¹ Eta waek natamtame, iau sevaio nakim iami ngata me iau nakim ngata so nalei iami. Iami eio natini gelgel kiau, me nakolnga iau natoke. Me page naroro eniko iami sevaio amari rung luila ke Ainge.Waekme iau nakim iami. ² Iau navetaom Iodia me iau navetaom Sintike soge amari ke naremonga tiavolemnga luila ke Ainge. ³ Onauna ngata, iau nakim vileko iami seime takeve nourata tiavolemnga ngata iami sevaio apaulore neiware airiko. Seime ire tige nakarkarnga titolaknga wau me emkeve nourata ke Ainge ila me ila volem. Me itolaknge Klemen me iau waek nouratare tengere pau seime erepasis talo ke Buk ke namamatanga. ⁴ Natini gelgelnga luila ke Ainge nae vuno, me iau navul pau natini gelgelnga luila ke Ainge. ⁵ Akevire natamtamaol sevaio tileiknge nagol nalnge kiami pa aisae me Ainge taio towoi. ⁶ Iami sevaio relmomi siange page navulnga tea avo. Me navulnga aingur ainge, napavulnga me navetanga itolaknge nangonga savurim ila ke Natavolo.Akeve Natavolo isou ke ilei kngare navetenga kiami. ⁷ Me nate tawainga ke Natavolo eio ila ngata page narelmonga kita natamtamaol, isou ke irukale narelmonga kiami luila ke Krais Jisas. ⁸ Songe napakaure nangonga, waek natamtame, navulnga sokngare eio onaunange, navulnga sokngare isou ke itoke napasis ainge, navulnga sokngare eio nalngare, navulnga sokngare eio eregol tea siange avo, navulnga sokngare eio popuare, me songe so navulnga tea isou ke itoke napasis ainge eio iami sevaio relmomi ikono page. ⁹ Navulnga sokngare iami atoke erepautainga me atokore, me alongore me aleire luila kiau, iami sevaio akevire eta Natavolo ke nate tawainga pa igingin kiami. ¹⁰ Iau tinik igelgel pua ngata page Ainge pa aisae me ailiakoko, iami relmomi pagau pau.Onauna la onauna, iami sevaio relmomi so apaulo au munga me page naroro tiavo eta iami apaulo au tiavo. ¹¹ Iau nangongo vileko so navul iami so iau namoro page navulnga tea avo. Pa iau nawotai ke tinik igelgel page navulnga sokngare iau lekva ke nae tiatia. ¹² Iau nawotai ke napot wai natamtamaol ke lekvunga songan avo me natamtamaol lekvunga songan avo. Page naroro vunoinge me navulnga vunoinge, iau nawotai naroro kounge ke natoke nanga avo me lekva songan avo. ¹³ Iau nasou ke nakeve navunga vunoinge luila ke Krais ie seie sevame ipavotvot iau. ¹⁴ Me, iami akeve popue ke apaulo au ke teinge akarkarnga. ¹⁵ Iami narumpua ke Pilipai awotai matanga ke naol popue, nasau iau nakoraranga Mesedonia, narumpua tea ipaulo iau page nagol ke natengainga me natokonga tiavo, iami volem taiola sevame akeve. ¹⁶ Me pau nasau iau nagingin elo Tesolonaika, iami sevaio apaulo au panga navulnga sokngare iau nakimre toitoi. ¹⁷ Eniko iwai so iau napainake naroro ke natokore navaiau sogan avo, Tiavo. Me iau nakim so naleie navunga soknge Natavolo isou so ikeve pagami page nasau iami akep vileko. ¹⁸ Iau natokore navulnga ta neigur ainge me sogan ngata pau. Iau natokore navulnga iami akevire timai kiau ke Epaproditus soge kiau.Navulnga eriko tipot kunre popue me tiwai natengainga popuare Natavolo ikimre me tinia igelgel panga. ¹⁹ Natavolo kiau pa itengai iami navungata neigur ainge iami akimre,itolaknge navulnga popuare kie,luila ke napasis ainge ke Krais Jisas. ²⁰ Me ailiakoko ie ta tamara,ie pa itoke napasis ainge nae vuno vuno.Onauna. ²¹ Iau nakeve nangonga ke natini gelgelnga pagire natamtamaol neiwol ainge naoguaingare luila ke Krais Jisas.Ire waek natamtame ire seime tigingin kiau ire tikeve nangonga ke natini gelgelnga iwot kiami pau. ²² Natamtamaol naoguaingare neiwol ainge siko tikeve nangonga ke natini gelgelnga iwot kiami. me ire narumpua seime tigingin ke nania ke Sisa tikeve nangonga ke natini gelgelnga iwot kiami. ²³ Nakewainga ke Ainge Jisas Krais pa isio igingin ke iami anunimi.