¹ Aora, ku repeto a ma asundo lo ke enú ekribí: "Abe tiembo ke nú sendá gueno drumí jundo endi matrimonio".

² Poro po merio ri tentasió, po chochá ri kusa inmora, ka ombe ten ke tené changaina ri elé memo i ka changaina ten ke tené ombe ri elé. ³ Ma mailo ten ke da ma rerecho a ma changaina elé, asiná memo ma changaina a ombe elé.

⁴ Nú sendá memo changaina kien ten juisio ri kuepo elé, elé sendá ma ombe. Ri e memo fomma, ma esposo nú ten aurorirá endi kuepo elé, ma aurorirá sendá ri ma changaina. ⁵ Nú rejá ri asé kusa lo enú kelé, numá po akuedo ri enú memo i po tiembo chirindingo. Ase e ma kusa pá enú polé tené tiembo pa ma orasió. Antose enú ten ke jundá uto be, pa ke Rianche nú tendá enú. ⁶ Poro i chitiá e ma kusa a enú kumo konsesió i nú sendá kumo mandamiendo. ⁷ I kele ke enú sendá kumo yo. Poro ka uno ri enú ten propio don elé. Uno ten un Don, i uto, uto don. ⁸ A ma lo ke nú ten changaina i lo ke changaina elé a lungá, i chitiá ané ke sendá gueno kelá asiná, kumo yo. ⁹ Poro si enú nú polé aguandá, ané tén ke kasá. Pokke sendá mejó pá ané kasá ke kemá ai endí tramakua. ¹⁰ Aora, kiene lo ke a kasá i tán dale ete mandamiendo, nú sendá ri Yo, sendá ri Ño: "MA CHANGAINA NÚ POLÉ REJÁ OMBE ELÉ." ¹¹ Poro si elé alejá ri malio elé, changaina ten ke kelá sin kasá o po kontrario bobbé ku elé. Asiná memo, "MA MALIO NÚ POLÉ REJA CHANGAINA ELÉ". ¹² Poro a ma uto i chitiá ané, ke si ma numano a tené eposa elé kien sendá inkredula i elé alegre ri bibí jundo elé, antose elé nú polé rejá ri elé. ¹³ Aora si aggun changaina mailo elé sendá inkredulo, i elé atá alegre ri bibí ku elé, elé nú polé aleja ri elé. ¹⁴ Pokke ma mailo inkredulo gualá po merio ri eposa elé, i ma changaina inkredula tan guala po merio changaina ri elé memo. Ri uto fomma mona ri ané sendá imundo, poro sendá sando ¹⁵ Poro si ma kombilesa ke nú sendá kristiano bae, dejá elé bae. Endi e kaso, ma numano o ma numana nú tá amalao endi rebosió ri elé. Rioso a ñamá suto pa polé bibí endi pa. ¹⁶ Pues, ¿kumo bo sabé, changaina, si sabba a mailo ri bo?o ¿Kumo bo sabé, mailo, sí sabba ma changaina ri bo? ¹⁷ Reja a kien bibí mbila lo ke Ño a rejá ané, ka kien kumo Rioso a Ñama elé.

Etá sendá ma lei endi to ma ilesia.

¹⁸ ¿Si aggun ombe reje ande ri se sinkusirao sendá ri Kristo? Elé nú polé remove ma maka uto be. ¿Kuandi Rioso a ñama a ma sirkunsirado pa kadume ri fe? ¹⁹ Elé nú polebá reja sinkusirá. Pokke ma sirkunsirasio nú sendá kusa ma ku juisio. ²⁰ Ka kien ten ke kelá endi ñamamiendo kuandi Rioso ñama elé. ²¹ ¿Enú sendá eklabo kuandi Rioso ñama a enú? Nú prockupá. Poro si enú polé sendá libre, kujé e ma bentaja. ²² Pokke kien a kuchá ñamamiendo po merio ri Ño kumo eklabo, sendá ombe libre po merio ri Ño. Ri memo fomma kiene sendá libre reje ande Ño ñama elé sendá eklabo ri Kristo. ²³ Kristo a kompra enú ai kru, asiná ke enú pole reja eklabisá ri ma ombe. ²⁴ Numanos, nú reja ma mbila ri ka kien ke suto tené reje ande ri ñamamiendo ri Rioso, kelá endi memo posisió. ²⁵ Aora pa kiene nú kasa, nú abe mandamiendo ri Ño. I tan dale opinion mí, po merio ri fe ri Rioso. ²⁶ Po tando, i pensá, ke po merio ri krisi, sendá gueno pa ma ombe kela ri memo fomma. ²⁷ ¿Enú lo ke a kasa? Nú alejá ri ané.¿Enú ta libre ri ma esposa? Nú buka ma eposa. ²⁸ Poro si bo kasa, bo nú peka. I si ma changaina lo ke ta sola kasa, elé nú asé pekaro. Po uto lao, kiene tá kasa tán tené un chochá ri brotokolo, i kele librá ri e kusa. ²⁹ Pero i chitiá un kusa, numano: Ma tiembo sendá kotiko. Ri aora endi lande, reja kien ten changaina bibí kumo kien nú ten na. ³⁰ kiene ta yola, ten ke asé kumo si ta yola nú; i kiene regosija kumo kiene nú ta regosija; i kiene kombla kuakie kusa, kumo si nú ten na. ³¹ I kiene lo ke ta asé uso ri mundo, nú ten ke asé kumo si ané asé uso ri elé, pokke sistema tan kaba. ³² I kelé ke enú sendá libre ri preokupasió. Ombe lo ke nú kasa atá prokupao po ma kusa ri Ño, kumo komplasé Éle. ³³ Poro ma ombe lo ke ta kasao atá prokupa po ma kusa ri ma mundo, i kumo komplase a ma changaina elé. ³⁴ Éle tá dibidió. Ma changaina ke nú kasa o sendá bigen atá preokupao po ma kusa ri Ño, sendá kumo guala kuepo i ma epiritu. Poro ma muje lo ke kasa tambié tá preokupa po ma kusa ri mundo, sendá kumo komplase a ma malio. ³⁵ I chitia e ma kusa pa bien ri enú, i nú sendá pa kusa mala. Sí enú sigí ma konsejo, pá enú kondlá ma fasi sebí a Ño ri suto. ³⁶ Pero si aggun ombe ta pensá ke nú polé tratá changaina ri elé ku juisio, antose elé ten ke kasa. ³⁷ Poro si elé kelé tá solo, elé a kele e ma kusa reje memo kolaso elé, antose elé ta asé kusa ri bien. ³⁸ Asina ke kiene kasá ku changaina elé tá asé kusa ri bien; i kiene nú kasa tá asé kusa ri bien lo memo. ³⁹ Ma changaina atá endi jundamiendo miendla mailo elé tá bibí. Poro si mailo ri elé a lungá, changaina kelá endi libetá pá elé bobbé a kasa, poro sendá numá ku kiene kreé endi fe. ⁴⁰ Poro endi opinion mí, elé sendá ma felí si kelá sola. Poro i kree ke i ten Epiritu Sando lendro ri mí.