¹ TÖ̧Ä̧NÄ̧HUA̧MÄ̧ Moiséscu ucuocuinö, pi̧yȩ cuäopina̧'a̧ Aarón i̧tti̧ ta̧ju̧ totte'ächäji o'ca'a, jahuätömä TÖ̧Ä̧NÄ̧HUA̧ ö̧jo̧mȩ tö'cö tti̧'chi̧'o̧mȩnä̧ 'corujuo'ächinä̧tö̧. ² TÖ̧Ä̧NÄ̧HUA̧MÄ̧ Moisésrö pä'inö: Cuböo Aaróncu ucuocu ji'ähuirö rö̧ä̧nä̧ ro̧o̧mȩ, tto̧ȩcuä̧ta̧ abonä ji̧yȩtȩ mo̧ro̧ esecuäcuähuä ȩco̧ca̧ muecuäbi ä'ca ichö juiyäcua'anö. Ichöttömä, ja̧u̧mä̧ 'coru päi'äcua̧, isopäi'önä Ttömä i̧so̧ca̧ mö̧ȩcuäbi huä̧mȩttö̧ isoppanä chi̧jȩcuä̧cua̧sä̧. ³ Ja̧'hua̧nö̧ ja̧'a̧ Aarón rö̧ä̧nä̧ ro̧o̧mȩ doächa pä'ö pi̧yȩ jȩa̧ pä'ö ji̧na̧'a̧. Ja̧u̧mä̧ doächa pä'ö ja̧'a̧ päcäyä mö̧ä̧rö̧ i'cächötä suronä jȩä̧ji̧ jȩä̧chö̧nä̧ iya pä'ö ja̧'hua̧ta̧'a̧nö̧ oveja uborö'inä ku icu iyähuä iyäcua'anö̧. ⁴ Ö̧'ca̧tä̧huä̧ta̧mä̧ lino i̧sä̧ta̧ 'cä̧'ȩpö̧ ku̧nä̧huä̧ta̧ ö̧'ca̧tä̧hua̧ pä'ö ja̧'a̧ juhua'atäcu chutätä jacuänä 'ca̧tä̧huä̧cuä̧huä̧ta̧'i̧nä̧ ö̧'ca̧tä̧hua̧ pä'ö ja̧'a̧, ja̧'hua̧ta̧'a̧nö̧ lino i̧sä̧ta̧ttö̧ äcänämä ti̧ä̧dä̧cuä̧cua̧ pä'ö ja̧'a̧ juhua'atäcu cäyuhuä'ca lino i̧sä̧ta̧ttö̧ adicua'a i̧huȩnä̧hua̧ pä'ö ja̧'a̧. Ja̧u̧mä̧ jä̧ttä̧pä̧ya̧ ajiyanä töcäu icua pä'ö ja̧'a̧ ja̧'hua̧nö̧ ja̧u̧ pö̧jä̧ta̧ a̧mö̧nä̧ pa̧ja̧tö̧ 'ca̧tä̧hui̧'ö̧'ca̧. ⁵ Ja̧u̧mä̧ Israel ttö̧ja̧ surojö jȩttä̧ji̧nä̧ iyähuä jö̧nä̧mä̧, ȩmä̧cua̧ chivostö̧rö̧mä̧ ta̧ju̧ru̧tä̧ ja̧'hua̧ta̧nö̧ oveja uborömä ya̧tȩrö̧tä̧ ku icu iyähuä jö̧nä̧. ⁶ Ja̧u̧nu̧ o'ca'a, Aarónmä suronä jȩttö̧ jȩä̧chö̧nä̧ i̧yä̧hua̧ päcäyä uborö i̧yä̧cua̧, chutä jähuänä'inä ja̧'hua̧ta̧'a̧nö̧ ahuaruhuä suronä jȩttä̧ji̧ jähuänä'inä. ⁷ Ja̧'hua̧ta̧'a̧nö̧ chivostö̧ ta̧ju̧ru̧ 'chu'ädo'ö TÖ̧Ä̧NÄ̧HUA̧ ä'ca jo̧mȩ ö̧tä̧cua̧ pä̧mä̧dä̧cuä̧huodera̧'a̧cu̧ doächi'äcuähuomettö. ⁸ Ja̧u̧nu̧ o'ca'a, Aarónmä ta̧ju̧ cabratö̧ u̧mä̧tö̧rö̧ icu toa pä'ö jä̧cua̧'a̧, ya̧tȩrö̧mä̧ TÖ̧Ä̧NÄ̧HUA̧RÖ̧ ja̧'hua̧ta̧'a̧nö̧ ka̧ra̧rö̧tä̧ suronä jȩttö̧ jȩä̧chö̧ jähuänä. ⁹ Aarón, icu toomenä cabra TÖ̧Ä̧NÄ̧HUA̧NÄ̧ i̧mi̧nä̧ ma'amä̧ji̧rö̧mä̧ TÖ̧Ä̧NÄ̧HUA̧RÖ̧TÄ̧ iya pä'ö jä̧cua̧'a̧ ja̧'hua̧nö̧ ja̧'a̧ cabra uborömä suronä jȩttö̧ jȩä̧chö̧nä̧ iyähuä jö̧nä̧tä̧ i̧yä̧cua̧. ¹⁰ Ja̧'hua̧nö̧ ja̧'a̧nä̧ cabra ubo icu toomenä suronä jȩttö̧ jȩä̧chö̧ jähuänä ma'ä̧mä̧ji̧rö̧mä̧ a̧'cua̧ra̧'a̧nä̧ TÖ̧Ä̧NÄ̧HUA̧ ä'ca jo̧mȩcu̧ i'cächa pä'ö jä̧cua̧'a̧, suronä jȩttö̧ jȩä̧chö̧nä̧ ttiyö o'ca'a cabra uborömä oto de'a juiyä̧jä̧ra̧'a̧tä̧ hue'ö tticuarö pä'ö. ¹¹ Ja̧u̧nö̧ o'ca'a Aarónmä̧ äji päcäyä uborö iya pä'ö ja̧'a̧ suronä̧ jȩttö̧ jȩä̧chu̧nä̧ iyäcu jä̧cu̧a̧'a̧, Ja̧u̧mä̧ chutä jähuänä̧'i̧nä̧. Ja̧u̧mä̧ chutä surönä̧ jȩö̧nä̧'i̧nä̧ ja̧'hua̧ta̧'a̧nö̧ ahuäruhuä surönä jȩttö̧'i̧nä̧ jȩä̧cha̧ pä'ö. Ja̧'hua̧nö ja̧'a̧ttö̧ päcäyärumä̧ cuä'ö icuä pä'ö ja̧'a̧ chutä surönä̧ jȩä̧ji̧ jȩcha̧rö̧ pä'ö. ¹² Aarónmä̧ TÖ̧Ä̧NÄ̧HUA̧ ä'ca jo̧mȩ ko̧ca̧ ku icu iyähuomettö̧ incienso ȩnä̧huäba ȩmo̧po̧'ö̧ ppusi icua pä'ö ja̧'a̧ incienso i̧sa̧ppȩ kärö i̧cuä̧hua̧ppä̧ adiu a̧da̧ppȩ u̧mö̧nä̧ i'cächa pä'ö tto̧ȩcuä̧ta̧ abo ja̧'a̧cu̧. ¹³ Juorötä ja̧u̧ inciensomä ocuränä öta pä'ö ja̧'a̧ TÖ̧Ä̧NÄ̧HUA̧ ä'ca jo̧mȩ incienso isoppa esecu jȩtta̧ pä'ö hueinö ȩco̧ca̧ möecuäbi a̧ttä̧di̧'ö̧nä̧. Ja̧u̧mä̧ pi̧yȩ jȩa̧ pä'ö ji̧na'a̧ 'corujuoächö juiya pä'ömä̧. ¹⁴ Ja̧'hua̧nö̧ jö̧ttö̧mä̧, ja̧u̧mä̧ ȩmu̧'a̧nö̧ ja̧'a̧ a̧u̧cu̧nä̧ toro ucuojattö ödochenä riripäö surojö micuächa päö iyähuome mi̧ȩhuäbi uttä. Ja̧u̧mä̧ ucuoja a̧u̧cu̧nä̧ ȩmu̧ ödochenä 'cuhuecu ri̧ri̧'anö ja̧'a̧ ji̧mu̧tȩttö̧ todäre jo̧mȩnä̧ surojö micuähuächa päö miecuäbi juttä. ¹⁵ Ja̧u̧nu̧ o'ca'a ja̧u̧mä̧ cabra uborö cuäö icu'anö ja̧'a̧ ttö̧ja̧ suronä jȩttö̧ mi̧cuächönä iyähuä päiönä ja̧'hua̧ta̧'a̧nö̧ ucuoja ö'cächöanö ja̧'a̧ jacuojunä tto̧ȩcuä̧ta̧ ko̧mȩcu̧. Juorötä toro ucuoja jȩä̧ji̧ta̧'a̧nä̧ jȩ'a̧ päö ja̧'a̧: Ja̧u̧tä̧ riri'apäö ja̧'a̧ surojö micuähuächa päö mi̧ȩhuäbi juttä'inä ja̧'hua̧ta̧'a̧nö̧ ä,cacu'inä. ¹⁶ Ja̧u̧tä̧ jȩa̧ päö ja̧'a̧ juiyó ro̧mȩttö̧mä̧ surojö micuähuächa̧ pä̧ö̧mä̧ Israel ttö̧ja̧ jȩttä̧'chö̧ micuä päiönä, ja̧'hua̧ta̧'a̧nö̧ jarodä'chö jȩttö̧i̧nä̧ o'cajuiyönä surojö ttu̧ju̧nä̧rö̧'i̧nä̧. Pi̧yȩmä̧ ja̧u̧tä̧tä̧ jȩä̧cuä̧ TÖ̧Ä̧NÄ̧HUA̧CU̧ ucuocuähuäcuodettö jacuätucutä ö̧ja̧'a̧ttö̧, surojö jȩttö̧'i̧nä̧ ä'ca jo̧mȩttö̧tä̧ jȩpä̧ttö̧. ¹⁷ Ya̧tȩ'i̧nä̧ jö̧ja̧ pä'ömä juiya'a huȩnȩ u̧cuo̧cuä̧cuä̧huo̧ca̧nä̧mä̧ Aarón doächomenä suronä jȩttö̧ micuä päi'önä iya pä'ö surojö jui̧'a̧ ä'cajo̧mȩ, jo̧mȩnö̧ cä'ädö räopomejubu suronä jȩttö̧ micuä päi'önä iyö o'ca'a chutä i̧mi̧nä̧'i̧nä̧ ja̧'hu̧ta̧'a̧nö̧ chutä ahuaruhuä ti̧mi̧nä̧'i̧nä̧, ja̧'hua̧ta̧'a̧nö̧ o'catoi'önä Israäel ttö̧ja̧ ti̧mi̧nä̧'i̧nä̧. ¹⁸ Ja̧u̧mä̧ rä̧o̧pä̧cua̧ TTÖ̧Ä̧NÄ̧HUA̧RÖ̧ ttiäre ku iyähuomettö̧ ja̧'hua̧nö̧ jȩpö̧ chutä su̧ro̧nä̧ jȩö̧ micuä'inä iyipö, ja̧'hua̧ta̧'a̧nö̧ ja̧u̧mä̧ päcäyä buó ucuojattö'inä chivo muä̧ya̧ ucuojottö'inättö̧'i̧nä̧ ȩmö̧ ttiäre ku iyähuome i̧sa̧ ä̧ja̧ i̧sä̧na̧ ko̧mȩ ppeyänä u̧ju̧nä̧cua̧. ¹⁹ Ja̧u̧mä̧ ri̧ri̧ä̧cua̧ ödö'chenä̧tä̧ ja̧u̧ru̧ ucuojamä̧, ji̧mu̧tȩ ta'arenö jo̧mȩ töcächi'ome jubu, TÖ̧Ä̧NÄ̧HUA̧ iäre 'quȩ'ȩpö̧ ku̧nö̧, ²⁰ Ja̧u̧ suronä jȩä̧ji̧ surojö jui̧yo̧ca̧tättö̧ mitäu icu o'ca'a, huȩnȩ u̧cuo̧cuä̧cuä̧huo̧ca̧, ja̧'hua̧ta̧'a̧nö̧ ttiäre ku'iyähuome'inä, ȩpö̧ i̧yä̧cua̧ cabra ubottö. ²¹ Aaronmä u̧mu̧ to̧mu̧rȩcue'ö cabra ubo unä huä̧nö̧ ja̧hua̧nö̧tä̧ ji̧'ä̧huä̧cua̧ ja̧u̧ i̧sa̧rö̧ Israél ttö̧ja̧ suronä jȩtti̧nä̧, ttöarodinö'inä, ja̧'hua̧ta̧'nö̧ yapare ttö̧ä̧nä̧hua̧rä̧ esetö ttö̧ji̧nö̧'i̧nä̧. Ja̧u̧mä̧ i̧yä̧cua̧ jahuätö suronä jȩtti̧nö̧mä̧ cabra ubo unä mȩ'ö̧, ja̧u̧nu̧ o'ca'a otó hue'ö i̧cuä̧cua̧ ja̧u̧ru̧mä̧, ya̧tȩ ubo jo̧mȩnö̧ tta̧huä̧ra̧'a̧nä̧ de'a jui̧yä̧jä̧ra̧'a̧cu̧ hue'ö icuarö pä'ö. ²² Ja̧u̧ cabra ubomä ja̧u̧nä̧mä̧ ȩpä̧cua̧ o'cajuiyönä suronä jȩtti̧nö̧ ji̧nö̧ toächomecu̧, ja̧u̧ ttö̧ja̧sa̧mö̧ i̧'cha̧'a̧nä̧ ja̧'a̧tä̧ tö̧ä̧cua̧. ²³ Ja̧'hua̧nö̧ ja̧'a̧ttö̧, Aarón ppa̧huä̧ cha̧'a̧nö̧ ja̧'a̧ Dios ö̧jodecu ö̧'ca̧tä̧hui̧yu̧ ko̧sä̧'u̧ uta pe'ö surojö ju'i̧yo̧ca̧ ä'ca, jo̧'ú̧mä ö̧'ca̧tä̧huä̧ti̧yu̧mä̧ ju̧'ȩnȩtä̧ uti'a pe'ö ki̧na'a̧. ²⁴ Jo̧'ú̧mä idepämä ajiyanä ötöcähuä pe'ö ka̧'a̧ surojö ju'i̧yo̧ca̧ttö̧, ja̧'hua̧nö̧ ja̧'a̧nä̧ ja̧'a̧tä̧ känö ö̧'ca̧tä̧huä̧ta̧ ö̧'ca̧tä̧hua̧ pe'ö ka̧'a̧ ja̧'hua̧nö̧ ja̧'a̧ttö̧ jo̧'ú̧mä rä'opa pe'ö ka̧'a̧ ja̧'hua̧ta̧'a̧nö̧ köhuicu iya pe'ö ttö̧ja̧ ttiyö, ja̧'hua̧nö̧ jȩpu̧ iyinö chutädä̧jä̧ ttö̧ja̧ ttiyödä̧jä̧. ²⁵ Jo̧'ú̧mä kuhuicu iya pe'ö ka̧'a̧ i̧'a̧dȩ surojö jȩ'ä̧cha̧ pe'ö iyähuä kuhuicu iyähuöme. ²⁶ Ttö̧ja̧sä̧ cabrarö tipächa'a ja̧'a̧tä̧ to'öttömä ö̧'ca̧tä̧huä̧ta̧ öttöca pe'ö ka̧'a̧ ja̧'hua̧ta̧'a̧nö̧ idepädä̧jä̧ ajiyanä ötöcähua pe'ö ka̧'a̧, ja̧'hua̧nö̧ ja̧'a̧ttö̧ jo̧'ú̧mä̧ ppa̧huä̧cha̧ pe'ö ka̧'a̧ a'ahuäräcu. ²⁷ Päcäyärö'inä, cabrarö'i̧nä̧ surojö jȩttä̧ji̧ jähuänä iyähuotö jö̧nä̧ jahuätö ttucuoja surojö jȩä̧cha̧ pä'ö rö̧ä̧nä̧ ro̧o̧mȩcu̧ jahuätö ttucuoja ttȩpä̧joyamä̧, ä'ö kä̧cuä̧huo̧mȩttö̧mä̧ umicu ȩcuä̧cuo̧ya. Juorötä ku icuähuäcua'a ö̧jä̧pi̧yä̧'i̧nä̧, idepä'i̧nä̧ ja̧'hua̧ta̧nö̧ u̧huä̧si̧yö̧'i̧nä̧. ²⁸ Ja̧u̧ ku icuäjimä̧ ö̧'ca̧tä̧huä̧ta̧'i̧nä̧ töcö icu kä̧nö̧ aje'i̧nä̧ i'ö icuä̧cua̧; ja̧'hua̧nö̧ jȩpi̧'ö̧'ca̧tä̧ ä'ö kä̧cuä̧huo̧mȩcu̧mä̧ do̧ä̧chä̧cua̧. ²⁹ Pi̧yȩ huedömä̧ 'cuäopönä̧tä̧ jȩ'cuä̧tu̧cua̧ pä'ö jä̧cuȩ kä̧hua̧tö̧ sietenö huotö päi'omenämä, ja̧u̧ kä̧hua̧ttö̧ Mo̧ro̧mä̧ to̧mö̧rȩ mo̧ro̧ päi'omȩnä̧, ucututä'i̧nä̧, Israel ttö̧ja̧'i̧nä̧ ja̧'hua̧ta̧nö̧ ko̧ro̧jä̧ra̧'a̧ttö̧ ichäcuähuotö ucutucu ka̧cuä̧tö̧'i̧nä̧, ucuo'inä tecuähuätucuoca'a ja̧'hua̧ta̧nö̧ cuäditähuätucu'i̧nä̧ aditocotö cuäcuotöjä̧. ³⁰ Ja̧u̧ mo̧ro̧mä̧ TÖ̧Ä̧NÄ̧HUA̧ ä'cajo̧mȩttö̧ surojö jȩ'cuä̧'i̧jä̧tu̧cu̧mä̧ jȩä̧chä̧cuä̧u̧jä̧ ja̧'hua̧nö̧ jo̧mȩnä̧ adihuätötä päcui'äcuotöjä̧. ³¹ Ja̧u̧ mo̧ro̧mä̧ 'cuä'ächi'ö pä̧cuä̧huä̧ mo̧ro̧ jä̧cua̧'a̧ ja̧'hua̧nö̧ ja̧'a̧ttö̧ ucutumä cua̧mö̧ pa̧ja̧tö̧mä̧ ucuomä tecuähuätucuoca'a ja̧'hua̧ta̧nö̧ cuäditähuätucu'i̧nä̧ aditocotö cuäcuotöjä̧. Pi̧yȩ huedömä̧ 'cuäopönä̧tä̧ kä̧cua̧'a̧ ucutu cu̧'cä̧tȩtu̧cu̧nä̧mä̧. ³² Sacerdotettö juȩ'i̧pa̧ jö̧nä̧ da'epö pojopö ku̧nä̧hua̧mä̧ ja̧'hua̧ta̧'a̧nö̧ juȩ'i̧pa̧ sacerdote jö̧nä̧ hue'ö ku̧nä̧hua̧ jä'o aditä'ijome aditä̧cua̧mä̧, suronä jȩttö̧ jȩä̧chö̧nä̧ pä'ö ja̧'a̧ ja̧'hua̧ta̧'a̧nö̧ lino pö̧jä̧ta̧ttö̧ ö̧'ca̧tä̧hua̧ pä'ö ja̧'a̧, ja̧u̧ o̧ta̧mä̧ ro̧ö̧ o̧ta̧ jä̧cua̧'a̧. ³³ Ja̧u̧mä̧ rö̧ä̧nä̧ ro̧o̧mȩttö̧ suronä jȩttö̧mä̧ jȩpö̧ icua pä'ö ja̧'a̧; ja̧'hua̧ta̧'a̧nö̧ sacerdotetö̧'i̧nä̧ juhua'atäcu ttö̧ja̧ o'catoi'önä suronä jȩttö̧mä̧ jȩä̧chö̧nä̧ jȩa̧ pä'ö ja̧'a̧. ³⁴ Pi̧yȩmä̧ ucuru hueähui'ö ja̧'a̧, Israel ttö̧ja̧ o'catoi'önä suronä jȩttö̧ jȩä̧chö̧nä̧ jȩ'cua̧ pä'ömä, a̧'ȩttö̧mä̧ ya'utenä̧tä̧." Pi̧yȩmä̧ jȩpi̧nö̧ TÖ̧Ä̧NÄ̧HUA̧ Moisésrö hueinö ta'anötä̧.