¹ Israel ttö̧ja̧ ttu̧ru̧hua̧ David i̧tti̧ Salomón päinö huȩnȩ. ² Pi̧yȩ pähuä huȩnȩmä̧ huo̧juä̧huä̧ huȩnȩ'i̧nä̧ jȩttä̧cuȩ'i̧nä̧ huo̧juȩcuä̧ huȩnȩ ja̧'a̧, täcunä̧nö̧ huȩnȩ huo̧juȩcuä̧ ja̧'a̧, ³ ucumä adiu jueönä jȩpö̧ kä̧nö̧ ja̧'hua̧ta̧nö̧ ppädönä jȩ'cuä̧cuȩ jö̧nä̧ cuȩma̧ pä'ö jö̧. ⁴ Pi̧yȩ pähuä huȩnȩmä̧ i̧yä̧huä̧cuȩ ihueyenä kö̧rö̧ ja̧'hua̧ta̧'a̧nö̧ u̧huo̧juä̧chö̧nä̧ juhua'atäcu mö̧ä̧yotörö jueö huȩnȩ jȩttö̧nä̧ u̧huo̧juȩta̧ pä'ö. ⁵ Huo̧juȩcu̧nä̧ a̧mö̧cuädö adiu ä̧ju̧cu̧mä̧ yabonö u̧huo̧juä̧chä̧cua'anö̧ ja̧'hua̧ta̧'a̧nö̧ u̧huo̧juö̧'i̧nä̧ yabonö rö̧ä̧chä̧cua̧'a̧nö̧, juhua'atäcu pojopö topätömä 'cuäopäjimä ttu̧huo̧juä̧cua̧'a̧nö, ⁶ pähuä huȩnȩ'i̧nä̧ juhua'atäcu huo̧juȩcu̧nä̧ ttucuocu'i̧nä̧ ja̧'hua̧ta̧'a̧nö̧ jäecuä huȩnȩ'i̧nä̧ ttu̧huo̧jui̧pa̧ pä'ömä. ⁷ Huo̧juä̧huä̧ huȩnȩ kada'camä TÖ̧Ä̧NÄ̧HUA̧RÖ̧ ucuotäcuähuätä ja̧'a̧, huo̧huȩcu̧nä̧ a̧mö̧cuädocotömä huo̧juä̧huä̧ huȩnȩ'i̧nä̧ jȩttä̧cuȩ huo̧juȩcuä̧'i̧nä̧ kö'cocotö ja̧'a̧. ⁸ Chi̧tti̧, cuä'o u̧huo̧juȩtö̧ ä̧ju̧cui̧ ja̧'hua̧ta̧'a̧nö̧ cua̧ju̧ ku̧huo̧juȩtö̧mä̧ jäyämä cu̧ju̧ni̧'ä̧; ⁹ ja̧u̧mä̧ adiunä a̧'cua̧cu̧ cunä pöttähuä jä̧'i̧nö̧'a̧nö̧ juhua'atäcu cu̧ru̧pä̧'quȩnä̧ rä̧u̧sa̧ rä̧'i̧nö̧'a̧nö̧. ¹⁰ Chi̧tti̧, surojö jȩpä̧tö̧ surojö jȩ'cua̧ pä'ö huȩttä̧rö̧ttö̧mä̧, huettömä jȩ'cua̧tö̧. ¹¹ Jä'huätö pättöttömä: "Ttö̧ja̧sa̧rö̧ cuä'ö ticuäja ujutucu ichi, ujutucu ichi ttödahuächa ja̧'hua̧nö̧ dajahuächö koro'i̧nä̧ jo̧ca̧'a̧nä̧ huȩnȩ jui'ätörö turohuähua. ¹² Ichihuä tta̧'cua̧ra̧nä̧ tucuatö, jitö na'acho̧co̧tö̧rö̧ hua'are reju ȩpa̧ji̧'a̧nö̧ ja̧'hua̧ta̧'a̧nö̧ hua'are rejunä ma'ä̧chö̧ jȩtta̧ji̧'a̧nö̧. ¹³ Rö̧ä̧nä̧ mi̧cuäu o'cajuiyötä ttö̧'o̧cui̧'ä̧cuo̧tö̧jä̧; ttojusodemä suädi'önä̧tä̧ do'ädö tu̧ju̧nä̧cuo̧tö̧ korotöttö tu̧nä̧u̧cuä̧ji̧mä̧. ¹⁴ Ujutucu ji̧yȩtȩ icu topi; ujutumä o'catoi'önä̧tä̧ 'chotipäjimä tu̧ju̧nä̧rä̧cuo̧tö̧jä̧." ¹⁵ Chi̧tti̧, jahuätö tti̧'chä̧mä̧nä̧mä̧ cui̧'chä̧; kä̧dö̧'inä cui̧jä̧dä̧ jahuätö 'chä̧nö̧ tti̧jä̧do̧mȩmä̧; ¹⁶ jahuatömä pä̧cuä̧rö̧jä̧u̧ suonä jȩpö̧ tti̧'cha̧ pä'ötä ja̧'hua̧ta̧nö̧ ttö̧ja̧rö̧ cuä'ö icu ttucuoja ttihuerada pä'ötä juruhuächiätö. ¹⁷ Ppiyuhuä to̧ä̧rä̧cua̧'cua̧'a̧nä̧ i̧sa̧sa̧nä̧ cuicuttumä yaparetä ja'a̧. ¹⁸ pitö ttö̧ja̧mä̧ tta̧monä̧tä̧ cuä'u tti̧cua̧ pä'ö ttä̧tȩcuä̧tä̧ te'ädätö; ¹⁹ Ja̧hu̧a̧ta̧nö̧ juä̧mä̧tä̧ ja̧'a̧ pärätä nä̧u̧cuä̧rö ȩmä̧tö̧ tti̧'chä̧mä̧'inä; na̧u̧cuä̧rö̧ ttȩmu̧mä̧ ttamonä tta̧'cua̧rö̧tä̧ iyäu tticua'a jä̧i̧nö̧anö ja̧'a̧ ²⁰ Huo̧juä̧huä̧mä̧ mä̧nä̧ttö̧ pä̧i̧cu̧nä̧ huopö ka̧'a̧, jahuäjumä pä̧i̧cu̧nä̧ huopäju huäjuome kä'cottö; ²¹ Mänä rötädomettö̧ huopäju jahuäjumä, ötahuiyä doächäcuähuome apatettö ucuocuäju jahuäjumä. ²² "¿Tta̧'a̧nö̧ recuo jo̧mȩnä̧, ucutu ttö̧ja̧ huo̧juä̧tö̧jä̧ päcuätucua'amä, repecuätucua'a huo̧juä̧tö̧jä̧ päcuätucumä? ¿Tta̧'a̧nö̧ recuo jo̧mȩnä̧, ucutu ttö̧ja̧rö̧ ya̧'a̧huä̧'chä̧tö̧mä̧, cuesehuätucuäcua'a ya̧'a̧huä̧'chö̧mä̧, ja̧'hua̧ta̧'a̧nö̧ tta̧'a̧nö̧ recuo jo̧mȩ, ucutu cuamucuädö jui'ätömä, cua̧'u̧tä̧tu̧cuä̧cua̧'a̧jä̧ttö̧ huo̧juȩcu̧nä̧ kä̧cuä̧huä̧mä̧? ²³ Aduiunä ä̧ju̧cuä̧tu̧cui̧ ttö jueönätä̧ jidähua'anä; ttö chamucuädö ucunä juidä̧dä̧cua̧sä̧; ttö pädö cu̧huo̧juä̧ pä̧'ö̧ jȩchä̧cua̧sä̧ ucuru. ²⁴ Ttömä huo̧pä̧rä̧'i̧jö̧sä̧ ja̧'hua̧nö̧ ja̧'a̧nä̧ ucumä cuä̧ju̧cuä̧'i̧nä̧ pä'öcöjä; Ttö chu̧mu̧ te'ädinösä̧, ja̧'hua̧nö̧ ja̧'a̧nä̧ ya̧tȩ'i̧nä̧ ä̧ju̧cua̧ pä'ömä toinä'ä. ²⁵ Ja̧'hua̧nö̧ ja̧'a̧nä̧ ucumä jȩpo̧cö̧jä̧ jȩcu̧'a̧ pä'ö huedinö'inä ja̧'hua̧tä̧'a̧nö̧ adiunä'inä jä̧ju̧cuo̧co̧tö̧jä̧ ttö jueönä jidäu'imä. ²⁶ Ucú suronä jȩ'cu̧, rȩbȩhuo̧mȩnä̧ yecuecui'omenä Yä̧dä̧huä̧cua̧jä̧, ²⁷ Ucú ri̧ȩnä̧ yecuecumä i̧chä̧cua̧jä̧ kärö̧ o'coppa käräu surojoepu juatädäjiya'anö ucuru, suronä jȩcui̧nö̧tä̧ ja̧'hua̧nö̧ ja̧'a̧ttö̧ cua̧'cua̧ ttä̧huȩpu̧tä̧ i̧chä̧cua̧jä̧. ²⁸ Ja̧'hua̧nö̧ jo̧mȩnä̧ huo̧ttä̧cua̧sä̧, ja̧hua̧nö̧ ja̧'a̧nä̧ chädäti̧yä̧cua̧sä̧, ttö̧sä̧cua̧sä̧, ja̧'hua̧nö̧ ja̧'a̧nä̧ tti̧o̧cui̧'i̧yä̧cuo̧tö̧ ttörö. ²⁹ DIOSRÖMÄ yeecu'o cotöpinätö̧ ja̧'hua̧nö̧ ja̧'a̧ttö̧ juätömä ttö̧huo̧ju̧tä̧ su̧ro̧jo̧'ȩcui̧nä̧tö. ³⁰ jahuätömä ttö jidähuinö jȩpo̧co̧tö̧ pinätö̧ ja̧'hua̧nö̧ ja̧'a̧ttö̧ jahuätömä o'cajuiyönä kö'co'cotö pinätö̧ ttö juedepumä. ³¹ Ja̧'hua̧nö̧ ja̧'a̧ttö̧ usurä cuȩmä̧huä̧cuo̧tö̧jä̧ ucututä jähuänä ja̧'hua̧ta̧'a̧nö̧ cuȩmä̧cuo̧tö̧jä̧ suronä cuamucuädätucutä̧ yabo su̧'pä̧nö̧. ³² iso pä'iönä jarotti̧'omȩnä̧ jerupätörumä cuä'ö i̧cuä̧cuo̧tö̧ tu̧huo̧jö̧ jui̧ta̧'a̧ttö̧ tta̧'cua̧ tta̧ttȩcuo̧mȩnä̧. ³³ Ja̧'hua̧nö̧ ja'a̧nä̧ Ttörö adiu ä̧ju̧cu̧mä̧, ö̧jä̧cua̧ a̧'cua̧ adiunä. Ja̧'hua̧ta̧'a̧nö̧ yettecuoca'a surojö̧nä̧ cuäopa'anä.