¹ TÖ̧Ä̧NÄ̧HUA̧MÄ̧ Moiséscu ucuocumä pä'inö̧: ² Ucuocui Aaróncu'inä ja̧'hua̧ta̧'a̧nö̧ i̧tti̧mö̧cu̧'i̧nä̧ juhua'atäcu o'catoi'önä Israel ttö̧ja̧cu̧'i̧nä̧. TÖ̧Ä̧NÄ̧HUA̧ hueäjimä ji'ähuitö: ³ Isrsel ttö̧ja̧ttö̧ ya̧tȩ päcäyä uborö cuä'ö icuttumä̧, ovejaröcö̧, ä'ö kä̧cuä̧huo̧mȩttö̧ cabraröcö̧, ä'ö kä̧cuä̧huo̧mȩ u̧mi̧ttö̧ cuä'ö icuttumä̧ Ö̧Ä̧NÄ̧HUA̧RÖ̧ iya pä'ö. ⁴ Ja̧u̧ ca̧ca̧cu̧ pä̧cuä̧huodecu i'cächoca'attömä, Ö̧Ä̧NÄ̧HUA̧RÖ̧ ö̧jo̧de ä'ca jo̧mȩttö̧ iya pä'ö, ja̧u̧ ttö̧ja̧sa̧mä̧ cuä'ö icuäja'atä huȩnȩtä̧cuä̧huä̧cua̧. Ja̧u̧mä̧ cuä'ö icuäja'attö̧ ja̧'hua̧ta̧'a̧nö̧ ja̧u̧ ttö̧ja̧sa̧mä̧ ahuaruhuättö rä'epö i̧cuä̧huä̧cua̧. ⁵ JI̧nä̧so jȩtta̧ pä'ö pätetö hueähui'inömä Israel ttö̧ja̧rö̧ i̧sa̧rö̧ cuä'ö icu ttiya pä'ö TTÖ̧Ä̧NÄ̧HUA̧RÖ̧ ca̧ca̧cu̧ pä̧cuä̧huode ä'cattö, sacerdoterö'inä TÖ̧Ä̧NÄ̧HUA̧CU̧ esecu icuähuä jö̧nä̧ iyäcua'anö̧, meje'ca huäjuomettö cuä'ö icu ttiyajueimä. ⁶ Sacerdotemä Ku icu iyähuome TÖ̧Ä̧NÄ̧HUA̧RÖ̧ totoä̧cua̧ ca̧ca̧cu̧ pä̧cuä̧huo̧mȩcu̧ doächi'äcuähuomettö̧; ja̧u̧mä̧ ö̧a̧dehua ujuhuäcua TÖ̧Ä̧NÄ̧HUA̧RÖ̧ adiunä 'chopönä. ⁷ Ttö̧ja̧mä̧ tä'cö amonä tti̧ä̧nä̧huo̧tö̧rö̧mä̧ i̧sa̧rö̧ cuäö 'icu iyähuämä jȩttö̧ juiyäcuottö, jahuätömä kidepä iyä'chäcuähuäju 'cua̧rö̧nä̧ jȩpä̧ttö̧. Pi̧yȩmä̧ hueähuä huȩnȩmä̧ 'cuä'opunätä̧ kä̧cuä̧ yodoji ttähuäruhuä 'cotö'inä jȩttä̧cuä̧. ⁸ Ucumä jicuähua'anö ja̧'a̧ jahuätörö: Ya̧tȩ Israél ttö̧ja̧sa̧ jo̧ttö̧'i̧nä̧ ja̧hua̧nö̧ jo̧ca̧'a̧ i̧chä̧cuä̧hua̧ ucutu cu̧'cä̧tȩnä̧ ö̧jö̧ttö̧'i̧nä̧, ttiäre iyähua ku'icu ja̧'hua̧nö̧ jo̧ca̧'a̧ cuä'ö icu iyöttömä, ⁹ TÖ̧Ä̧NÄ̧HUA̧ ö̧jo̧ca̧ apate ö'cattö cuä'ö icuoca'a jö̧ttö̧mä̧, ja̧u̧mä̧ ahuaruhuättö 'cä̧'ȩpö̧ i̧cuä̧hua̧ jä̧cua̧. ¹⁰ Israél ttö̧ja̧sa̧ttö̧ ya̧tȩ, ja̧hua̧nö̧ jo̧ca̧'a̧ jö̧ttö̧mä̧ i̧chä̧cuä̧hua̧ ucutu cu̧'cä̧tȩnä̧ chö̧, idepä cuocua'anä ucuttumä, ttötä chabo'i̧ya̧ 'cua̧rö̧nä̧ to̧chä̧cua̧, ucututtu ja̧tȩ cuocua'anä ucuttumä; ttötä 'ca̧'ȩpö̧ chi̧cuä̧cua̧ ahuaruhuättömä. ¹¹ De'a i̧sa̧ a̧'cua̧rö̧mä ucutu cucuojanä ka̧'a̧ttö̧. Ttömä jahuätö ttucuoja iyinö̧sä̧ ucuturu ucutu suronä jȩcu̧'ä̧tu̧cu̧ mi̧cua̧ päi'önä cuiyätucua pä'ö ku'iyähuome ja̧'hua̧nö̧ iyötä a̧'cua̧rö̧ cu̧jä̧tu̧cua̧ pä'ö, ttucuojämä suronä jȩttö̧ micuä päi'önä iyähuoya ja̧'a̧, juoyä ttucuojanätä micuä iyö a̧'cua̧rö̧ kä̧tö̧jä̧. ¹² Ja̧'hua̧nö̧ ja̧'a̧ttö̧, ttö ji'ähuinösä̧ israel ttö̧ja̧rö̧ ya̧tȩ'i̧nä̧ cucu'ätucu'ó ucututtömä idepäcu ja̧'hua̧ta̧'a̧nö̧ ucuojamä, ja̧'hua̧ta̧'a̧nö̧ ucu'ó idepäcu ucu'ojacu ko̧ro̧ jä̧ttö̧ i̧chä̧cu'ä̧hua̧dä̧jä̧ ucutucu kö̧mä̧. ¹³ Ya̧tȩ Israel ttö̧ja̧ttö̧'i̧nä̧ ya̧tȩ koromettö̧ 'chä̧cua̧huo̧tu̧'i̧nä̧ ucutucu kä̧tu̧mä̧ ,u̧sä̧rö̧ cu'ättöttömä de'á i̧sa̧ju̧ttö̧'i̧nä̧ eju'abä ku̧nä̧rö̧ju̧ttö̧'i̧nä̧ ttucu'a pe'ö ju̧ttö̧mä̧ , jo̧'ú̧ ttö̧ja̧sä̧mä̧ ucu'oja huerädö icu'a pe'ö ka̧'a̧ rȩjȩ́ 'cucuächi'önä ucujattö. ¹⁴ Ja̧'hua̧ta̧'a̧nö̧ ya̧cu̧nä̧ de'á isotömä ttucu'ojanä a̧'cu'arätö̧. Ja̧'hua̧nö̧ ja̧'a̧ttö̧ ji'ähuinösä̧ Israel ttö̧ja̧rö̧, ucutumä cucu'ätucu'ä ya̧tȩrö̧'i̧nä̧ de'á i̧sä̧rö̧mä̧ idepäcu ucu'ojacumä, o'cato'inä de'á isotömä a̧'cu'a̧rä̧tö̧ ttucu'ojattötä. Ya̧tȩ ucuttömä 'quȩ'ȩpu̧ ku̧nä̧hua̧. ¹⁵ O'catoi'önä i̧sa̧ 'corujuo'ächäjiröcö̧ ka̧ra̧ i̧sa̧ pä̧i̧cua̧ cuä'ö icuäcurucö̧ cuätumä, juhuorötä uhuäpächinö ja̧ pä'ö'inä ko̧ro̧jä̧ttö̧ i̧chä̧cuä̧hua̧ ucutucu kö̧ ja̧ pä'ö'inä, ja̧u̧mä̧ ö̧'ca̧tä̧huä̧ti̧yu̧ töcö kä̧nö̧ ajiyanä iä́ icua pä'ötä ja̧'a̧, ja̧'hua̧ta̧'a̧nö̧ ja̧'hu̧ta̧'a̧nö̧ ja̧u̧mä̧ ni̧pä̧cho̧mȩ jubö päi'önä su̧ro̧pa̧ jö̧nä̧tä̧ to̧ttä̧cua̧. Ja̧'hua̧nö̧ jo̧mȩnä̧tä̧ surojömä jui̧'a̧ jö̧nä̧tä̧ ö̧jä̧cua̧. ¹⁶ Ja̧'hua̧nö̧ ja̧'a̧nä̧ ö̧'ca̧tä̧huä̧ta̧'i̧nä̧ ötöcoca'a ajiyanä'inä i'ö icuoca'a jö̧ttö̧mä̧, chutä jähuänätä̧ ro̧ȩcuä̧cua̧.