¹ Soio te angelo oio la luma la oio Efeses kekesi mae: 'La merera te la tahalo ale sautola la matatabu ivitu loio la limala e gata me ale tatuga kabili tela vaha la lamu ale ivitu, ² Eau rovi la tulugalugamu, la tivuravura la igogolu, me la tia madidila ale totora, me eme kama ge tao pepe soio tegite ale igigo la iruru, alamoli eme tovolalai egite ale veia egite aposel alamoli ouka, eme poga egite la visigologolola. ³ Eme sautola la vagari la tiamadidila me eme kaka tavu la tiagu, me eme kama bare. ⁴ Alamoli Eau mukupile sesele eme mae eme tapataroti la masasagala ale mamuga. ⁵ Gabutala muli loio la baha ale eme boru. Vulo rivu me eme tilimuli la rova eme igotia mamuga. Mae eme kage vulo, Eau ge gomai taume me Eau ge abitaro le eme la vaha la lamu loio la mulila. ⁶ Alamoli eme tahola aleie, Eme kama masaga larova egite Nikolaten igo tia, larova Eau ka masagea. ⁷ Korale egite moli ale tahola la gavusa, ge lolo larova la Kalulu veveia soio la luma la lotu tomi. Soio tegite ale tuga loata la tikukumula Eau ge abiala la rait ge ali loio la obu la mauli, ale oio la mulou sagegela te Deo. ⁸ "Soio te angelo tela luma la lotu oio e Smaina kekesi mae, 'La merera te la tahalo ale la silokoloko me la kaluvuluvula, eia peo me eia hiliti rivu lou: ⁹ "Eau rovi la tikukumula taume me la savelevelela taume, alamoli eme tahola la vuliti. Eau rovi egite ale sibitala la Isabarala egite ale veia egite loio e Jius, alamoli egite ouka. Egite la valalua la lotu te Satan. ¹⁰ Umala tataga mae eme goio la tikukumula. Hiloa! E devel agagavi ge laba isahari tamuto soio la baha la totorobola ge tovolalai eme, me eme ge puo la tikukumula tela logo isavulu. Magiri vagari kara la pileleo, me Eau ge abiamu la craon la mauli. ¹¹ La tahalo moli ale tahola la gavusa, ge lolo larova la kalulu veveia soio tegite la lotulotu. La tahalo moli ale toatalu la tukukumula kage peo tela vailua la pileleo. ¹² "Soio te angelo tela lotu oio e Pegamum kekesi mae: 'La merera tela tahalo ale sautola la viso ale la gilisula ilua kara: ¹³ "Eau rovi erese la baha eme popou, oio tela baha la tron te Satan. Soloio eme sautola vagari la isagu. Eau rovia mae eme kama vasigolo la tautaulailo taume oio tegaku, kara la logologo te Antipas la witnes tegaku, la tahalo ale tautaulailo, ale peoti kabili tamuto, oio la baha e Satan popou. ¹⁴ Alamoli Eau tahola isahari lapapaga soio taume: Egite isahari oiole ale sautola vagari la vimari te Balam, ale vimari e Balak ge laba tia vagarila kabili tegite latatu le Irael me egite ge ali la ilali ale sakrifis soio tela puigolo me egite ge igo barabara. ¹⁵ Visauru tai, eme tai tahola isahari egite ale sautola vagari la vimari te Nikolatans. ¹⁶ Vulo rivu, ala! Mae ouka, Eau ge gomai hari soio taume, me Eau ge soko la vukokuela soio tegite vikapopo la viso oilo la haregu. ¹⁷ La tahalo moli ale tahola la gavusa, ge lolo lava la Kalulu veveia soio tela lotulotu. Soio tela tahalo ale toatalu la tikukumula, Eau ge abi isahari la mana ale tabuli kokovu, me Eau ge abi la vati kakea vikapopo la isa alaba kekesi oio la vati, la isa ale isa ka rovia alamoli la tahalo moli ge abia.'" ¹⁸ Soio te angelo tela lotu oio e Tietira kekesi mae: 'Ale la merera te Latu le Deo, ale la matala mae la kalamea la havi me la vahala mae la brons ale mememe: ¹⁹ "Eau rovi larova eme igotia: la masasagala taume me la igogolula me la tia madidila taume ale totora. Eau rovia mae la rova eme igotia igoe a uru sesele tela rova eme igotia mamuga ²⁰ Alamoli Eau tahola la paga ale magiri robome: Eme masaga tavu moli e Jesebel, ale toi eia lou e profetes. Tela vimari tetala eia vasigolo egite ale igogolu taku ge igo la vulovulo ale ka tartigi me me egite ge ali la ilali vabila soio tegite la puigolo. ²¹ Eau abiala la imamala ge vulo rivu, alamoli eia kama gabutatala ge vulo rivu loio la vulovulo ale kama kokora. ²² Mamata! Eau ge laba eia soio la muli la ilea me soio tegite ale igigo la vulovulo ale kama kokora vikapopo eia soio la tuku uru, mai moli egite kama ge vulo rivu loio la vulovulola. ²³ Eau ge pilipeo e latatula, me egite la lotu lotu ge rovia mae Eau la tahalo ale hililo la gabutatala me la tia. Eau ge abia muto isasa la igogolu koramuli amuto. ²⁴ Alamoli tamuto tomi oio e Taitira, soio tegite tomi ale ka sautola la vimari me egite kama rovi larova egite isahari totoila la momo le Satan-- soio taume Eau veia, 'Eau kama tau la tukukumula soio taume.' ²⁵ Oio la vuhula isahari, eme ge sautola vagari kara Eau ge beu. ²⁶ La tahalo ale toatalu la tukukumula me la tahalo ale igigo lava Eau igotia kara la tapapasila, la tahalo alele Eau ge abiala la vagarigarila loata tegite la maututula. ²⁷ 'Eia ge muga egite vikapopo la ion rod, mae la kuvo la ja eia ge igo mapolea bisisi.' ²⁸ Mae moli Eau abitia loio te Tamagu, Eau ge abiala la matatabu la kavukoki. ²⁹ Kora la tahalo moli ale tahola la gavusa, eia ge lolo lava la Kalulu veveia soio tegite la lotulotu."'