¹ Pi̧yȩ ucu to'cu ötahuiyämä̧ ttö̧ja̧ recuätö ttö̧ja̧cui̧no̧mȩ ja̧'a̧nä̧, jitämä yorö'iso toome. Recua jä'inö'anö̧tä̧ juoächinome, jahuätömä ucuo ttö̧ja̧ ji̧na̧'a̧nä̧. Jahuäjumä ru̧hua̧ ittiju ji̧na̧'a̧ ko̧ro̧jä̧ ttö̧ja̧ ttö̧'cä̧tȩttö̧mä̧, ja̧'hua̧nö̧ ji̧na̧'a̧nä̧ jitämä amäcö̧ adicuä isaju jö̧nä̧tä̧ juo'ächinä̧ju̧. ² Jahuäjumä pä̧i̧cu̧nä̧ huopönö ajahuäju yodomä ja̧'hua̧ta̧'a̧nö̧ ki̧'chȩrȩjamä ki'ebaba o'cajuiyötä huerächäcua. Ja'huäju ki'queräyotöttömä ya̧tȩ'i̧nä̧ toa'a ka̧'cua̧ kȩmö̧nä̧ ppäda pä'ömä. Kahuaruhuämä o'catoi'önä̧tä̧ surojuottepinä̧cu̧. Juätömä kaboiyotö jö̧nä̧tä̧ juo'ächinä̧tö̧. ³ Usurä ȩmä̧cuä̧huä̧'i̧nä̧ usurä ȩmä̧cuä̧huä̧'i̧nä̧ 'cuäopäji o'ca'a, Judá ko̧ro̧jä̧ra̧'a̧ ttȩmi̧pi̧nä̧cu̧. Ko̧ro̧jä̧ ttö̧'cä̧tȩ ö̧ja̧'a̧mä̧ 'cuä'ächi'ö ö̧'ä̧mä̧da̧ pä'ö'i̧nä̧ jui̧'a̧. O'catoi'önä̧ o'ca'anä ru̧'ä̧rä̧tö̧mä̧ ieruhuäcuähua'anä 'chuttädinä̧cu̧. ⁴ Sión mä̧ni̧yä̧mä̧ a̧'cua̧ tta̧huȩcua̧'a̧ jua'amä̧ yä̧tȩ'i̧nä̧ pä'cäri jȩtta̧ pä'ö ku̧nä̧huä̧ pä̧nä̧ ttichoca'attö̧. Äpatiyämä̧ o'cajuiyötä si'epö icuähua'a. Sacerdotetö̧mä̧ tta̧'cua̧ tta̧'ȩcu huopätö. Nä̧tö̧ uborö jeröpätömä̧ rö̧ȩnä̧ tta̧'cua̧ tta̧'ȩcuä̧tö̧ ja̧'hua̧ta̧'a̧nö̧ rö̧ä̧nä̧tä̧ a̧'u̧ ȩmä̧huä̧tö̧. ⁵ Ttaboiyotömä tturuhuotö jö̧nä̧tä̧ pä'i'inätö; ttaboiyotömä̧ yabonö rö̧'ä̧chä̧tö̧. TÖ̧Ä̧NÄ̧HUÄ̧MÄ̧ suröjö rö̧ä̧nä̧ jȩttö̧ jähuänä̧ tta̧'cua̧ tta̧huȩpä̧u̧. Tti̧tti̧mö̧ ppo̧'ä̧tö̧mä̧ ttaboiyotötä a̧mä̧cö̧ ttaditönä huettäcuotö. ⁶ Ja̧'hua̧nö̧ ja̧'a̧ Sión ittiju kuadihuämä icuipinä̧ju̧. Ruhuotö tti̧tti̧mö̧ yä̧mä̧tö̧ ttucuä'cua ttu̧'o̧cui̧'ö̧ juiyönä jä̧u̧mä̧ ttö̧ja̧cua̧'a̧ jä̧'i̧nö̧'a̧nö̧ ttö̧ja̧cuä̧cuo̧tö̧ ja̧'hua̧ta̧nö̧ ru'u̧ ä'canä ttujurumä juiya'anä 'chä̧tö̧. ⁷ Jaropi'äcuähuotö tta̧'cua̧ tta̧ttȩcu̧ mo̧ro̧, Jerusalénmä ttamucuädäcuotö o'cajuiyönä täbocu rö̧ä̧ö̧nä̧ micuäu juäi ttu̧ju̧nä̧ri̧nö̧ pänä. Ttäboiyotö ttumunä pä'i'ö mo̧ttä̧cho̧mȩnä̧, ya̧tȩ'i̧nä̧ ppättädoco̧u̧ pinä̧ttö̧. Ttäboiyotö jahuätö totteächa'a topu ya̧'a̧hui̧nä̧tö̧. ⁸ Jerusalénmä rö̧ä̧ö̧nä̧ suronä jȩpi̧nä̧ju̧, ja̧'hua̧nö̧ ja̧'a̧ttö̧ ttöjö'cococua jä̧'i̧nö̧'a̧nö̧tä̧ cuaju. O'catoi'önä jahuäjuru ucuo te'ähuinä̧tö̧mä, jitämä jahuäju juiaju kö̧a̧'a̧ topu ttöjö'cococua. Jahuäju dä'ärö̧jö̧nä̧ barahuäcua töjipächa pä'ö jȩpä̧ju̧. ⁹ Kireba i̧sa̧tä̧ de'amä surojötä cuaju. Yodoji jä̧cuä̧mä̧ kamucuädö juiyönä jä̧cua̧. Mo̧jä̧chö̧mä̧ juiyo suronä̧tä̧ jinä'a̧. Ya̧tȩ'i̧nä̧ to'inä'a̧ jahuäjuru ppä'ädömä. Ja'huäju huopunö jä'epinäju̧: ''¡Topi ttö susuräu, CHÖ̧Ä̧NÄ̧HUA̧, chabo i̧ya̧ pinötä̧ juiyo juruhua̧!". ¹⁰ Taboi̧ya̧mä̧ täcö u̧mu̧ jacua päi'önä ȩmä̧ji̧ ja̧'a̧ töäre rö̧ä̧nä̧ micuäu juäi. Dios ö̧jode jacuä pi̧ja̧ ttö̧ja̧ suronä jȩpa̧tö̧ dottächa'a toja'attö, ucumä pä'inöjä̧ jä'huätömä dottächö juiyäcuotö ucu ji̧nä̧ yo̧mȩtȩ ca̧ca̧cu̧ cucuocuomemä. ¹¹ Cu̧mu̧huäyotö pinätö̧mä ttu̧cuä̧ usu tta'cua tta̧'ȩcu̧ huopätö. ja'huätömä ttiäre micuäujuäi iyö icuätö ttu̧cuä̧ ȩmö̧ cuä̧nö̧ a̧'cua̧rö̧ ttö̧ja̧ pä'ö. Topi, , amucuädittö, ttö chimicuämä jui̧'a̧sä̧. ¹² ¿Ucuturumä micuähuoca'a ttörö 'cuäopömä? Cuippeyanä ko̧cuä̧tö̧rö̧ topätucui ttö chusuräuta'anö korotö'inä ttusurähua pä'ö, CHÖ̧Ä̧NÄ̧HUA̧MA ttörö ro̧'ȩpä̧pö̧ rö̧ä̧nä̧ amisurächia'atö̧. ¹³ Ju'tojuttö hueinä juo̧u̧mä̧ ucurä chihue'quiyuttö 'chuhuädönä. Juo̧u̧mä̧ ppäepu rutinö yaute maya̧sa̧ chijä pu̧ ja̧'a̧nä̧ ppa̧dä̧chi̧ya̧rö̧ pe'ö. Juo̧u̧mä̧ munäu̧tä̧ ro̧ȩpä̧cu̧sä̧ chijiyuhuönä'inä. ¹⁴ Juo̧u̧ ji̧nä̧ji̧yȩtȩ jȩi̧nä̧cu̧sä̧ u̧mú̧ jacuatä chöarodinömä. Juo̧ju̧äimä 'cä̧ti̧yä̧nä̧tä̧ ku̧ni̧nö̧ chu̧ru̧pä̧'quȩ huä̧mȩnä̧. Jȩi̧nä̧cu̧sä̧ chujuruínä juiyönätä̧. TÖ̧Ä̧NÄHUA̧ u̧mu̧nä̧tä̧ ppädinäcu̧sä̧, chi̧jä̧mä̧di̧yö̧nä̧ jo̧mȩnä̧'i̧nä̧. ¹⁵ TÖ̧Ä̧NÄHUA̧ o'catoinärö̧ pporädicuinö u̧mä̧tö̧ rohuähuö juruhuä'ijätörö. Juo̧u̧mä̧ a̧tȩpi̧nö̧ ji̧nä̧yo̧mȩtȩ pättia peö ttörö toicu ttöcuocua pe'ö ttö chumuhuäyotö juruhuätörö. TÖ̧Ä̧NÄHUA̧ öjö'quiyönä topinö Judá ittijuru ubocu 'cuäpocojurö. ¹⁶ Pi̧yȩ jähuänä ttömä ajahuösä. Chi'äriyättömä ajiyatä räopa'a cha̧'cua̧ chȩmö̧nä̧ ppä'ädö, cha̧'cua̧rö̧'i̧nä̧ ppa̧huä̧di̧pa̧'a̧nö̧ hua̧mä̧ ttöttömä oto kö̧. Chi̧tti̧mö̧mä̧ tti̧cuä̧hui̧'i̧nä̧u̧, ttaboiyitö rohuäu isojuottepomenä. ¹⁷ Sión ttö̧ja̧mä̧ ppättädatö pä'ö jättepa'anä ya̧tȩ'i̧nä̧ toa'a ka̧'cua̧ kȩmö̧nä̧ ppädö'anö̧ hua̧mä̧. TÖ̧Ä̧NÄ̧HUA̧MÄ̧ hue'inö jitö jäyänä̧ ka̧cuä̧tö̧mä̧ Jacob aboiyotö jö̧nä̧tä̧. ¹⁸ TÖ̧Ä̧NÄ̧HUA̧MÄ̧ adihuä i̧sa̧, ja̧'hua̧nö̧ ja̧'a̧ ttömä ra̧huä̧rö̧ hueinö huȩnȩ pä'oca'acu jȩpi̧nö̧sä̧. Ä̧ju̧cuä̧tu̧cui̧, ucutu ttö̧ja̧ o'catoi'önä ja̧'hua̧ta̧'a̧nö̧ cha̧'cua̧ tta̧dȩcu̧ topätucui. Chahuaruhuä nä̧tö̧ uborö jerupätömä juhua'atäcu u̧mä̧tö̧ juruhuätömä cärenä pȩjä̧tö̧ jö̧nä̧tä̧ ttȩmi̧pi̧nä̧u̧. ¹⁹ Ttömä cha̧hua̧ru̧hua̧rö̧ huopinö̧sä̧, ja̧'hua̧nö̧ ja̧'a̧nä̧ jahuätömä ttörömä to'ija̧'a̧cu̧tä̧ jȩpi̧nä̧tö̧. Chu̧mö̧huäyotö sacerdotetö̧'i̧nä̧, ttö̧ja̧ tturuhuotö'i̧nä̧ ötahuiyättötä to'epächinä̧tö̧, tta̧'cua̧rö̧ ki̧'a̧tö̧ pä'ö ttu̧cuȩtä̧ ttusa'anä̧. ²⁰ Topittö, TÖ̧Ä̧NÄ̧HUA̧, ja̧'hua̧nö̧ ja̧'a̧ ttömä cha̧'cua̧ tta̧'ȩcu̧sä̧; chu'cäbiyumä boreäcusä, chamiso'qui'i̧nä̧ koromenö̧ cueädäcusä chöacuä jäcuättömä, juhua'amä rö̧ä̧nä̧ jarodäcuähuä i̧sa̧ chä'ijomȩttö̧. U̧mi̧nä̧mä̧, curä'chumä tta̧ju̧ ka̧'cua̧ kȩmö̧nä̧mä̧ ppädoco'chu, isode jacuämä suro hua'aretä ka̧'a̧. ²¹ Jahuätömä chajahua'a ä̧ju̧cui̧nä̧tö̧, ja̧'hua̧nö̧ chajahua'anä̧ cha̧'cua̧ chȩma̧ pä'ömä ya̧tȩ'i̧nä̧ ppä'ädocö. Chaboiyotömä̧ o'catoi'önä̧ ttörö huȩnȩ jö̧mä̧ ä̧ju̧cuä̧'i̧jä̧tö̧ ja̧'hua̧ta̧'a̧nö̧ jahuätömä Ucu jȩ'cuä̧'i̧jö̧nä̧mä̧ eseutä ka̧cuä̧tö̧. Jȩchä̧cua̧sä̧ päcuinö̧ mo̧ro̧mä̧ täcö rȩbȩhuä̧ja̧'a̧; jitämä ttörö ji̧nö̧ta'anötä̧ jȩpi̧tö̧. ²² O'ca juiyönä suronä̧ jȩttö̧mä̧ Ucu cuä'ca jo̧mȩcu̧ icha'anä ja̧'a̧tä̧ topitö. Jahuätörömä ttö o'cajuiyönä suronä jȩchä̧ji̧ jähuänä jȩ'cui̧nö̧ta'anö jȩpi̧tö̧. Usurä ȩma̧u̧ huochömä juiyo rö̧a̧'a̧ ja̧'hua̧nö̧ jo̧mȩttö̧ chamiso'quimä jiyuhuächa'a.