¹ Po e tiembo kabimbamte Erodes a kuchá má fecha ri Jesús. ² Éle a chitiá a moso si: "E sendá Juan ma Bautista, kiene a ta palá ri má muetto. Po e kusa e má polé a tá endi Éle". ³ Pokke a ngalá a Juan; a enkarená éle i meteló endi tramukua, po kausa ri Erodías, birikueta ri numano si Felipe. ⁴ Pue Juan a chitiá éle: "Bo polé ten éle kumo birikueta". ⁵ Erodes a ndalo muette, poro éle ten miero a má gende, pokke má gende ta kreé ke Juan sendá un chakero ri Rioso. ⁶ Poro kuandi kumpleaño ri Erodes a miní, ma moná ri Erodía a saranguiá endi merio i a ngutá a Erodes. ⁷ En repuesta, éle a prometé jurando ndá kuarkié kusa ke éle tan pirí. ⁸ Repue ri sé insiñao po maé si, éle a chitiá: "nda mi, endi un palagana, kabeza ri Juan ma Bautista". ⁹ Takurimbo a ta triste po kusa ke éle tan pirí, poro po kausa ke éle tá jurá, i po kausa ri to lo ke ta ku éle endi sena, éle a mandá pa asé e kusa. ¹⁰ Éle a mandá a mochá kabesa ri Juan endi tramukúa. ¹¹ Antonse kabesa ri Juan jue traia i ndá a monasita i éle a yebaló pa andi mae si. ¹² Antonse disipulo ri Juan a miní, a lebandá kuerpo ri Juan i a enteralo. Repué ri e kusa, ané a bae i a chitiá e kusa a Jesús. ¹³ Kuandi Jesús a kuchá e kusa, éle bae ri aí pa andi uto paraje apattao. kuandi chochá ri gende a kuchá e kusa, ma gende a siguí a Éle renje má siurá. ¹⁴ Antonse, Jesús a miní lande ri ané, a guatiá ma chochá ri gende. Éle a tené kompasión ri ané i Éle a kulá má gende ke ta chokosa. ¹⁵ Kuandi tiembo ri okurana a miní, ma disipulo a bae pa andi Éle a chitiá: "E sendá un paraje apattao, ría a kabá. Mandá e chochá ri gendé pa bae pa terruño ri ané pa komblá pa ané memo. ¹⁶ Poro Jesús a chitiá: "Ané ten ke bae nú. Enú ndá a ané kuminá". ¹⁷ Ané a chitiá: "Suto nú má ten kilingó pan kú bilingó peskao". ¹⁸ Jesús a chitiá: "Trelo pa andi mi". ¹⁹ Antonse Jesús a mandá a ma chochá ri gende pa sendá endi yerba. Éle a ngalá má kilingó pan ku bilingó peskao. guatiando pa nsulú, Éle a bendesí, a pattí ma pan i Éle a ndalo a ma disipulo si. Má disipulo a ndalo a to ma chochá ri gende. ²⁰ To ané a kumé, i ané a kelá jatto. Antonse ma disipulo a ngalá lo ke kelá ri ma bilingó piaso ata ke dolingó kanasta a ta yena. ²¹ Ané lo ka a kumé a sendá kumo kilingó na na ná ombe, kondando nú ma changaina ni má mona. ²² Ri un be Éle a mandá a disipulo si pa montá endi barka pa bae ante ke Éle pa ma uto lao, mindla Éle memo ta despedí a ma chochá ri gende. ²³ Repué ri despedí a ma gende, Éle a subí pa monde a orá. kuandi tiembo ri okurana a miní, taba Éle nú má. ²⁴ Poro má barka taba endi merio ri mar, azotao po má ola, pokke ma biento sendá ri kontra. ²⁵ Andi kuarta bigilia ri ma tiembo prieto, Jesús a bae pa andi ané kaminado riba ri mar. ²⁶ Kuandi ma disipulo a guatiá Éle kaminá riba ri mar, ané a kelá asustao chitiando: "Sendá un fantasma", ané ta asé jarana. ²⁷ Poro Jesúa a chitia ri un be: "¡Ten kutú! ¡I sendá! ¡Ten miero nú!" ²⁸ Antonse Pedro a responde chitiando: "Ño, si sendá bo, mandá pa i bae pa andi bo riba má apú". ²⁹ Jesús a chitiá: "Miní". Asina ke Pedro a salí ri ma barka i éle a kamina riba ri apú pa bae pa andi Jesús. ³⁰ Poro kuandi éle a guatiá ma juete biento, éle ten miero. miendla éle undí, a jaraná: "¡Ño, sabbá mi!" ³¹ Jesús ri un bé a estirá mano si i Éle a ngalá a Pedro i a chitiá: "Ombe ri chito ri fe, ¿Pokke a dudá?" ³² Antonse kuandi Jesús kú Pedro a subí endi barka i má biento a palá ri soplá. ³³ Antose ma disipulo endi barka a arora a Jesús chitiando: "Ri belá belá bo sendá Moná ri Riosa". ³⁴ Kuandi ané ta pasá, ané a ta yegá endi tiela ri Genesaret. ³⁵ Kuandi ma ombe endi akel paraje a miná ke sendá Jesús, a mandá rekao po to ma paraje ri e patte, antonse ma gende a tre a to ma gende lo ke ta chakoso. ³⁶ Ané ta supliká pa rejá tentá borde ri chepa nú má, asina ke tanto kumo tan tentá Éle tan sendá kulá