansou das súas obras, como Deus descansou das súas. ¹¹ Polo tanto, esforcémonos por entrar no acougo, para que ninguén caia no mesmo exemplo de desobediencia. ¹² Porque a palabra de Deus é viva e eficaz, e máis cortante que calquera espada de dobre fío que penetra ata a división da alma e do espírito, das articulacións e da medula, e é poderosa para discernir os pensamentos e as intencións do corazón. ¹³ E diante da súa presenza non hai cousa creada que se lle esconda, senón que tódalas cousas están ao descuberto e espidas ante os ollos daquel a quen temos que dar contas. ¹⁴ Pois tendo un gran Sumo Sacerdote que trascendeu os ceos, Xesús, o Fillo de Deus, manteñámonos na nosa fe. ¹⁵ Porque non temos un Sumo Sacerdote que non poida compadecerse das nosas debilidades, senón un que foi tentado en todo coma nós, mais sen pecado. ¹⁶ Polo tanto, acheguémonos ao trono da graza con confianza para recibir misericordia e acadar graza para a axuda oportuna.