¹ "Soio te angelo tela lotu oilo e Sadis kekesi mae: 'La merera tela la tahalo ale sautola la kalulu ivitu te Deo me la matatabu ivitu. "Eau rovi la rova eme igotia. Eme igo bibia mae eme mauliuli, alamoli eme peo. ² Hagolo soata me vivagari larova piligi alamoli agagavi ge peo, telava Eau ka poga la vulovulomu sibitala viruru oio la mata le Deo. ³ Gabutala, mae, larova eme sautolatia me loloa. Tilimulia, me vulo rivu. Alamoli mae eme kama hagolo soata, Eau ge gomai mae la tahalo la pakalikalila, eme kama ge rovia erese la imamala Eau ge gomai tavume. ⁴ Alamoli eme tahola isahari la isasa oio e Sadis ale kama igo mumugu la kilalai tegite, me egite tuga vikapopo eau, kakai la paga kakea, lava egite uru pasi. ⁵ La tahalo ale toatalu la tikukumula ge kai oio la kilalai ale kakea, Eau kage savulu taro la isala loio la Buku la Mauli, me Eau ge veipala la isala lolagu te Tamagu, me lolagu tegite angelo tetala. ⁶ La tahalo moli ale tahola la gavusa, lolo larova la Kalulu veveia soio tela lotulotu. ⁷ Soio tela angelo oio la lotu oio e Filadelfia kekesi mae: 'La merera tela la tahalo ale maroka me ale sesele--- eia sautola la ki te Devit, eia kokopea me isa ka kakapia eia kokopea me isa ka kakapia. ⁸ "Eau rovi larova eme igotia. Hiloa, Eau tau lolagu taume la mata ale kope ale isa ka koramuli ge kapia. Eau rovia mae eme tahola bakisi la vagarigarila, loiovola eme roromuli la merera taku me eme kama tautaro la isagu. ⁹ Hiloa! Egite ale loio la luma lotu te Satan veia egite e Juda alamoli ouka, alamoli egite la valua la visigola---Eau ge tutu egite ge gomai me egite tototulu otalo lolagu la vahamu, me egite rovia mae Eau masaga eme. ¹⁰ Mae moli eme sautola la tuturi mulila taku tela tiamadidila ge totora, Eau ge totoro tai taume loio la tovolaila ale ge gomai la maututula, ge tovolalai egite ale momou otalo la magasa. ¹¹ Hagagavi Eau ge gomai. Sautola larova eme taholatia souka isa ge abi la craon taume. ¹² La tahalo ale toa taku la tukukumula Eau ge magiria mae la tori oilo la luma lotu te Deo taku. Eia kama lou ge gogala oiovola, me Eau ge kekesi oio tetala la isa le Deo taku, la isa la siti te Deo taku (e Jerusalem, ale loata e heven loio te Deo), me la isagu ale halaba. ¹³ La tahalo moli ale tahola la gavusa, ge lolo larova la Kalulu vigagia soio la lotulotu. "' ¹⁴ Soio te angelo tela lotu oilo e Laodesia kekesi mae: 'La merera te Amen, ale koramuli me witnes sesele, eia mamugamuga loata la papaga e Deo wokua. ¹⁵ "Eau rovi la rova eme igotia, kama tegira isasa maigi o tivura. Eau gubutala mulia mae eme ge tegira isasa maigi o tivura! ¹⁶ Ala, telava eme kabili moli---kama tivura o maigi---Eau hagagaviti ge kalalua taro eme sogala loio la haregu. ¹⁷ Mae eme veia, 'Eau tahola usu la vati, Eau tahola usuti la papaga, me Eau kama masaga lou isa la paga.' Alamoli eme ka rovia mae eme kama kokora viruru, pou sekela, la savelevelela, matakea me kalakalaka. ¹⁸ Lolo la vatetelila taku: Loto la gol ale la havi tulu veitia ala eme ge tahola la vuliti, me la kilalai ale kakea taritigi sesele ala eme ge kairobome me eme kama ge vailo la maela la kalakalaka taume, me igo tigi soio la habiri la matamu ala eme ge mata. ¹⁹ Eau tovolalai egite tomi ale Eau masagea, me Eau vimari egite la vulovulo ale egite ge mauli. Loio volale, tau tomi la tiamu me vulo rivu. ²⁰ Hiloa, Eau magirigiri oio la mata me Eau tutu la mata. Mae ere isasa lolo la golagu me kope la mata, Eau ge goilo la luma tetala me Eau ge hali vikapopo le eia, me eia ge vikapopo le eau. ²¹ La tahalo ale toatalu la tukukumula Eau ge abiala la muli ge pou vikapopo eau oio la pulolou taku, mae moli Eau toatalu tukukumula me pou vikapopo e Tete oio la pulolou tetala. ²² La tahalo moli ale tahola la gavusa, ge lolo lava la Kalulu veveia soio la lotulotu."""