¹ Me songe nangonga tea ke ipavotvot iami luila ke krais, me songe iami agingin pua luila ke nakimnga kie, me songe nagol ke napavulnga luila ke Anunia Nalnge,me songe nakewainga me naremosianganga mugula kiami, ² epa iami akeve iau tinik igelgel ngata songe iami remomi tingtia, me iami limigol ting tia ke nakimnga, me iami apot tiavolem luila ke anunimi,me iami sevaio remomi tiavolemnga ke apapote navunga tiavolemnga. ³ Iami sevaio akeve navunga tea ke matami ikono mule pagami volem avo, avome ke atoke napasis ainge.Avo me page nagol ke atol mule iami aroun, iami sevaio aleire waimi tengere popuare ngata pagami. ⁴ Iami tiatia sevaio matami ikono mule pagami volem avo, me iami sevaio aleire or matami ikono page nakarkarnga me naremonga kire waimi tengere pau. ⁵ Iami sevaio limigol tingtia wai nagol ke Krais. ⁶ Jisas ie Natavolo, me ie itoke naremonga vileko, so isio igngin wai Natavolo avo. ⁷ Me ie iguloman page napasis ainge kie me lava narenren.Me ie ipot wai natamtamaol ke natatano. Me ie ipot wai nourata tame volem. ⁸ Ie itolmule iroun me iwatae nangonga ke Natavolo ila iseknge namatenga, me ie imate ailut ke naigasange! ⁹ Eta Natavolo ivira page ie ila ailut ngata.Me ie ikeve napasis tea page soknge ailut ngata panga napasis tengere pau. ¹⁰ Natavolo ikev vileko,pa aisae me luila ke napasis ke Krais, natamtamaol neigur ainge ailut ke heven me knge natatano me ke natatano remua pa tikat aere page. ¹¹ Natavolo ikev vileko songe natamtamaol ke nangonga vunoinge pa tivul ipot vileko, Jisas Krais ie Ainge, me ire pa tivira page napasis ainge ke tamara Natavolo. ¹² Vileko ta, iami narumpua kiau ngata, iami sevame awatata pue iau lekgongonga, pange lawe iau nagingin kiami volem avo, me eniko sevaio ipot sogan page lawe iau nagingin kiami avo io pa. ¹³ Me page namotounga, iami sevaio avoko ulami so aunak vileko so iami narumpua seime Natavolo itoko mule iami o. ¹⁴ Me page navulnga vunoinge iami akevire, iami sevaio osimi avo o agongo tangtang avo. ¹⁵ Akep vileko ta iami pa apot wai natamtamaol tikep rau avo me tigingin pua, wai namelamela ke Natavolo tinre galtiatia avo.Akep vileko ta iami pa apot wai navavanga milmil mugula kire natang kikgare me nalongoilil gare ke natatano eniko. ¹⁶ Akis rungke nangonga mamatange ke Natavolo me page eniko iau pa tinik igelgel page naetne ke Krais lamainga.Me iau pa nawotai vileko so iau nawavel sapa tiavo avome me nakep sape nourata tiavo. ¹⁷ Me songe iau lek mamatanga imotoktok iwai natengainga so ikeve nourata ke ipavotvote naoguainga kiami, iau tinik igelgel pagami neiwol ainge. ¹⁸ Me page nagol tingtia iami sevaio atolak ngauau ke tinra igelgel. ¹⁹ Me iau remok rung luila ke Ainge Jisas so nagule Timoti imai kiami peilei, pa aisae iau nakim so nalongore navulnga popuare iami akevire, isou so eniko ipaulo iau pau. ²⁰ Pa aisae, me iau lektamtamaol tea ie lagol tingtia iwai ie avo, seie sevame remua siangange pagami ngata. ²¹ Page aisae, me natamtamaoal tengere pau ire neiwol ainge ire sevaio tikeve nourata kire volem me ire remore panga navulnga ke Krais tiavo. ²² Me iami awotai nagol nalnge kie, tingtia wai namelamela ilongo pue tame langonga me iwatae, Timoti ie itolaknga wau emulua emkeve nourata luila ke naol nalnge. ²³ Iau nalei puenge, songe navulnga tiwavel o tivoko pua kiami eta iau nagule Timoti imai pelei kiami. ²⁴ Me iau remok rung luila ke Ainge pau vileko so iau pau pa namai towoi o. ²⁵ Iau remok so popue vileko so egulonga Epafrodaitus imule imai kiami. Ie iau waek natamta me emulua lemourata tiavolem me emulua sevaio emvoko wai natamtamaol ke napaulongare, me ie igige iami limigonga iwai iau lekgaurata tame. ²⁶ Pa aisae ie remua siange ngata me ie ikim ngata so angere agingin, pa aisae, me iami alongo so ie irival. ²⁷ Onauna ie itoke narivalnga naveinge la towoi songe imate.Me Natavolo remua siange page, ie volem avo, Natavolo remua siange pagau pau, pa aisae ie tinia so iau nasouwe nakarkarnga me naremo sianganga sogan avo. ²⁸ Eta iau remok ainge ngata songe nagule,eta iami pa tinimi igelgel page naetne iami pa aleie pau me iau pau pa tinik igelgel me remok itawai. ²⁹ Atoke Epafrodaitus pua page narelmonga ke natini gelgelnga luila ke Ainge me akepuare natamtamaol seime tiwai ie. ³⁰ Page nourata ke Krais volem towoi songe ie imate.Ie mate ila page emamatanga tiavo me imai ivoko kiau, ie itoke iami mulimi me imai ikeve nourata eniko.