¹ Ja̧'hua̧nö̧ ja̧'a̧ Boozmä̧ ötahuiyära̧'a̧ doächäcuähuo mȩ 'chä̧hui̧'ö̧, juȩnȩtä̧ pä̧mä̧di̧nö̧. A̧'u̧cua̧'a̧tä̧ jä̧ji̧ o'ca'a tö'cö a̧hua̧ru̧hua̧ kö̧ pä'ö Booz ucuocuäjäcumä ichi'inö̧. Boozmä̧ päinäcu̧: "Cha̧hua̧ru̧hua̧, pocu ichi'ö pȩnȩ pä̧mä̧di̧nö̧." Ja̧u̧mä̧ ichi'ö pä̧mä̧di̧nö̧. ² Ja̧'hua̧nö̧ ja̧'a̧ Boozmä̧ ötahuiyä ttö̧ja̧ tturuhuotö dieznö̧ jo̧mȩnä̧ huotörö huopo'ö pä'inö̧: Pȩnȩ pȩjä̧mä̧tu̧cui̧." Ja̧'hua̧nö̧ pä̧u̧ jahuätömä pȩjä̧mi̧nä̧tö̧. ³ Boozmä pä'inö tö'cönänö a̧hua̧tö̧hua̧rö̧: "Noemi, Moab rȩjȩ ötahuira̧'a̧ttö̧ ppa̧'achäju'caju, iyäju ki̧rȩjä̧ pättiyu ujutu ttö̧ja̧hua̧ Elimelec i'ätiyu ji̧nö̧. ⁴ Ttömä amucupdäjisä ucuru jiäu päda pä'ö. Emi jitöja yenä päjätö tta'ca jo̧mȩttö̧, ja̧'hua̧ta̧nö̧ chidepiyu ttö̧ja̧ Bu̧o̧so̧tö̧ ttä'ca jo̧mȩtö̧. "Iso pä'iönä ucu cȩma̧ päcuttömä, ȩmi̧. Ja̧'hua̧ta̧nö̧ cuȩma̧ päcujuiyöttömä, ja̧u̧ttö̧mä̧ jiähuittö, ttö iso pä'önä chu̧huo̧jua̧ pä'ö, ja̧'hua̧nö̧ ja̧'a̧ ya̧tȩ'i̧nä̧ to'a'a ucuttö'inä ca̧ra̧mä̧, ja̧'hua̧nö̧ ja̧'a̧ttö̧ ttö̧mä̧ ucu co'ca'anä ichösä". Ja̧'hua̧nö̧ ja̧'a̧ ca̧ra̧ ubomä pä'inö: ja̧u̧ttö̧mä̧ ttötä chȩmä̧cua̧sä̧. ⁵ Ja̧'hua̧nö̧ ja̧'a̧ Boozmä̧ pä'inö̧: "Noemí ki̧rȩjä̧ cuȩmö̧ mo̧ro̧mä̧, Rut Moab rȩjȩ ttö̧ja̧saju kirecuo 'corujuoächiniyä̧cua̧rö̧'i̧nä̧ cuirecua päi'önä cuȩma̧ pä'ö ja̧'a̧, ki̧tti̧ uhuäpächomenä juä̧jä̧ rȩjȩmä̧ 'corujuo'ächinö iminätä̧ ki̧ä̧cua̧'a̧nö̧." ⁶ Ja̧'hua̧nö̧ päcu tö'cönänö a̧hua̧ru̧hua̧mä̧ pä'inö: Ttömä jahuäjurumä̧ chȩmö̧ juiyö'anö̧ ja̧'a̧, chi̧tti̧mö̧rö̧ chiya pä'ö jö̧ tode'ächa'acu. Ttö chȩma̧ jueimä ucutä ȩmi̧, ttömä jahuäjurumä ȩmo̧cö̧sä̧." ⁷ Jitä pi̧yȩmä̧ täbocö Israel ttöja ttihueye jetti̧nö'ä̧nö ttö'äre pärocua'acu iyä'chacuäu. A päcurumä i̧jä̧pu̧ i̧säya 'coä̧da̧cuä̧u̧ iya pä'ö ji̧na̧'a̧: Pa̧'a̧nö̧ ji̧na̧'a̧ Israelttö hueähuä huene jue'önä jȩpö̧mä̧. ⁸ Ja̧hua̧nö̧ ja̧'a̧ttö̧ Booz tö'cönä a̧hua̧ru̧hua̧mä̧ pä'inö:" ucutätä mitö ȩmi̧." Ja̧hua̧nö̧ ja̧'a̧ttö̧ ja̧u̧mä̧ ö̧jä̧pu isäya ko̧ädäcuäu̧ icuinö. ⁹ Ja̧'hua̧nö̧ ja̧'a̧ Boozmä̧ ötahuiyä ttö̧ja̧ tturuhuotörö'i̧nä̧ ja̧'hua̧ta̧'a̧nö̧ juätö o'catoi'önä̧rö̧ pä'inö: "Ucutumä̧ jitä mo̧ro̧ jȩchö̧ topätöjä̧, Noemí kiya'a ȩmä̧ji̧sä̧ o'cajuiyönä Elimelec i̧rȩjä̧ ji̧nä̧jä̧ ja̧'hua̧ta̧'a̧nö̧ Quelión'i̧nä̧ Mahlón'i̧nä̧ tti̧rȩjä̧ ji̧nö̧. ¹⁰ Koromä̧ Mahlón minä recua Rut moab rȩjȩ ttö̧ja̧sajurö: Chirecua päi'önä ȩmä̧ji̧sä̧, ki̧tti̧ uhuäpächomenä juä̧jä̧ rȩjȩmä̧ 'corujuo'ächinö iminätä̧ ki̧ä̧cua̧'a̧nö̧, ja̧'hua̧nö̧ jo̧mȩnä̧ ahuaruhuättö i̧mi̧ toe'ächö juiyäcua'anö̧ ja̧'hua̧ta̧'a̧nö̧ doächäcuähuome ötahuiyänä kä̧cuä̧tö̧ttö̧'i̧nä̧. Ucutumä̧ jitä mo̧ro̧ jȩtö̧ topätöjä̧." ¹¹ O'catoi'önä̧ apate ä'ca ka̧cuä̧tö̧ ja̧hua̧ta̧'nö̧ ötahuiyä ttö̧ja̧ tturuhuotö pä'inä̧tö̧: "Ujutu ja̧'a̧ iso päi'önä̧ ja̧'a̧ pätäcuotömä̧. TTU̧RU̧HUA̧TÄ̧ ja̧'a̧ jahuäjuru ucu cuoju isodenä̧ do'ächäjuru ppä̧dä̧cua̧mä̧ Raquelrö ja̧hua̧ta̧'a̧nö̧ Learö ppädinö̧'a̧nö̧, jahuätö ta̧ju̧ ji̧na̧'a̧ Israel ttö̧ja̧ yottähuächönä̧ ka̧cui̧nä̧tö̧mä̧. Adiunä̧ ttö̧jä̧cua̧'a̧nö̧ Efratanä̧ ja̧hua̧ta̧'a̧nö̧ Belenttö̧mä̧ jareönä̧tä̧ ttö̧jä̧cuö̧tö̧. ¹² Ucu cuoju isodemä̧ Fares ojusode jö̧'a̧nö̧ jö̧nä̧, juhuorö Tamarmä̧ o'ca juo'inä̧ju Judarö, jahuäju mö̧äyaju isotöttötä yabocu yottähuächönä̧ i̧yä̧cua̧ TTU̧RU̧HUA̧MÄ̧. ¹³ Ja̧'hua̧nö̧ ja̧'a̧ttö̧ Booz irecua päi'önä, ȩmi̧nö̧ Rutrö, ja̧u̧mä̧ jahuäjucutä ä'inö̧, ja̧'hua̧nö̧ ja̧'a̧ttö̧ TTU̧RU̧HUA̧ muchaju päjia'anä ja̧'a̧tä̧ toinäcua̧, jaunö o'ca'a ji̧'qui̧cha̧hua̧rö̧ uhuäbecuinäju. ¹⁴ Nätö̧mä̧ Noemírö̧ pä'inätö̧: TTU̧RU̧HUA̧TÄ̧ ppä'ädö, jitämä to'ömä ko̧co̧ju̧juä̧ tö'cönä cuahuaruhuärö iyäcuajä̧ pide ji̧'qui̧cha̧hua̧rö̧. Ja̧u̧ i̧mi̧mä̧ ucuounä ö̧jä̧cua̧ Israelttö. ¹⁵ Ja̧u̧tä̧ jä̧cua̧'a̧ cuböäcua'anä̧ cueseunä tta̧huä̧rä̧cua̧mä̧ ucuru. Jahuäju ku̧jo̧ri̧jö̧ ucuru repe'äju, cui̧tti̧mö̧ ji̧mö̧tȩttö̧ todärenö̧ huinätö̧ttö̧'i̧nä̧ abonänö jö̧nä̧ uhuäbe'ö ki̧yä̧cua̧jä̧. ¹⁶ Ja̧'hua̧nö̧ ja̧'a̧ Noemímä̧ ji̧'qui̧cha̧hua̧rö̧ ȩmö̧, ka̧mö̧canä rutähuinäju̧, ja̧'hua̧nö̧tä̧ ja̧u̧rö̧mä̧ tta̧'a̧ri̧nä̧ju̧. ¹⁷ Ja̧'hua̧nö̧ ja̧'a̧ kö̧jo̧mȩ ppeyänä ka̧cuä̧tö̧mä̧ i̧mi̧ o'ö kä̧nö̧mä̧ pä'inätö̧: "Noemí ki̧tti̧ uhuäpächäji."Jahuätömä ja̧u̧ i̧mi̧mä̧ Obed pä'ö o'inätö̧. Ja̧u̧mä̧ Isaí jä'o ji̧na̧'a̧, ja̧u̧tä̧ ji̧na̧'a̧ David jä'omä̧. ¹⁸ Jitämä̧ pitö ji̧na̧'a̧ Fares ahuaruhuä 'cotömä̧: Faresmä̧ Hezrón jä'o ji̧na̧'a̧, ¹⁹ Hezrónmä Ram jä'o ji̧na̧'a̧, Rammä̧ Aminadab jä'o ji̧na̧'a̧, ²⁰ Aminadabmä̧ Naasón jä'o ji̧na̧'a̧, Naasonmä Salmón jä'o ji̧na̧'a̧, ²¹ Salmón mä Bozz jä'o ji̧na̧'a̧, Boozmä Obed jä'o ji̧na̧'a̧, ²² Obedmä Isai jä'o ji̧na̧'a̧, Isaimä david jä'o ji̧na̧'a̧.