1 Po eto , i Pablo, moso ri Jesukristo po enú má gentiles, 2 i a suponé ke a kuchá asekka ri terea ri gloria ri Rioso, ke Éle a ndá pa enú. 3 I tá kribí ri akueddo a rebelasió ke ndá mí a kunosé. É sendá ri belá ke tá ekondiá sobre kuá i a kribí ri un bé uto karta. 4 Kuandí a lee asekka ri eto, polé entendé persepsió mí sobre é belá ke tá ekondiá asekka ri Kristo. 5 Endi uto generasió é belá nú jue ndá a kunosé a má moná ri ombé. Poro aora Epiritpu a disí belá a má sando apóstoles y má chakeros ri Rioso. 6 É belá ke a tá ekondiá sendá ke má gentiles sendá koherederos y ñiá ri kueppo. Ané sendá kopartisipes endi promesa endi Jesukristo po merio ri ebangelio. 7 Pué i a konbetpi endi moso ri é ebangelio po é don ri grasia ri Rioso ke ndá mí po merio ri obra ri kutú Sí. 8 I sé má chikito ri má sando, jue ndá mí é grasia, ri chitiá palabra ri Rioso a má gentiles ebangelio ri má insondables má kalipotana ri Kristo, 9 y tree lú a to jende asekka ri kuá sendá plan, ministerio ke a tá ekondió renje má siglos po Rioso, kié a krea to má kusa. 10 É plan sendá ndao a kunosé po merio ri ilesia pa ke má kamaján y má autorirá endi má paraje selestiales miní a kunosé multiforme naturalesa ri sabiduria ri Rioso. 11 Eto a susedé ri akueddo a plan eternal ke Éle a kompletá endi Jesukrito Ño suto. 12 Pokke endi Kristo a tén a osadía y aseso kú konfiansa a kausa ri fe suto endi Éle. 13 Po kuá a pirí ke nú a rejá ri tén aliento po sufrimiendo mí po enú. Eto sendá gloria sí. 14 Po é kausa a doblá má rodiá mí ante Tatá, 15 po kuá to famiá endi nsulú y endi tiela sendá nombrao. 16 I a orá pa ke Éle a ndá, ri akueddo a má gloria kalipotana, ke sendá fottalesió kú kutú po merio ri Epíritu, kié tá endi enú. 17 I a orá ke Kristo a bibí endi kolasó sí po merio ri fe y ke enú sendá fijáo y simentao endi ngongoroko sí, 18 pa ke poleba entendé, jundo kú to má sando, kuá sendá ancho, latgo, atto y profundo ri ngongoroko ri Kristo, 19 y poleba kunosé endi ngongoroko ri Kristo, ke a esedé kunosimiendo, pa ke enú sendá yeno ri to plenitud ri Rioso. 20 Aora a Éle kié sendá kapá ri asé to má kusa, má allá ri to ke a pirí o a pesé, seggú kutú ke obra endi suto, 21 a Éle sendá gloria endi ilesia y endi Jesukristo pa to má generasió po to tiembo y pa to tiembo. Amén.