¹ Pablo moso ri Jesukristo. ñamao pa sendá apostol apattao pa ebangelio ri Rioso. ² E sendá ebangelio lo ke e prometé pó merio ri má chakero endi má sagrara ekritura. ³ Asekka ri moná ele ke a nasé ri resendiente ri David. ⁴ Pó resurresió ri má mette, Éle jüe reklarao poreroso moná ri Rioso pó epiritu sando, Jesukristo Ño suto. ⁵ Pó merio ri Éle suto a resibí nglasia i apostolado pa oberiensia ri fe endi tó má nasió, po nombe ri ele. ⁶ Endi e nasió enú tambié sendá ñamao pa Jesukristo. ⁷ E katta sendá pato lo ke tá aí Roma, gende lo ke Rioso a kelé í a ñamá pa sendá sando, ke nglasia sendá kú enú, i pá ri Rioso Tatá suto i ri Ño Jesukristo. ⁸ Primó, i tá agraresé Rioso pó merio ri Jesukristo pó tó enú, pokke fé rí enú sendá proklamao pó tó mundo. ⁹ Rioso sendá perito mí a kié i tá siribí, endi epiritu a ebangelio ri Moná ri ele, ri kumo endi tó tiembo ia sé chitía ri enú. ¹⁰ I a sé pirí endi orasió mí, polé bae a enú sí Rioso keleba. ¹¹ I a kelé güatía a enú, pa ndá enú regalo epiritual, pa enú kujé kutú. ¹² E jüe lo ke i kelé pa alentá jundo a enú, pó merio ri fé ri enú i fé ri mí. ¹³ Aora numano lo ke i kelé e ke enú sepa ke i a intetá bae a enú pó un chochá poro i polé bae nú (pó ostakulo lo ke i teneba asta aora), lo ke i kelé e kujé un kosecha ri entre enú kumo lo ke i kujé ri má uto gentiles. ¹⁴ I a tén reuda kú má griego i kú má guarumá, kú má sabijondo i kú má sonso. ¹⁵ Asina ke i tá preparao pa proklamá ebangelio tambié a enú lo ke tá endi Roma. ¹⁶ I tén begüensa ri ebangelio nú, pokke sendá kutú ri Rioso pa sabbasió ri tó aké lo ke a kreé plimero pa judío i tambié pa griego. ¹⁷ Juttisia ri Rioso sé rebelá pó fé, pa fé kumo tá ekrito: "JUTTO TÁ MBIBÍ PÓ FE". ¹⁸ Pokke ira ri Rioso sé rebelá ri nsulú kondla tó impierá e injuttisia ri ombe lo ke asé aguantá belá belá ri Rioso kú injuttisia. ¹⁹ Pokke má kusa lo ke sé kunosé ri Rioso, sendá bisto pa ané, pokke Rioso tá briyá ²⁰ Poro lo ke gende sé güatía nú, ri má atributo ri Rioso e memo mottralo, pa má gende kunosé ri etetno kutú ri naturalesa ribina, kú klarirá regé Rioso krea mundo i tó má kusa ele a krea, asina ke nú tén ekusa. ²¹ Tó ekusa sendá pokke ané kunoseba to ri Rioso i ané glorifiká Rioso kumo Rioso nú, ni ndá bugungá, si nú ke ané a gobbé kumo sonso endi pensamiendo, i kolasó ri ané a kelá kumo po ekurana. ²² Ané a reklamá ri ané memo kumo sabijondo, poro ané a kelá kumo sonso. ²³ Ané kambiá ngloria ri Rioso ke asé lungá nú pó image ri ombe lo ke sé lungá, ri abé, ri bestiá ri kualingó pata i ri animao ke sé arrastrá. ²⁴ Pó e kusa Rioso entregá ané lujuría ri kolasó pa ané desonrá má kueppo ri ané memo. ²⁵ Ané jüe lo ke kambiá belá belá ri Rioso pó engaño i jüe lo ke arorá kusa lo ke Rioso a krea i nú a Rioso memo, Rioso sendá lo ke tén ke sé alabao pó tó má tiembo, asina güe. ²⁶ Pó e kausa, Rioso memo a entregá ané pasione desonrosa, pué má mujé ri ané a kambiá lo ke sendá nomal pó a ke lo ke sendá kondla ri naturalesa ri ané memo. ²⁷ Má ombe tambié a rejá lo ke e nomal kú má mujé i a ensedé kú lujuría uno kú uto entré ané memo. E klase ri ombe e lo ke a kometé tó kusa beegonsosa, poro ané tán resibí kastigo pó tá e kusa. ²⁸ Pokke ané nú keleba sabé ná ri Rioso, Éle a entregá ané a un mende reprabada pa ané asé kusa ke nú sendá apropiada. ²⁹ Ané tá yeno ri tó injuttisia, ri madda, ané tá yeno ri inbiria, ri asesinato, ri pleito, mbilé i mala intensió. ³⁰ Ané sendá kuentero, kaluniadore, enemio ri Rioso. Ané sendá agresibo, arrogante, jastansios. Ané sendá inbentores ri kusa mala, i nú sé asé kaso a tatá kú mae ri ele. ³¹ Ané sabé entendé nú; ú meresé konfiansa, nú tén afesto pó nú enteguesá ané sendá despiadao. ³² Ané tá entenguesá juisio ri Rioso ke aké lo ke sé asé tó e kusa sendá rinno ri muette. Poro ané numá sé asé e kusa, sinú ke tambié asé kompichá kú má uto lo ke sé asé tó e kusa.