¹ Antonse aggú Fariseo y a eskriba tá miní a Jesús renje Jerusalén; i tá chitiá a ele: ² "¿Po ke risipulo ri bo repetá nú trarisió ri karusiano? Pué ané tá porría mano ri ané pa kumé nú." ³ Jesús tá kontestá chitiando:" Y enú, ¿po ke nú repetá mandamiento ri Rioso po trarisió ri enú? ⁴ Pokke Rioso tá disí: "ASÉ KASOA TATÁ I MAE RI BO, I 'AKE KIENE CHITIÁ MAL RI TATÁ KÚ MAE, BAE A LUNGÁ. ⁵ Poro enú tá chitiá: 'kuakié ke tá chitiá ke tatá kú mae ri ele, "Kuakié yulá ke bo poleba kujé ri mí sendá ofrenda ri Rioso", é jende nesesitá onrá Tatá ri ele nú. ⁶ "Ri é manela a rejá palabra ri Rioso po trarisió ri enú. ⁷ Enú ipokrita, tá chitiá Isaías kuandí tá profetisá ri enú, ⁸ É JENDE TÁ ONRÁ MÍ KÚ JOSIKO RI ANÉ, Y KOLASÓ RI ELE A TÁ A LEGUÁ RI MÍ. ⁹ ANÉ TÁ SÉ KULTO PA MÍ ENDI BANO, POKKE INSIÑÁ DOTRINA MANDO RI OMBE." ¹⁰ Antonse, ele ta ñamá chochá ri jende, i tá chitialo: "Kucheno i entendé, ¹¹ Ná ri lo ke tá lendrá endi boka tá kontaminá má jende." ¹² Antonse risipulo tá yegá endi Jesús i a chitialo: ¿Sabeba ke Fariseo tá ofende kuandí ané a kuchá é palabra? ¹³ Jesús tá kontetá i chitiá: "To planda ke Tatá mí seletiá tá semblá nú, bae a sé alanká: ¹⁴ Apattá ri ané; ané sendá guiá sin miná si jende sin miná tá guiá uto jende sin miná to ané bae a kaí endi un joyo." ¹⁵ Pedro a tá chitiá a Jesús: "Epliká suto é palabra." ¹⁶ Jesús tá chitiá ané: "¿Toabiá ané tá sin entendé? ¹⁷ ¿ Enú tá miná nú ke tó kusa ke a lendrá po boka ri enú tá yegá endi barika ri enú i tá sé ichao endi baño? ¹⁸ Poro kusa ke tá miní ri boka ri enú tá miní ri kolasó i é kusa é ke tá kontaminá a to jende. ¹⁹ Ri kolasó tá miní kusa mala, má mottandá, adutterio, imoralidad sesual, jutá, trochimá i insutto. ²⁰ É kusa sendá lo ke kontaminá má jende. Poro kumé kú mano sin porriá kontaminá jende nú." ²¹ Antonse Jesús tá apatta ri ané i a bae pa region ri Tiro y Sidón. ²² Antonse, un chagaina Kananea a salí é region, i a komensá a sé botrokolo chitiando: "Tén miserikoddia pa mí Ño, moná ri Dabid; moná mí tá sé moletá po remonio." ²³ Poro, Jesús tá chitiá ná nú. risipulo ri ele a miná i a rogá ele chitiando: "Chitiá ele ke bae pokke ele tá siguí kú botrokolo lao tra ri suto." ²⁴ Poro Jesús tá kontetá i a chitiá: "I tá sé mandaó nú pa narie solo pa obeja ke tá ekanforá ri posá ri Israel." ²⁵ Poro ele tá asekká i tá ningotá endi pie ri ele, chitiando: "Ño yulá mí." ²⁶ Éle tá chitiá: "Sendá kaiko nú kujé án ri moná y ichalo a pelo chirindingo." ²⁷ Éle tá chitiá: "Sí, Ño, poro pelo chirindingo tá kumé pito ke tá kaí ri mesa ri suamo ri ané." ²⁸ Antonse Jesús tá chitiá: "Changaina, ngande sendá fe ri bo. Kusa tá asé seggú reseo ri bo." Y moná ri ele asé saná é tiembo. ²⁹ Jesús a bae ri é paraje i tá bae sekká ri mar ri Galilea. Antonse tás subí endi un montaña i tá sentá aí. ³⁰ Tá yegá pa andi ele un chochá ri jende i kú ané tá yebá kojo, jende ke poleba miná nú, mu, manko, jende lisia y uto chochá ri chakoso. Ané tá yegá aí pie ri Jesús, y ele a sanalo. ³¹ Ke jui tá pasá ke chochá ri jende taba jarocho minando, muo chitiá, a lisiado sanao, a kojo kaminando. i tá glorifiká Rioso ri Israel. ³² Jesús tá ñamá risipulo ri ele i tá chitiá: "I tén kompasió po chochá ri jende pokke tá miní kú i po trilingó ría i ané tén ke kumé nú. ri mo ke refallesé endi kaddume nú." ³³ Má risipulo tá chitiá ele: ¿ri endi suto tá kooseguí to é pan ndá a é chochá ri jende endi un resieto kumo é? ³⁴ Jesus tá chitiá: "Kuá pan enú teneba? Ané tá chitiá sielingó i bario pekao chirindingo." ³⁵ Antonse Jesús a mandá a chochá ri jende a sentá endi suelo. ³⁶ Éle tá kujé má pan y pekao y repué ri ndá bugungá, a patilo i a ndá a risipulo y ané a ndalo a chochá ri jende. ³⁷ To jende tá kumé i a kelá ke é ané a yená sielingó ri seta. ³⁸ Lo ke a kumé sendá kualingónanana sin kondá changaina y majanasito. ³⁹ Antonse Jesús a chitiá ke atá uto begá a chochá ri jende i a bae endi un bakko pa region ri Magdala.