¹ TÖ̧Ä̧NÄ̧HUA̧ ucuocuinö Moisésrö ja̧'hua̧ta̧'nö̧ Aarónrö'inä pa̧'a̧nö̧ pä'ö: ² Ya̧tȩ i̧jȩta̧nä̧ märichei jö̧'ä̧mu̧nä̧ u̧ju̧nä̧rö̧ttö̧mä̧ ja̧'hua̧ta̧'nö̧ i̧jȩta̧ obinä jö̧ttö̧'i̧nä̧ ja̧'hua̧ta̧'nö̧ idepänä teru'cuanö jö̧ttö̧ ja̧u̧ märichei boipö'anö jö̧ttö̧mä̧ jua'amä idepänä merichei ka̧'a̧, Ja̧'hua̧nö̧ jo̧mȩnä̧mä̧ sacerdotettö ttu̧ru̧hua̧ Aarón jö̧jo̧mȩcu̧ ȩpä̧tu̧cui̧, ja̧'hua̧nö̧ jo̧ juiyöttömä ȩpä̧tu̧cui̧ sacerdote hyuotö tti̧ti̧mö̧ ttö̧jo̧cuo̧mȩcu̧. ³ Ja̧u̧nu̧ o'ca'a sacerdote hua̧mä̧ u̧sä̧huä̧cua̧ idepänä i̧jȩta̧ märichei. Juorö uhuo'che teä'che kö̧ttö̧mä̧, Ja̧'hua̧ta̧'nö̧ i̧jȩta̧nä̧ märichei jacuänänö jö̧ttö̧mä̧, ja̧u̧ maricheimä yabocutä yoähuächö'anö jö. Sacerdote hua̧ usäu o'ca'amä, ja̧u̧ma̧ ji̧ä̧huä̧cua̧ ja̧u̧ märucheimä surojuoepö ja̧'a̧ pä'ö. ⁴ Cui̧jȩta̧nä säröcänö huȩyu̧'u̧nä̧ jo̧ te'öttömä, ja̧'hua̧nö jö̧ tti̧jȩtä̧ jacuänä jö̧ juiyönä jö̧ttö̧mä̧ ja̧'hua̧ta̧'a̧nö̧ märichei ko̧mȩ ttuhuo'che te'ipö juiyöttömä, Ja̧'hua̧nö̧ jo̧mȩnä̧mä̧ sacerdote hua̧mä̧ ji̧mu̧tȩ ta'arenö mo̧ro̧ jo̧mȩ kä̧'ȩpö̧ pporädö u̧ju̧nä̧cua̧. ⁵ Ji̧mu̧tȩ jähuä koromuttö̧nö̧ ta'are jo̧mȩnä̧ moró̧ pä'i'omenä, sacerdote usähuinö̧ umäriche'i yabonö jo'ächa pä'ö ja̧'hua̧nö̧ ja̧'a̧nä̧ ji̧nä̧ juȩnȩtä̧ jö̧ttö̧mä̧. Sacerdote ji̧nä̧ iya'anö ja̧'a̧ moró̧ koromuttö̧nö̧ ta'are jo̧mȩnä̧. ⁶ Pä'ä jita'anö sacerdote usähuinö koromuttö̧nö̧ ta'chere moró̧ päi'omenä umäriche'i i̧'i̧pä̧ pä'ö ja̧'hua̧nö̧ to'omenä umäri'che'i i̧'i̧pä̧ji̧ttö̧mä̧. Ja̧'hua̧nö̧ ja̧'a̧ttö̧ sacerdotemä ji̧'ä̧huä̧cu'a̧ täcö pi̧'i̧pä̧ji̧. I̧jȩta̧nä̧mä̧ u̧ttahui yämä jui̧'a̧. Ö̧'ca̧tä̧hui̧yu̧ itöca'anö ja̧'a̧ ja̧u̧mä̧ umäriche'ittö pi̧'ä̧ji̧mä̧. ⁷ Ji'ä huäji'ca'a i̧jȩta̧ yabonö 'cuä'i pächöttömä na'a̧chö̧tä̧ ji̧ä̧huä̧cua̧ sacerdoterö aditö icuarö pä'ö, ja̧hua̧nö̧ ja̧'a̧ttö̧ ja̧u̧mä̧ sacerdote ö̧jo̧mȩ i̧'chä̧cua̧ pä'ä jita'anö. ⁸ Ja̧hua̧nö̧ sacerdote u̧sä̧huä̧cu'a̧ ja̧u̧rö̧ i̧jȩta̧ yabonö 'cuäicha pä'ö. Yabocu juoächöttömä, ja̧'hua̧nö̧ ja̧'a̧ttö̧ sacerdote ji̧'ä̧huä̧cua̧ ja̧u̧mä̧ na'a̧chö̧. Ja̧u̧ mä̧riche'imä bo'ipu. ⁹ Tti̧jȩta̧ 'cuäipächö märichei ya̧tȩnä̧ ko̧mȩnä̧mä̧, ja̧u̧rö̧ sacerdote ö̧jo̧mȩcu̧ ȩcuä̧cua̧. ¹⁰ Sacerdotemä ja̧u̧ru̧ u̧sö̧huö̧cua̧ tuhuäba jo̧mȩmä̧ i̧jȩta̧ teönä ja̧ pä'ö, uhuocoy teönä pärohuächäja pä'ö, ji̧'ä̧mo̧mä̧ idepä jareaja pä'ö. ¹¹ Jareöttömä, tti̧jȩta̧ 'cuäipächö rö̧ä̧nä̧ ra̧huä̧pi̧jö̧ märichei jä̧cua̧'a̧ ja̧'hua̧nö̧ jo̧mȩnä̧ sacerdotemä ja̧u̧rö̧mä̧ su̧ro̧pa̧ pä'ötä pä̧cua̧. Ja̧u̧mä̧ su̧ro̧pa̧ pä'ö ku̧nä̧hua̧ ja̧'a̧nä̧ u̧mi̧cu̧mä̧ rä'epö icuähuocö jä̧cua̧. ¹² Ja̧u̧ mä̧richei yabonö i̧jȩta̧nä̧ räreipöttömä̧ ja̧'hua̧ta̧'a̧nö̧ uttö kä̧mä̧dö̧ ö̧jä̧pö̧ jubö ja̧u̧ märichei i̧jȩta̧ jättäpä̧ya̧tä̧ a̧ttä̧di̧'ö̧ttö̧mä, sacerdote'inä toä'anö jo̧mȩ, ¹³ ja̧'hua̧nö̧ jo̧mȩnä̧ sacerdotemä u̧sä̧huä̧cua̧ ja̧u̧rö̧mä̧ umäricheimä jä̧ttä̧pä̧ya̧rö̧ päi'äjá pä'ö, päi'äjittömä, sacerdotemä ja̧u̧ ttö̧ja̧sa̧ märichei ku̧nä̧rö̧rö̧mä̧ surojö jui̧'a̧ pä'ötä pä̧cua̧. O'cajuiyötä teönä̧tä̧ pärohuächäjittömä, ja̧u̧mä̧ su̧ro̧pa̧ jö̧nä̧mä̧ huocö jä̧cua̧. ¹⁴ Ja̧'hua̧nö̧ ja̧'a̧nä̧ ötta jareöttömä, ja̧u̧mä̧ su̧ro̧pa̧ jö̧nä̧tä̧ to̧ttä̧cua̧. ¹⁵ Sacerdotemä̧ ya̧tȩ ötta jarea'a toa pä'ö jä̧cua̧'a̧ ja̧'hua̧nö̧ topö ja̧u̧mä̧ pä̧cua̧ pidemä su̧ro̧pa̧ jö̧nä̧tä̧, öttamä ji̧nä̧ jarea'attö su̧ro̧pa̧ jö̧nä̧tä̧ hua̧. Ja̧u̧ maricheimä juhua'a yabo boipö ja̧'a̧. ¹⁶ Ja̧'hua̧nö̧ ja̧'a̧nä̧ ötta teönätä̧ pärohuächöttömä, ja̧u̧mä̧ sacerdoterötä i̧jȩcu̧ i̧'cha̧ pä'ötä jä̧cua̧'a̧. ¹⁷ Sacerdotemä ja̧u̧ ötta teänä pärohuachaja pä'ötä. Pärohuächäjittömä sacerdotemä pä̧cua̧ pidemä suropocö jö̧nä̧tä̧. ¹⁸ Ya̧tȩ ttö̧ja̧sa̧ i̧jȩta̧nä̧ ötta pä̧'i̧jo̧mȩ, huahuächäjittömä, ¹⁹ ja̧'hua̧nö̧ huahuächäjome teönäcö̧, sa̧rä̧ta̧ jö̧nä̧cö̧, teöcö tuhuäbanö jö̧nä̧cö̧ ji̧ä̧mö̧ttö̧mä̧, sacerdoterö i̧jȩcua̧ pä'ö ja̧'a̧, ²⁰ Sacerdotemä adiu to̧ä̧cua̧ i̧jȩta̧ttö̧mä̧ jacuänä̧nö̧ ji̧ä̧ma̧'a̧ ja̧ pä'ö ja̧'hua̧ta̧'a̧nö̧ uhuo'che teönä pärohuächaja pä'ö. Pärohuächäjittömä sacerdotemä pidemä su̧ro̧pa̧ pä'ötä pä̧cua̧. Ja̧u̧mä̧ mä̧richei juhua'a yabo boipö ja̧'a̧, öta jätta juhua'a yabocutä rö̧ä̧chö̧ttö̧mä̧. ²¹ Ja̧'hua̧nö̧ ja'a̧nä̧ sacerdotemä̧ ösä̧huomenä̧ uhuocoi teoi juiyuttömä̧ ja̧hua̧ta̧'a̧nö̧ i̧jȩta̧ dȩa̧'a̧ päi'önä 'cuäi'oca'a, 'cuäia'jajueimä huahuächäjittömä, ja̧'hua̧nö̧ ja̧'a̧ Sacerdotemä̧ ja̧u̧ru̧mä̧ sietenö̧ mo̧ro̧ jo̧mȩnä̧ juorömä otonänö ö̧ju̧nä̧rä̧cua̧. ²² I̧jȩta̧ yabonö̧ cuäipächuttömä̧ ja̧u̧mä̧ surö̧pa̧ jö̧nä̧tä̧ pä̧cua̧ Sacerdotemä̧. ²³ Ja̧'hua̧nö̧ ja̧'a̧nä̧ ju̧huȩnȩ ötta jo̧mȩ sä̧rö̧ta̧ jö̧nä̧tä̧ ki̧'ö̧ttö̧mä̧ juhua'a yabonö̧ rö̧ä̧chö̧ juiyöttömä̧, ötta jo̧mȩ huahuächäja'a huä'tärä jö̧nä̧tä jö̧ttö̧mä̧ ja̧'hua̧nö̧ ja̧'a̧ Sacerdotemä̧ pide täcö a̧di̧hua̧ pä'ö pä̧cua̧. ²⁴ I̧jȩta̧nä̧ cuo'ö icuomenä ja̧'hua̧ta̧'a̧nö̧ cuo'ö icuäjome idepänä̧mä jarea'anä̧ teöcucö̧ tuhuöcucö̧ teönä tuhuäbanöcö̧ päröhuächöttömä, ²⁵ jạ'hua̧nö̧ ja̧'a̧ Sacerdotemä̧ u̧sä̧huä̧cua̧ uhuo'chemä̧ tea pä'ö i̧jȩta̧mä̧ tuhuäba jo̧mȩmä̧ teönä̧tä̧ pärohuächöttömä̧, ja̧'hua̧ta̧'a̧nö̧ i̧jȩta̧ dȩa̧'a̧bö päi'önä̧ 'cuäipächöttömä̧. 'cuäipächa'atä ja̧'a̧ttö̧, ja̧u̧ 'cuättipächö mä̧ichei jö̧cua̧'a̧. Cuo'ö icuäjome yabocutä cuäipächöttömä, Sacerdotemä̧ ja̧u̧rö̧mä̧ su̧ro̧pa̧ pä'ötä pä̧cua̧. Ja̧u̧ na̧huä̧chö̧mä̧ 'cuättipächö ma̧richei jo̧mȩttö̧. ²⁶ Ja̧'hua̧'a̧nö̧ sacerdtote hua̧ tti̧jȩta̧ idicuoma usähuomenä ttuhuocoi teoi ka̧'a̧ u̧ö̧cui̧'ö̧ juiyöttömä, ja̧'hua̧ta̧'a̧nö̧ i̧jȩta̧ dȩa̧'a̧ttö̧tä̧ dä'ähuächöttömä, ja̧'hua̧nö̧ jo̧mȩnä̧ sacerdote hua̧mä̧ jäyäcu pporädö u̧ju̧nu̧a̧'nö̧ ja̧'a̧ ja̧u̧ru̧mä̧ ji̧mu̧i̧tȩ ta'arenö mo̧ro̧ jo̧mȩ. Ja̧'hua̧nö̧ jö̧ ä'ca'amä sacerdote hua̧ usähuä̧cua̧ ji̧mu̧tȩ ta'arenö mo̧ro̧ päi'omenä. ²⁷ Ja̧'hua̧nö̧ jo̧ca̧'a̧ i̧jȩta̧ huä̧mȩnä̧ yabocutä yoäcuächättömä, ja̧'hua̧nö̧ jö̧ttö̧mä̧ sacerdote hua̧mä̧ ja̧u̧ru̧ pä̧cua̧ surojö ku̧nä̧rö̧tä̧ hua̧. Ja̧u̧ märicheimä yabocutä yoähuächö ja̧'a̧. ²⁸ I̧jȩta̧nä̧ idicunä jö̧ yȩnȩ ä̧cuo̧mȩtä̧ kö̧ttö̧mä̧ yabocu'inä yoähuächoca'a juorätä dä'äuttumä, jua'ampä cuo'ö icuäja'atä jö'äma̧'a̧, ja̧'hua̧nö̧ jo̧mȩnä̧ sacerdote hua̧mä̧ ji̧ä̧huä̧cua̧ surojö'inä jui̧'a̧ pä'ö, koromä juiya'a öttä cuoinometä ja̧'a̧. ²⁹ Ya̧tȩ ubo'inä isaju'inä märichei 'cuättipu juä'i tu̧ju̧nä̧ro̧ttö̧mä̧ ttunä i̧nä̧ ttä̧'cä̧ so̧dä̧ inä. ³⁰ Ja̧'hua̧nö̧ jö̧ttö̧mä̧ sacerdote hua̧mä̧ u̧sä̧cuä̧cua̧ ttö̧ja̧rö̧ 'cuättipu märichei tti̧jȩta̧ jacuänänö ja̧ja̧ päö, ja̧'hua̧nö̧ ja̧'a̧nä ja̧u̧ uhuochenä tu̧huo̧ppa̧nö̧ jö̧ o̧i̧ kö̧ttö̧mä̧. Ja̧'hua̧nö̧ jo̧mȩnä̧mä̧ sacerdotemä ja̧u̧ru̧mä̧ pä̧hua̧ suro̧pa̧tä̧ hua̧ pidemä. Pi̧yȩmä̧ i'quiu, 'cuättipu märichei ja̧'a̧ ttunä'inä täcä so̧dä̧nä̧'inä. ³¹ Sacerdote hua̧ idepänä baraunä jö̧ märichei to'omenä ja̧u̧ märichei i̧jȩta̧ dȩa̧'a̧nä̧ jö̧ juiyöttömä ja̧'hua̧ta̧'nö juȩnȩ to'omenä ttuhuo'che idicuä'che ja̧u̧ru̧ juiyöttömä, sacerdote ja̧u̧ idepä huä̧mȩnä̧ baraunä na̧'a̧chö̧rö̧mä̧ ji̧mu̧tȩ ta'arenö mo̧ro̧ jo̧mȩnä̧ jäyäcu pporädö u̧ju̧nä̧cua. ³² Ji̧mu̧tȩ ta'arenö mo̧ro̧ päi'omenä sacerdote hua̧mä̧ to̧'ä̧cua̧ marichei jä̧'ji̧ jabucu yoähuachajá pä'ö. Ttuhuo'che tuhuä'pänö jä'che juiyöttömä Ja̧u̧ märichei i̧jȩta̧nä̧tä̧ kö̧ttö̧mä̧, ³³ ja̧'hua̧nö̧ hua̧mä̧ uhuo'che 'cui'ö i̧cuä̧huä̧cua̧ öttä tö'cö jo̧mȩ jubutä ja̧'hua̧nö̧ ja̧'a̧nä̧ öttä jo̧mȩmä̧ 'cui'ähuiocö jä̧cua̧ ja̧'hua̧nö̧ jo̧mȩnä̧mä̧ sacerdote hua̧tä̧ jäyäcu pporädö u̧ju̧nä̧cua̧ ja̧u̧ i̧jȩta̧ i'quiunä na̧'a̧chö̧rö̧mä̧ yabocu ji̧mu̧tȩ ta'arenö mo̧ro̧ jo̧mȩnä̧. ³⁴ Koromuttö̧nö ta'are moró̧ päi'omenä sacerdote toä̧cua̧ nahuä̧chä̧ji̧ i̧jȩta̧ 'cuäipäji kä̧mä̧da̧ pä'ö. i̧jȩta̧ jacuänänö jo̧ca̧'a̧ ju̧ttö̧mä̧, ja̧'hua̧nö̧ ja̧'a̧ttö̧ sacerdote ji'ähua'anö ja̧'a̧ pi̧'ä̧ji̧ pä'ö. Na̧'a̧chä̧ji̧mä̧ ittö ca'anö ja̧'a̧ ö̧'ca̧tä̧huä̧ta̧ ja̧'hua̧nö̧ ja̧'a̧ttö̧ jo̧'u̧mä̧ täcö pi̧'ä̧ji̧. ³⁵ Ja̧'hua̧ta̧'a̧nö̧ i̧jȩtä̧ i'quihuönä nahuä̧chä̧ji̧ yabocu jo'ächöttömä sacerdote ji'ähuä ji'ca'a pidemä pi̧'i̧pä̧ji̧ pä'ö. ³⁶ Ja̧'hua̧nö̧ ja̧'a̧ttö̧ sacerdote jo̧'u̧rö̧mä̧ pä'ä jita'anö̧ to'a pä'ö ka̧'a̧. I̧jȩta̧ 'cu'ä'i päji yabocu juoächöttömä, sacerdote u̧si̧yä̧cu̧'a̧ uhuo'che tu̧huä̧pä̧ ju̧ttö̧mä̧cö̧. Ja̧u̧mä̧ na'ä̧chö̧ ja̧'a̧ttö̧. ³⁷ Ja̧'hua̧nö̧ ja̧'a̧ttö̧ sacerdote topu i̧'cho̧mȩnä̧ i'quihuönä nahuä̧chä̧ji̧ i̧'i̧pu̧ttö̧mä̧ ja̧'hua̧ta̧'a̧nö̧ uhuo'che'inä idicunä bauttömä, nahuä̧chä̧ji̧ttö̧mä̧ pi̧'i̧pä̧ji̧. Ja̧u̧mä̧ adihuächäji ja̧'hua̧nö̧ ja̧'a̧ttö̧ sacerdote ji'ähua pä'ö ja̧'a̧ täcö pi̧'i̧pä̧ji̧ pä'ö. ³⁸ Uborö jö̧ttö̧'i̧nä̧ ja̧'hua̧ta̧nö̧ isajuru jö̧ttö̧'i̧nä̧ tti̧jȩta̧nä̧ teö jö̧nä̧ ji̧ä̧mi̧'ö̧ttö̧mä̧, ³⁹ ja̧'hua̧nö̧ jo̧mȩnä̧ sacerdotemä usähua pä'ö jä̧cua̧'a̧ ja̧u̧ ji̧ä̧mi̧'ä̧ji̧mä̧ teötä ja̧ pä'ö suro tti̧jȩta̧ mä̧richeitä já̧ pä'ö, ja̧'hua̧nö̧ jo̧mȩnä̧ ja̧u̧ ttö̧ja̧sa̧mä̧ surojömä̧ jui̧'a̧ pä'ötä pä̧huä̧cua̧. ⁴⁰ 40 Ya̧tȩrö̧ uhuo'che ma̧ä̧chomȩnä̧ unä̧mä̧ jui̧'a̧tä̧ ö̧ji̧pö̧ttö̧mä̧, ja̧u̧mä̧ su̧ro̧pa̧ pä'ömä̧ pä'ähuöcö jä̧cua̧. ⁴¹ Üocuorä ja̧'a̧cu̧nä̧ uhuo'che ma̧ä̧chö̧ttö̧mä̧, öocuoränä̧mä̧ uhuo'chemä̧ jui̧'a̧tä̧ ö̧ji̧pa̧'a̧nä̧, ja̧u̧mnä̧ su̧ro̧pa̧ pä'ömä̧ pä'ähuocö jä̧cua̧. ⁴² Ja̧'hua̧nö̧ ja̧'a̧nä̧ ötta töhuönä ja̧'a̧nä̧ teönä jö̧ttö̧mä̧ unä uhue'che sahuepächäjomecö̧, i'änäcö̧ ju̧huȩnȩ kä̧mä̧ji̧mä̧ 'cuättipächö märichei jä̧cua̧'a̧. ⁴³ Ja̧'hua̧nö̧ ja̧'a̧ttö̧ sacerdotemä̧ adiunänö toärö pä'ötä jä̧cua̧'a̧ märicueittö unä uhuo'che maächä̧jo̧mȩcö̧, i'änäcö̧tuhuöcu teönä ji̧ä̧mo̧mä̧, tti̧jȩta̧ 'cuäipächö märichei ja̧ pä'ö. ⁴⁴ Ja̧u̧ maricheimä 'cuättipächö jö̧ttö̧mä̧ ja̧u̧ ttö̧ja̧sa̧mä̧ su̧ro̧pa̧ jö̧nä̧tä̧ to̧ttä̧cua̧. Sacerdotemä ja̧u̧ ttö̧ja̧sa̧ unä märichei kä̧mä̧cu̧ru̧mä̧ su̧ro̧pa̧tó pä'ötä pä̧cua̧. ⁴⁵ Ja̧u̧ 'cuättipächö marichei ku̧nä̧rö̧mä̧ ö̧'ca̧tä̧huä'pimä sȩrä̧huä̧'pitä ö̧'ca̧tä̧huä̧cua̧, uhuo'che'inä jeyu'chenötä̧, ja̧'hua̧ta̧'a̧nö̧ ja̧u̧mä̧ i'ämä i̧ji̧yu̧ jubö tto̧'ȩcuä̧rö̧ kä̧nö̧ huo̧ä̧cua̧: Ttö̧mä̧ su̧ro̧pa̧sä̧, Ttömä, su̧ro̧pa̧sä̧. ⁴⁶ 'Cuäopönä mo̧ro̧tä̧ 'cuättipächö märichei ku̧nä̧rö̧mä̧ su̧ro̧pa̧ jö̧nä̧tä̧ ö̧jä̧cua̧. Juhua'amä ja̧u̧mä̧ su̧ro̧pa̧ jä̧cua̧'a̧ umäricheimä yabonö 'cuättipächu jähuä jo̧mȩttö̧, ja̧u̧mä̧ katätä ö̧jä̧cua̧. Ja̧u̧mä̧ ä'ö ttö̧jo̧mȩttö̧mä̧ otonänötä̧ ö̧ja̧ pä'ö jä̧cua̧'a̧. ⁴⁷ Ttö̧'ca̧tä̧huä̧ta̧ Lepra märicheittö temäreyu jö̧nä̧ räopa'a surojuepä̧ta̧mä̧, oveja uhuo'chettö adicuäta̧cö̧, lino pö̧jä̧ta̧cö̧, ⁴⁸ oveja uhuo'chettö 'tö̧'ö̧ o̧tȩ rötä'chö adicuäta̧cö̧, lino i̧sä̧ta̧cö̧, i̧sa̧ i̧jȩta̧ttö̧ a̧di̧cuä̧ta̧cö̧, koroju̧hua̧ i̧jȩta̧ttö̧ a̧di̧cuä̧ta̧nä̧cö̧ ⁴⁹ tȩmö̧reyu jö̧ surojuoepö kö̧ttö̧mä̧ ja̧'tu̧huö̧nä̧cö̧, tuhuönä̧cö̧, pö̧jä̧ta̧nä̧cö̧, i̧sa̧ i̧jȩta̧nä̧, mȩtö adicuänäcö̧, 'tö̧ä̧huä̧ta̧nä̧cö̧, i̧sa̧ i̧jȩta̧ttö̧ korojuei ttaditäjimä, ja̧'hua̧nö̧ ja̧'a̧ ja̧u̧mä̧ lepra marichei räopaja'a jä̧cua̧'a̧, ja̧u̧mä̧ sacerdoterötä tti̧jȩpa̧ pä'ö jä̧cuȩ. ⁵⁰ Sacerdotemä usähua pä'ö jä̧cua̧'a̧ pö̧jä̧ta̧nä̧ temöreyu jö̧, ja̧u̧mä̧ korojuei temöreyu jö̧nä̧ jö̧mä̧ u̧mi̧cu̧ rä'epö icua pä'ötä jä̧cua̧'a̧ sietenö mo̧ro̧ jo̧mȩnä̧. ⁵¹ Ja̧u̧mä̧ pä'äjita'anö̧ sietenö mo̧ro̧ päi'omenä usähua pä'ö jä̧cua̧'a̧. Tȩmö̧reyu jö̧ yabonö rö̧ä̧chö̧ttö̧mä̧, pö̧jä̧ta̧nä̧cö̧, ti̧ä̧dä̧cuä̧huä̧'panä̧cö̧, i̧sa̧ ohuo'chettö a̧di̧cuä̧ta̧nä̧cö̧, lino i̧sä̧ta̧ a̧di̧cuä̧ta̧nä̧cö̧, i̧sa̧ i̧jȩta̧nä̧cö̧, korojuei i̧sa̧ i̧jȩta̧ttö̧ adicuäcö̧, ja̧'hua̧nö̧ ja̧'a̧ lepra marichei temäreyu jö̧nä̧ uhuähuächäjimä surojuoepö jö̧ttö̧mä̧ ja̧u̧ uhuähuächäja'a ka̧cu̧mä̧ surojö jö̧nä̧tä̧ to̧ä̧cuä̧huä̧cuȩ. ⁵² Ja̧u̧mä̧ ku i̧cuä̧cuȩ, pö̧jä̧tya̧ jö̧ttö̧'i̧nä̧, korojuei ti̧ä̧dä̧cuä̧huä̧ o̧ta̧ jö̧ttö̧'i̧nä̧, i̧sa̧ uhuo'chettö a̧di̧cuä̧ta̧ jö̧ttö̧'i̧nä̧, lino pö̧jä̧ta̧ jö̧ttö̧'i̧nä̧, korojuei i̧sa̧ i̧jȩta̧ttö̧ adicuä jö̧ttö̧'i̧nä̧, korojuei temöreyu jö̧ surojuoepö ka̧cu̧mä̧, ja̧u̧ märicheimä juhua'a yabo boipö jö̧nä̧ jä̧cuȩ. Pö̧jä̧ta̧mä̧ o'cajuiyötä ku i̧cuä̧huä̧cuȩ. ⁵³ Sacerdote hua̧mä̧ u̧sä̧huä̧hua̧ ttiärenä̧ ja̧u̧nä̧tä̧ isotö huottö rö̧ttä̧chö̧ huiyapäö koro tti´äre ppu̧jä̧ta̧ huiäcuätanä'inä lino o̧ta̧ttö̧'inä, koro i̧sa̧ i̧jȩta̧ttö̧ adihuänä'inä. ⁵⁴ Jaunu o'ca'a ja̧u̧mä̧ adiu jo̧mȩnä̧ topu aditö icua̧cua̧ ja̧u̧ ttiäre jä̧ji̧nä̧ ko̧cuȩji̧mä̧ lepramä, ja̧'hua̧ta̧nö̧ ja̧u̧mä̧ ji̧mu̧ tȩttö̧ todäre mo̧ro̧ jo̧mȩnä̧ 'cä̧'ȩpu̧ u̧ju̧nä̧cua̧. ⁵⁵ Ja̧'hua̧nö̧ ja̧'a̧ttö̧ sacerdotemä u̧sä̧huä̧cua̧ ttiäre ttötöcäji o'ca'a'inä. Isotö tti̧huȩyu̧ pärohuächoca'a jä̧ji̧ttö̧'i̧nä̧, rö̧ä̧chö̧ juiyäjittö'inä, surojötä huaju. Ucutä ku cuicua pä'ö ja̧'a̧ ttiäremä, huä̧i̧nä̧tä̧ ja̧'a̧nä̧ isotö huotö suro juottepa'anä. ⁵⁶ Sacerdote hua̧ ttiäre u̧sä̧huä̧cua̧ ttötöcäji o'ca'a ji̧nä̧ temöreyu jä̧ji̧ttö̧mä̧, ja̧'hua̧nö̧ jö̧ttö̧mä̧ ja̧u̧tä̧ 'cui'opu i̧cua̧cua̧ juä̧nȩ surojö ko̧mȩmä̧ tti̧ä̧rȩta̧nä̧'i̧nä̧, i̧sa̧ i̧jȩta̧nä jo̧ttö̧'inä ttiäre hui'ö puttö adicuä jö̧ttö̧'inä. ⁵⁷ Ja̧'hua̧nö̧ ja̧'a̧nä̧ tti'äre jä̧ji̧nä̧ ji̧nä̧ kö̧ttö̧mä̧ koronä'inä ko̧cu̧ttu̧mä̧, juhua'a yabocu rö̧ä̧chö̧ttö̧mä̧. Ucutä ku cuicu'anö ja̧'a̧ ja̧'hua̧nö̧ surojö mä̧richei ko̧cu̧mä̧. ⁵⁸ O'cajuiyönä tiäre jö̧ pputtö huiö adihuä'inä i̧sa̧ i̧jȩta̧ttö̧ adihuä jö̧ttö̧'inä ucutä ja̧u̧ ttiäre jö̧ tö'cö icu märichei siehuächönä päiönä jȩ'cu̧ttu̧mä̧, ja̧'hua̧'a̧nö̧ jo̧mȩnä̧ ttiäremä todäre päi'önä cutöcö'anö ja̧'a̧ ja̧'hua̧nö̧ jo̧ttö̧tä̧ ttädihuächiäcuotö. ⁵⁹ Pi̧yȩ ja̧'a̧ hueähuamä marichei päi'omenä ttiärenä lino i̧sä̧ta̧nä̧ koro ttiäre rȩni̧yö̧na̧'i̧nä̧ pöttähuänä'inä, i̧sa̧ i̧jȩta̧na̧'i̧nä̧ ja̧'hua̧ta̧'a̧nö̧ i̧sa̧ i̧jȩta̧ttö̧ adicuä'inä, jua'amä ucutu topö cu̧juo̧juä̧tu̧cua̧ adiu surojö pä'ö."