¹ Endí ake tiembo Jesús a pasá po ma losá rí lingó rí trigo. i ma rissipulo taba ku kanatulé i a kumensá a kujé rama rí trigo i a kumé. ² i kuandi fariseo guatiá a kusa chitiá: "Guatiá, pokke ma rissipulo a ta sé e kusa ke a polé nú endí ría rí lonkolo." ³ Poro Jesús chitiá: "¿Enú a lé lo ke David asé kuandi taba ku kanatulé elé i ma ombe ke tamba kú éle? ⁴ ¿Kumo lendrá ai posá rí Rioso i kume pan konsagrao ke poleba kumé nú, nu ma saseddote? ⁵ ¿i nua lé endí lei, ke endí ría lokoló ma saseddote endí masiruma profaná lokoló poro nu sendá kuipable? ⁶ Poro i chitiá ke ai uno ma ngande ke masiruma rí aki. ⁷ Si bo sabeba lo ke a kusa sendá: 'MISERIKODDIA KELE i NU SACRIFISIO,' abeba kondenao nu a kiene nu tén kuppa. ⁸ Pue Mona rí Ombe sendá Ño rí ría lonkoló. ⁹ Antonse Jesús a bae rí ai i lendrá a masiruma rí judío. ¹⁰ E akí, abeba un ombe ku mano seka. Ma fariseo prundá a Jesús, chitianda: "¿Sendá kaiko kulá endí ría lonkoló?" pa asiná polé akusalo rí pekaro. ¹¹ Jesús chitiá: "¿Ke ombe abeba lendro rí enú, ke sí tené nu ma lingó obeja, i e obeja kai endí ueco jondo endí ría lonkoló, nu ngalá i saka rí ai? ¹² ¿Kuanto ma ta sendá baló rí ombe ke una obeja! Asiná ke sendá kaiko asé kusa juena endí ría lonkoló. ¹³ Antonse Jesús chitiá a ombe rí mano seka: "Koloka mano rí bo." Éle asé asiná i mano akomolá i kulá kumo uta mano. ¹⁴ Poro ma fariseo salí i planea kondla rí Éle. Ané taba buka kumo polé kumo mbila rí Éle. ¹⁵ Kuandi Jesús kuchá e kusa, Éle a bae rí aí. Un chocha rí jende siguí Éle i Éle tabá kulá a to. ¹⁶ Éle ndá rekao ke chitiá a uto rí Éle nu, ¹⁷ pa polé sendá rí belá belá lo ke jueba richo po kuenda rí chakero rí Rioso Isaías, chitiando: ¹⁸ "GUATIENDO, MOSO MI A KIENE I A KUJÉ; AMADO MI, ENDÍ KIENE AMMA MI TÁ KOMPIASIA. PODLE EPIRITU MI ANDÍ ÉLE , I ÉLE ANUNSIARÁ JUISIO A MA GENTILE. ¹⁹ ÉLE TÁN LUCHÁ NI KIAMÁ; NI KUCHÁ BO RÍ ÉLE ENOI MA KAYA. ²⁰ ÉLE LOMPE NU KAÑA PATIA; ÉLE APAGÁ NIGGUNA MECHA KU UMO, ATÁ KE NYEBA A BITTORIA E JUSTISIA. ²¹ I ENDÍ NOMBE SO PONELO MA NASIÓN EPERANZA SI." ²² Antonse ma jende a tré a Jesús un ombe ke nu tán polé guatiá i sendá muo. Poesio po un remonio. Elé a kulá asina ke muo polé chitiá i guatiá. ²³ To chocha rí jende lo ke a tá ai kelá ku asomblo i chitiá: "¿Sendaá e ombe Mondá David?" ²⁴ Poro kuandi ma fariseo kuchá a kus, chitiá: "E ombe icha juela remonio nu, sí nu po Beelzebú, kuringo rí ma remonio." ²⁵ Poro Jesús kunosé lo ke ané ta kranea andí pensamiento i chitiá: "To reino patio kondla a memo kelá solo i to siura i posa patia kondla e memo pemmanese nú. ²⁶ Asina ke sí Dianche icha juela a Dianchce memo, éle a ta patio kondla sé memo: ¿Kumo pemmanese reino sí si? ²⁷ i sí I icha juela remonio po Belcebu: ¿Po kién ichá juela ma jende ke a siguí? Po e kusa, ané sendá ma jues. ²⁸ Poro si I icha juela remonio po éle Epiritu rí Rioso, antonse e reino rí Rioso a yegá a to enú. ²⁹ ¿i kumo agguno polé lendrá endí posá rí un ombe ku kuto i ajutá lo ke éle tén endí posá sín amalá i kuje a ombe ku kutú primo? Antonse éle polé ajutá ma kusa rí posá rí éle. ³⁰ Kiene nu ta ku I kondla mí sendá, i kiene nu rekuje ku I, desparrama. ³¹ Asiná, ke I chitiá, to pekaro i blasfemia sendá perdonao a ma ombe, poro blasfemia kondlá Epiritu rí ño sendá nú. ³² i kuakiera ke chitiá aggú kusa kondla Moná rí Ombe, e kusa sendá perdona. Poro kuakiera ke chitiá aggú kusa kondla Epiritu Sando, e kusa polé sendá perdona nú, ni endí e mundo ní endí ke miní. ³³ Sí e palo sendá jueno, fruta rí éle sendá tambie sí e palo sendá maló, fruta rí éle sendá malo pokke un palo sendá kunosio po fruto rí éle. ³⁴ Enú generasión rí biborá, sí enú sendá malo, ¿kumo polé chitiá kusa juena, kuendi enú sendá malo? Pokke rí lo ke ta endí kolasón boka chitiá. ³⁵ Ombe jueno, rí kaiko tersoro rí kolasón, saká e kusa lo ke sendá jueno; i ombe malo rí tesoro malo rí kolasón saká a kusa lo ke sendá malo. ³⁶ i I chitiá ke endí ría rí juisio ma jende ndá fecha rí to kusa ke asé i chitiá. ³⁷ Pokke po kuenda rí ma palabra enú sendá justifikao, i po kuenda rí ma palabra sendá kondená. ³⁸ Antonse aggú rí ma ekriba i fariseo konteta a Jesús i chitiá: "Piacha, suto kelé guatiá una siñal rí bo." ³⁹ Poro Jesús konteta chitiando: "Generasión ke sendá mala i aruttara buká siña. Poro nigguno siña sendá ndá na ma siña rí chakero rí Rioso Jonás. ⁴⁰ Pokke asiná kumo Jonás tabá trilingó ría i trilingó okurana endí barika rí pes ngande, tambie Moná rí Ombe a tán trilingó ría i trilingó okurana endí kolason rí tiela. ⁴¹ Ma ombe rí Ninive lebandá endí juisio kondla e generasio rí jende i a kondená. Pokke ané arrepentí ku preríkasió rí Jonás, i guatieno, e akí uno ke sendá ma ngande ke Jonás a tá kí. ⁴² Takurimba rí sur lebandá endí juisio kondlá ma ombe rí e generasio i a tán kondenao. Éle miní rí ma konfine rí tiela pa kuchá sabijondería rí Salomón, i guatieno uno ke sendá ma ngande ke Salomán a tá ki. ⁴³ Kuandi un epiritu puekisusio salí rí un ombe, pasá pa paraje ke nu tén na, i buka rekanso, poro nu kondlá. ⁴⁴ Antonse chitiá: 'I gobbé a posá mí rí andí I salí.' i kuandi gobbé kondlá posá limpio i ku odde. ⁴⁵ Antonse bae i yebá ku éle uto sieliengó epiritu pior ke éle, i to ané miní a bibí ai. Antonse la konsidio rí e ombe sendá pior ke ante. Asiná memo sendá ku e generasío mabba.'" ⁴⁶ Miedla Jesús taba chitiá a chochá rí jende ke a ta aí, mae i numano sí taba aí juela, pa chitiá ku Éle. ⁴⁷ Uno chitiá: "Guatiá, mae i numano rí bo, a ta ki a juela, ané buka chitiá ku bo. ⁴⁸ Poro Jesús konteta chitiando: "Kiene sendá mae Mí? ¿Kiene sendá numano Mí? ⁴⁹ Antonse a mosdla a ma rissipulo i chitiá: "¡Guatieno, a kí a ta mae Mí i numano Mí!" ⁵⁰ Pokke kuakiera ke asé bolunda rí Tatá ke ta ríba rí nsulú, e jende sendá numano, numano i mae Mí."