¹ TÖ̧Ä̧NÄHUA̧ ucuocuinö Moisesrö ji'ähuinö. ² Pi̧yȩ ja̧'a̧ hue'ähuä huȩnȩttö̧ na'ä̧chä̧tö̧rö̧ ttädita pä'ö jö̧ moró̧. Ja̧u̧ru̧mä̧ sacerdote ö̧jö̧mȩ ttȩpi̧nä̧cu̧. ³ Sacerdote ttä'ähuarättö rä'opä̧cua̧ usähuönö to'a pe'ö ttö̧ja̧sä̧rö̧ i̧jȩtä̧nä̧ 'cu'ä'ipu nahuä̧chä̧ji̧ i'ipä̧ja̧ pä'ö. ⁴ Ja̧'hua̧nö̧ ja̧'a̧ttö̧ sacerdote huȩ'ä̧cua̧ aditicuä hua̧rö̧mä̧ iya pä'ö ppi̧yu̧ ta̧ju̧rö̧ hue'inä'u̧ttö̧, cedro da'uttö'i̧nä̧, pu̧jä̧'quȩ tu̧huä̧'quȩ'i̧nä̧ ja̧'hua̧ta̧'a̧nö̧ isä'cu'a a̧dö̧nä 'chopä'cu'inä. ⁵ Sacerdote huȩ'ä̧cu̧'a̧ cu'ätta pä'ö ya̧tȩ ppiyuhuärö 'cä̧näri̧yu̧nä̧ acuoyacu. ⁶ Sacerdotemä ppiyuhuä a̧'cua̧ra̧rö̧ ȩmö̧ kä̧nö̧ cedro dau'inä ȩmä̧cua̧ ja̧'hua̧ta̧'a̧nö̧ isappä tuhuappä'inä juhuatäcu hisopo i̧so̧'quȩ'inä ja̧'hua̧nö̧ ja̧'a̧ ja̧u̧mä̧ ja̧u̧ o'cajuiyönä u'utädäcua̧, ppiyuhuä a̧'cua̧ra̧rö̧'inä, ppiyuhuä ajiyanä cuä'ö tticuäjäcu ucuojanä. ⁷ Ja̧u̧nu̧ o'ca'a sacerdotemä ttö̧ja̧sa̧ umärichei jȩä̧chä̧cua̧rö̧ sietenö jo̧mȩnä̧ ririä̧cua̧ ja̧'hua̧nö̧ jȩpi̧'ö̧'ca̧ sacerdotemä pä̧cua̧ pidemä suropocö pä'ötä. Ja̧u̧nu̧ o'ca'a sacerdotemä ppiyuhuä a̧'cua̧ra̧rö̧mä̧ huäjuarä jo̧mȩttö̧ co'epö i̧cuä̧cua̧. ⁸ Ttö̧ja̧sa̧ surojö jȩä̧chä̧jä̧cu̧mä̧ ö̧'ca̧tä̧huä̧ti̧yu̧ töcö kä̧nö̧'inä uhuo'che'inä 'cui'äu i̧cuä̧cua̧ ja̧'hua̧ta̧'a̧nö̧ aje i'ö i̧cuä̧cua̧ ja̧'hua̧nö̧ jo̧mȩnä̧ ja̧u̧mä̧ umäricheimä jui̧'a̧tä̧ ö̧jä̧cua̧. Ja̧u̧nu̧ o'ca'a ä'ö kä̧cuä̧huo̧mȩcu̧ icha'anä ojusodettömä u̧mi̧tä̧ sietenö mo̧ro̧ jo̧mȩnä̧ ö̧jä̧cua̧. ⁹ Siete mo̧ro̧ päi'omenä uhuo'chemä o'cajuiyönä̧tä̧ 'cui'äu icua pä'ö jä̧cua̧'a̧ ja̧'hua̧ta̧'a̧nö̧ ä 'cähuiyä'che'inä, iöäre huä̧mȩ isä'che'inä. Uhuo'chemä o'cajuiyötä 'cui'äu icua pä'ö ja̧'a̧ ja̧'hua̧ta̧'a̧nö̧ ö̧'ca̧tä̧huä̧ti̧yu̧'inä tö̧cö̧ kä̧nö̧ aje i̧'ö̧ icuäcua; ja̧'hua̧nö̧ jȩo̧mȩnä̧ ja̧u̧mä̧ surojumä jui̧'a̧tä̧ ö̧jä̧cua̧ ¹⁰ Ochonö mo̧ro̧ päi'omenä ja̧u̧mä̧ ȩma̧ pä'ö jä̧cua̧'a̧ ovejastö̧ u̧mä̧tö̧ ta̧ju̧rö̧ ttöttahuiyä'inä jui'ätörö'inä, oveja kittiju ya'ute a̧'ȩtä̧ ku̧nä̧rä̧ju̧ kuttahuiyä jui'ajurö ja̧'hua̧ta̧'a̧nö̧ trigo i̧sa̧ppȩ a̧dȩjacu huihuacua'a 11.1kg jo̧mȩnä̧ ja̧ppȩ'i̧nä̧, u̧huä̧ju̧ otettö ku icu iyähuä'inä ja̧'hua̧ta̧'a̧nö̧ a̧dȩjamä yo̧'ta̧tȩ jo̧mȩnä̧. ¹¹ Sacerdotemä umärichei jȩä̧chä̧jä̧cu̧ru̧mä̧ iya pä'ö jȩpö̧ u̧ju̧nä̧ji̧cu̧ TÖ̧Ä̧NÄ̧HUA̧ ä'ca jo̧mȩ ȩpö̧ u̧ju̧nä̧cua̧, ca̧ca̧cu̧ pä̧cuä̧huode doächi'äcuähuomecu̧. ¹² Sacerdotemä ovejastö̧ttö̧ ya̧tȩ ȩmo̧po̧'ö̧ suronä ö̧ji̧pä̧ji̧ jähuänä iya pä'ö jä̧cua̧'a̧, a̧dȩja a̧cuo̧'ta̧cu̧; ja̧u̧mä̧ TÖ̧Ä̧NÄ̧HUA̧ ä'ca jo̧mȩttö̧ iya päjimä ihui'cuäcua̧. ¹³ Ja̧u̧mä̧ ovejas uborömä ä̧tȩcuä̧nä̧ suronä jȩttö̧ micuä jö̧nä̧ i̧yä̧huo̧tö̧rö̧ cuähuomettö̧ cuä'ö icua pä'ö jä̧cua̧'a̧ ja̧'hua̧ta̧'a̧nö̧ ku icu iyähuä'inä, ca̧ca̧cu̧ pä̧cuä̧huo̧mȩ isarättö, ja̧'hua̧nö̧ ja̧'a̧ suronä jȩttö̧ micuä jö̧nä̧ iyähuämä sacerdote päi'önä hua̧tä̧ i̧yä̧cua̧, ja̧'hua̧ta̧'a̧nö̧ suronä jȩttä̧ji̧ huȩnȩcuä̧chä̧ji̧ jähuä'inä, ja̧u̧ rö̧ä̧nä̧ ro̧ö̧ jo̧mȩttö̧. ¹⁴ Sacerdotemä̧ suronä jȩttä̧ji̧ huȩnȩcuä̧chö̧nä̧ iyähuä i̧sa̧ ucuoja a̧'u̧cu̧nä̧tä̧ ȩmo̧po̧'ö̧ ja̧'hua̧ta̧'a̧nö̧ suronä jȩä̧ji̧ jȩä̧chä̧jä̧cu̧ ä̧ja̧ i̧sä̧tti̧nä̧ tu̧huȩpä̧cua̧, u̧mö̧ u̧huo̧jua̧'a̧cu̧nä̧ udo'che u'ca ja'chenä'inä, ö̧jä̧pö̧ttö̧ udo'che rö̧a̧'chenä'inä. ¹⁵ Ja̧'hua̧nö̧ ja̧'a̧ Sacerdotemä i̧so̧'ta̧ttö̧ a̧dȩja ȩmo̧po̧'ö̧ chutä u̧mö̧ ö'ohuecunä̧ i̧sä̧mö̧ jacuä da̧huȩcuä̧cua̧ ¹⁶ ja̧'hua̧nö̧ da'ecu udo'che umö u̧huo̧jua̧'a̧cu̧nä̧ isa'che u'utä̧dä̧cua̧, u̧mö̧ ö'ohuecunä jacuä acuoyanä, ja̧'hua̧nö̧ jȩpö̧ adeja̧mä̧ a̧'u̧cu̧nä̧tä̧ TÖ̧Ä̧NÄ̧HUA̧ ä'ca jo̧mȩttö̧ sietenö jo̧mȩnä̧ riähuä̧cua̧. ¹⁷ Sacerdotemä a̧dȩja umö jacuä acuipäjoyamä suronä jȩä̧ji̧ jȩä̧chä̧cua̧ äja i̧sä̧tti̧nä̧ tu̧huȩpä̧cua̧, u̧mö̧ u̧huo̧jua̧'a̧cu̧nä̧ udo'che ö'ca ja'chenä'inä, ja̧'hua̧ta̧'a̧nö̧ ö̧jä̧pö̧ u̧huo̧jua̧'a̧cu̧nä̧ i̧sä̧mö̧ttö̧ udo'che rä̧a̧'che huäme'inä. A̧dȩjamä i̧sa̧ ucuoja suronä jȩttö̧ jȩpö̧ icuoya huä̧mȩ öta pä'ö jä̧cua̧'a̧. ¹⁸ I̧sa̧ ucuo sacerdote umö jacuä acuipäjoyamä, suronä jȩä̧ji̧ jȩä̧chä̧cu̧ unä da̧huȩpä̧cua̧ ja̧'hua̧nö̧ jȩpö̧ sacerdote TÖ̧Ä̧NÄ̧HUA̧ to̧ä̧ro̧mȩttö̧ ja̧u̧ suronä jȩä̧ji̧mä̧ jȩpö̧ i̧cuä̧cua̧. ¹⁹ Ja̧hua̧nö̧ ja̧'a̧ttö̧ sacerdotemä ja̧u̧ surojö u̧ju̧nä̧rö̧ mihuähuächönä öäre iyähuä i̧yä̧cua̧ ja̧u̧nä̧, ja̧u̧ surojö märicheittö u̧ju̧nä̧ro̧mȩttö̧ a̧di̧hua̧tä̧ päi'önä, ja'huanö jö̧ o'ca'amä ja̧u̧tä̧ cuäö icuä̧cua̧ i̧sa̧rö̧ ku'icu iyähuä iyapäö. ²⁰ Ja'hua̧nö̧ ja̧'a̧ttö̧ sacerdotemä ku icu iyähuä i̧yä̧hua̧ jahua jö̧ta̧'a̧nö̧ o̧tȩ jö̧'i̧nä̧ öäre iyähuä i̧yä̧hua̧ ku'icu iyäcuä'ca ko̧mȩttö̧mä̧. Sacerdotemä ja̧u̧ surojö u̧ju̧nä̧rö̧ rä'ochönä jȩä̧hua̧ ja̧hua̧'a̧nö̧ jo̧mȩnä̧tä̧ surojö jui'a̧ päi'äcua̧. ²¹ Ja̧'hua̧'a̧nö̧ ja̧'a̧nä̧, ya̧tȩ usurä i̧sa̧ jö̧ttö̧mä̧ pi̧yȩ cuä'ö icu iyähuä mi̧ttö̧ ȩmu̧ juiyönä hua̧, ja̧'hua̧'a̧nö̧ jö̧ttö̧mä̧ ja̧u̧mä̧ ȩmu̧'anö ja̧'a̧ ya̧tȩ oveja uborö öäre iyähuä iyapäö surojö u̧ju̧nä̧rö̧ mi̧cuähuächi yarö päömä, a̧mo̧nä̧tä̧ surojö u̧ju̧nä̧rö̧ rä'opu icuähua'anö ja̧'a̧, ja̧'hua̧ta̧'a̧nö̧ 3.7kg. jo̧mȩnä̧ harina adiunä sä̧yu̧hua̧ppȩ a̧dȩcu̧ huihuatö i̧hua̧ppȩ iyö anö ja̧'a̧ iäre iyähuä päiönä o̧tȩ ju̧cu̧mä̧ ja̧'hua̧ta̧'a̧nö̧ yaute litro a̧dȩ i̧nä̧. ²² Ja̧'hua̧'a̧nö̧ ja̧'a̧nä̧'i̧nä̧ ji̧nä̧ yo̧mȩtȩnä̧ ta̧ju̧ duo a̧ji̧mu̧rö̧ jö̧ttö̧'inä ta̧ju̧ u̧nu̧cu̧ru̧ muäyottötö jö̧ttö̧'inä, chutä ö̧'o̧hui̧'a̧nö̧ jo̧mȩtä̧, ya̧tȩ co'örömä surojö mihuä päi'önä i̧yä̧huacua̧ ja̧'hua̧ta̧'a̧nö̧ ka̧ra̧mä̧ ku'icu i̧yä̧huä̧cua̧. ²³ Ji̧mu̧tȩttö̧ huäbo'acuä mo̧ro̧ päi'omenä ja̧u̧mä̧ i'cächö'anö ja̧'a̧ sacerdote hua̧ tö'cö icua päö, huȩnȩ ucuocu doächähuähuomettö̧ TÖ̧Ä̧NÄ̧HUA̧ a'ca jo̧mȩttö̧. ²⁴ Sacerdote hua̧mä̧ oveja i̧tti̧ttö̧ ȩmä̧cua̧ ttiäre iyähuä iya pä'ö, ja̧'hua̧ta̧'nö̧ ja̧u̧nä̧ ȩmä̧cua̧ ya'ate litro oliva a̧dȩttö̧, ja̧u̧mä̧ ju'tojucu cä'epö i̧jȩpä̧cua̧ TÖ̧Ä̧NÄ̧HUA̧RÖ̧. ²⁵ Oveja i̧tti̧rö̧ cuä'ö i̧yä̧cua̧ suronä jȩttö̧ micuä päi'önä, ja̧'hua̧ta̧'a̧nö̧ ucuojattö'inä ji̧'qui̧cha̧nö̧ ȩmö̧ ttiäre iyähuä i̧yä̧cua̧ suronä jȩttö̧ micuä päi'önä ja̧'hua̧nö̧ jȩpö̧ tu̧huȩpä̧cua̧ ä̧ja̧ u̧huo̧jua̧'a̧nä̧ i̧sä̧tti̧nä̧ suronä jȩä̧cuä̧huä̧ i̧jȩcuä̧ päi'önä, ja̧'hua̧ta̧'nö̧ u̧mö̧ttö̧ u̧huo̧jua̧'a̧nä̧ ödo'che u'caja'chettö'inä ja̧'hua̧ta̧nö̧ ö̧jä̧pö̧ttö̧ u̧huo̧jua̧'a̧nä̧ ödo'che u'caja'chettö'inä. ²⁶ Ja̧u̧nu̧ o'ca'a sacerdote hua̧ chutä u̧mu̧ ö'ohue ja̧'a̧nä̧ a̧dȩja dä̧huȩpäcua, ²⁷ ja̧u̧nu̧ o'ca'a u̧huä̧ja̧'a̧nä̧ttö̧ ödo'chiyänä ri̧ri̧ä̧cua̧ ji̧'qui̧cha̧nö̧ a̧dȩja ö'ohue ja̧'a̧nä̧ ji̧mu̧tȩ ta'arenö jo̧mȩnä̧ TÖ̧Ä̧NÄ̧HUA̧ ä'cajo̧mȩttö̧. ²⁸ Sacerdote a̧dȩja tu̧huȩpä̧cua̧ aditö tti̧cuä̧cua̧rö̧ ä̧já̧ dȩ'ä̧nä̧ 'cu̧'ä̧rá̧ jo̧mȩ ja̧'hua̧ta̧'a̧nö̧ u̧mú̧ u̧hu̧ó̧ju̧'a̧nä̧ ö'caja'chenä ö̧jä̧pö̧ u̧huo̧jua̧nä ö'caja'chenä ja̧'hua̧ta̧'a̧nö̧ utäme ucu'oja ku icu iyähuome suronä jȩ'ä̧ji̧. ²⁹ Ja̧u̧ tuhue pa'anä ki̧'ä̧ji̧mä̧ tuhuepä̧cua̧ a̧dȩ́ aditö i̧cu'ä̧huä̧cua̧ unä ja̧'hua̧nö̧ jo̧'u̧ i̧yä̧cua̧ TÖ̧Ä̧NÄHUA̧ ö̧jo̧mȩ. ³⁰ Ja̧'ú̧ i̧yä̧cua̧ yä̧tȩ unucu mu'ä̧yä̧ttö̧, ja̧'hua̧nö̧ ja̧'a̧ttö̧ ttö̧ja̧sä̧mä̧ u̧ju̧nära̧ pä'ö ja̧'a̧. ³¹ Ya'utemä suronä jȩ'ä̧ji̧ iyähuä koromä ku'icu iyähuä, ja̧u̧tä̧cu̧ u̧huä̧ju̧ oba iyähuä. Ja̧'hua̧nö̧ ja̧'a̧ttö̧ sacerdote i̧yä̧cua̧ iyäji TÖ̧Ä̧NÄHUA̧ ö̧jo̧mȩ. ³² Pi̧yȩ́ ja̧'a̧ huedömä̧ yä̧tȩ yoähuä chöttö na'a̧'chö̧rö̧ 'cu'ä'ipurö i̧jȩta̧nä̧, mitö ȩmä̧ji̧ ju'i̧'a̧rö̧ hue'inö aditö tticu'arö pä'ö. ³³ TÖ̧Ä̧NÄ̧HUA̧MÄ̧ Moiséscu'inä, Aaróncu'inä ucuocumä pä'inö: ³⁴ Canáan rȩjȩnä̧ docuächi'ätucuomenä ucutu cui̧rȩjä̧tu̧cu̧ päi'önä chiyinome ja̧'hua̧ta̧'a̧nö̧ cuojusodenä temörȩyu̧ jö̧ rö̧ä̧chö̧ttö̧mä̧ cu̧jä̧tu̧cuä̧jä̧ttö̧, ³⁵ ja̧'hua̧nö̧ jo̧mȩnä̧ ojusode päi'önä hua̧mä sacerdoterö ji'äu icha pä'ö jä̧cua̧'a̧. Ja̧u̧mä̧ pä̧cua̧: Chojusode tȩmö̧reyu jö̧ räopäjiyäcusä. ³⁶ Ja̧u̧nu̧ o'ca'a sacerdote huȩä̧cua̧ isode jacuä ka̧cu̧mä̧ rä'epö tticua pä'ötä, temäreyu jö̧ toäcua'a ä'canämä, juhuode isode surojode jö̧nä̧ ki̧'ö̧ juiyäcua'anö̧. Ja̧u̧nu̧ o'ca'atä sacerdotemä do̧ö̧chä̧cua̧ isode usähua pä'ömä. ³⁷ Ja̧u̧mä̧ u̧sä̧huä̧cua̧ temöreyu jö̧mä̧ isode tto'epö tätähuäbänä ka̧ pä'ö ja̧'hua̧ta̧'a̧nö̧ ja̧'tu̧huö̧nä̧'i̧nä̧ ja̧'a̧nä̧ tuhuoppunö isode tto'epö tätähuäbä huä̧mȩnä̧tä̧ ka̧ pä'ö. ³⁸ Isodenä temöreyu jö̧ kö̧ttö̧mä̧ sacerdotemä rä'opächö kä̧nö̧ mö̧'ȩpö̧ i̧cuä̧cua̧ äpatemä siete mo̧ro̧ jo̧mȩnä̧. ³⁹ Ja̧'hua̧nö̧ ja̧'a̧ sacerdotemä sietenö mo̧ro̧ päi'omenä pä'äjita'anö ppa̧huä̧chä̧cua̧, ja̧'hua̧nö̧ ppa̧'ä̧chi̧'ö̧ isode räbänä temöreyu jö̧mä̧ yabonö rö̧ä̧cha̧ja̧ pä'ö u̧sä̧huä̧cua̧. ⁴⁰ Rö̧ä̧chä̧ji̧ttö̧mä̧, sacerdotemä jahuätörö inä o'qui tȩmö̧reyu jo'qui juhuȩnȩ pȩju̧mä̧ ötahuiyättömä̧ jäyäcu ȩmi̧pö̧ surojomȩcu̧ do'opö tticua pä'ö huȩä̧cua̧, ⁴¹ Ja̧u̧mä̧ isode räbänä temöreyu jö̧mä̧ quirö tticua pä'ö huȩä̧cua̧, ja̧'hua̧ta̧'a̧nö̧ jahuätömä quirö tti̧cuä̧jä̧ppȩmä̧ ötahuiyättö umicu̧ rä'epö icu suroju icuähuometä̧ icu tticuäcuotö. ⁴² Jahuätömä koro inä o'qui ȩmo̧po̧'ö̧, ȩmö̧ tticuäji o'qui ka̧cuä̧jo̧mȩ ttu̧ju̧nä̧cuo̧tö̧ ja̧'hua̧nö̧ jȩpö̧ redähua'inä jareähuanä tätö tticuäcuotö isodemä. ⁴³ Ido'qui tȩmö̧reyu jo'quimä̧ baropö icu isode tto'epö tätähuäbä'i̧nä̧ quirö icu tätö tticuäja'anä̧ pä'äjita'anö̧ räopöttömä̧, ⁴⁴ sacerdotemä̧ usähua pä'ö doächa pä'ö̧ jä̧cua̧'a̧, tȩmö̧reyu jö̧mä̧ isode o'cajuiyönä̧ yoähuächaja pä'ö, yoähuächäjittö ja̧u̧ surojö tȩmö̧reyu jö̧mä̧ surojuoepö jä̧cua̧'a̧ ja̧'hua̧nö̧ jo̧mȩnä̧ juodemä̧ surojode jö̧nä̧tä̧ jäcuode. ⁴⁵ Juode isodemä̧ pparopötä icuähuäcuode. Inä o'qui'inä, dau odiyä'inä ja̧'hua̧ta̧'a̧nö̧ o'cajuiyötä ötahuiyättömä̧ jäyäcu ȩmi̧pö̧ surojomȩcu̧ do'opö icuähuäcua'a. ⁴⁶ Koromä, ya̧tȩ juode mö'ȩpö̧ icuähuodenä doächöttömä̧, ja̧u̧mä̧ ni̧pä̧cho̧mȩ jubö päi'önä̧ su̧ro̧pa̧ jö̧nä̧tä̧ to̧ttä̧cua̧. ⁴⁷ Ya̧tȩ juodenä ä'äjittömä ö̧'ca̧tä̧huä̧ti̧yu̧mä̧ töcö icua pä'ötä jö̧cua̧'a̧ ja̧'hua̧ta̧'a̧nö̧ juodettö u̧cuȩ ucuttu ö̧'ca̧tä̧huä̧ti̧yu̧mä̧ töcö icua pä'ötä jä̧cua̧'a̧. ⁴⁸ Sacerdote hua̧ isodenä doächö usähuomenämä toa päö jä̧'hua̧'a̧ märichei isode jahuänä ri̧ä̧cha̧ ja̧ päö isode a̧ttö̧ tti̧huäji'o'ca'a, märichei jä̧ji̧ juiya jö̧ttö̧mä̧, ja̧u̧tä̧ pä̧hua̧ isodemä tä'cö märichei juiyode. ⁴⁹ Ja̧'hua̧ta̧'a̧nö̧ sacerdote hua̧mä ȩmu̧'anö ja̧'a̧ co'ättötö ta̧ju̧ru̧ isode töcö icua'päö, ja̧'hua̧ta̧'a̧nö̧ cedro i̧so̧'quȩttö̧'i̧nä̧ ja̧'hua̧ta̧'a̧nö̧ isappä

säröcänö jappä'inä ja̧'a̧nä dau isade'inä.

⁵⁰ Ja̧u̧tä̧ cuä'ö i̧cuä̧cua̧ co'ätöttö ya̧tȩro̧mä̧ 'cä̧nä̧ri̧yu̧nä̧ ajiya diyaunä acuomettö. ⁵¹ Ja̧u̧tä̧ cedro i̧so̧'quȩ 'chu̧huä̧dä̧cua̧'i̧nä̧, dau isade'inä, pö̧jä̧ isappä sä̧rö̧cä̧nö̧ jappe'inä, ja̧'hua̧ta̧'a̧nö̧ co'öttö a̧'cua̧rö̧rö̧mä̧ 'corujuo'ächäji ucuojattö pu̧tä̧dä̧cuä̧huä̧cua̧, ajiya diyähuoyatö, ja̧'hua̧nö̧ jȩpu̧ isode ri̧ri̧'ä̧hua̧ ji̧mu̧tȩ todärenö jo̧mȩnä̧. ⁵² Ja̧u̧ma̧ isotö co'ätö ttucuojatö ö̧tö̧cä̧cua̧ ojusodemä ja̧'hua̧ta̧'a̧nö̧ ajiya diyähuoyanä'inä, ppi̧yu̧ a̧'cua̧rä̧tö̧nä̧'i̧nä̧, cedro dau isodättö'inä, isade a̧dö̧nä̧ 'chopade'inä ja̧'hua̧ta̧'nä̧ isappä tuhuappä'inä. ⁵³ Ja̧'hua̧nö̧ ja̧'a̧ttö̧ ja̧u̧mä̧ cottächönä jȩä̧cua̧ ötahuiyättö'inä oto de'atä päi'ome. Pa̧'a̧nö̧ jo̧mȩnä̧tä̧ ojusode jacuättömä surojönä̧ jȩtti̧nö̧mä̧ si'epö icuähuotö täcuotö, surojö'inä juyiyönätä̧. ⁵⁴ Pi̧yȩ ja̧'a̧ hueähuä̧ huȩnȩmä̧ o'cajuiyönä ti̧jȩta̧ märicheitö yoähuächönä jö̧ttö̧mä̧ ja̧'hua̧ta̧'a̧nö̧ mä̧richeittö kada'cajuome'inä, tti̧jȩta̧ i'quiunä jo̧'i̧nä̧, ⁵⁵ ja̧'hua̧ta̧nö̧ ttö̧'ca̧tä̧hu̧yä̧ta̧nä̧ rö̧jä̧mä̧tö̧'i̧nä̧ ttojusode jacuä'inä, ⁵⁶ jö̧ttä̧mö̧'i̧nä̧, o̧ppä̧ räö'inä ja̧'hua̧ta̧'a̧nö̧ säröcänö idicu'inä, ⁵⁷ kättädäcuähuäcuotö pi̧yȩ märicheittö surojö adiu pä'ömä. Pi̧yȩ ja̧'a̧ hueähuä̧ huȩnȩmä̧ o'cajuiyönä ti̧jȩta̧ märicheitö yoähuächönä jö̧ttö̧mä̧"