¹ ¡Ttörö ä̧ju̧cui̧, ucutu aje jäyotö ka̧cuä̧tö̧mä̧! ja̧'hua̧ta̧'a̧nö̧ adiu ä̧ju̧cuä̧tu̧cui̧ttö̧, ucutu oto ttö̧ja̧tä̧. TÖ̧Ä̧NÄ̧HUA̧MÄ̧ chuhuäpächinö chimi ji̧nö̧nä̧tä̧ huoinä̧cu̧sä̧, cha̧ju̧ pi̧jä̧ra̧ä'a̧ chi'cächomenä. ² Chämä curodä pätecu sa̧huȩcuo jä'inö'anö jȩä̧cu̧sä̧. Ja̧u̧mä̧ umö dȩa̧'a̧ da̧ju̧ icuinäcu̧sä̧; Ja̧u̧mä̧ 'po̧'a̧ri̧ so̧a̧ri̧ jä̧'i̧nö̧'a̧nö̧ jö̧nä̧ ö'ärotinä̧cu̧sä̧, 'po̧'a̧ri̧ ȩnä̧huä̧ta̧'i̧nä̧ ja̧u̧mä̧ dfajö icui ³ Ja̧u̧mä̧ ttörö pä'inö: "Ucumä chu̧mö̧huä̧ya̧jä̧, Israel ttö̧ja̧nä̧, Ttö chusärö chi̧jȩpi̧nö̧ pä̧nä̧." ⁴ Ja̧'hua̧nö̧ päcu ttömä ädätinö̧sä̧: "Chadihuämä micuähuoca'atä chaditä'ija'amä, chujuriumä micuähuoca'atä be'ecuä'ijösä, koro'i̧nä̧ ja̧'a̧nä̧ adiu jȩchö̧mä̧ TÖ̧Ä̧NÄ̧HUA̧CU̧TÄ̧ ja̧'a̧ ja̧'hua̧ta̧'a̧nö̧ ttörö iya päinö'inä Diosnä̧tä̧ ka̧'a̧." ⁵ Ja̧'hua̧nö̧ ja̧'a̧ TÖ̧Ä̧NÄ̧HUA̧MÄ̧ ucuocuä'ijö-- chuhuäpächi'inomettö̧ kä̧mä̧dö̧ aditinömä u̧mö̧huä̧ya̧ chönä, Jacobmä pä'äjita'anö ppa̧huä̧cha̧ pä'ö ja̧u̧cu̧, Israel ttö̧ja̧'i̧nä̧ Ja̧u̧cu̧ ji̧nä̧ yo̧mȩtȩ ttö̧ca̧ca̧cui̧'ä̧cua̧'a̧nö̧, isopäi'önä TÖ̧Ä̧NÄ̧HUA̧ to̧ä̧ro̧mȩttö̧mä̧ chucuo ku̧nä̧rö̧ cha'attö̧ ja̧'hua̧ta̧nö̧ chu̧ru̧hua̧ Diostä ja̧'a̧ttö̧ chujuru iyä'ijömä-- ⁶ Ja̧'hua̧nö̧ ja̧'a̧ttö̧ Ja̧u̧mä̧ pä'ö: "Ucumä chu̧mö̧huä̧ya̧ jö̧nä̧ cua pä'ömä rö̧ä̧nä̧mä̧ huocöjä Jacob ahuaruhuä 'cotörö pä'äjita'anö ppa̧cuä̧di̧pa̧ pä'ömä ja̧'hua̧ta̧nö̧ Israel ttö̧ja̧ttö̧ ka̧cui̧pi̧nä̧tö̧rö̧ ppa̧cuä̧di̧pa̧ pä'ömä. Ucurumä judio huocotörö tȩya̧u̧ jö̧nä̧ jȩchä̧cua̧jä̧, ja̧huä̧jä̧ jä̧ttä̧jä̧tä̧ surojöttö ttö̧ji̧pö̧nä̧ ppäcuädäcua'anö̧." ⁷ Pi̧yȩ ja̧'a̧ TÖ̧Ä̧NÄ̧HUA̧ päömä, Israel ttö̧ja̧rö̧ ppä̧dä̧cuä̧huä̧ i̧sa̧ surojö jui̧'a̧mä̧, jitö ttö̧jö̧ tö'cö kö'cähuocotö pinä̧tö̧rö̧, ko̧ro̧jä̧ ttö̧ja̧ tta̧mi̧suru tto̧tti̧nä̧u̧rö̧ ja̧'hua̧ta̧nö̧ ruhuotö a̧mä̧kö̧ ttaditönä huȩtti̧nä̧u̧rö̧: ruhuotö tturuhuotömä̧ ttä̧rä̧mi̧'ä̧cuo̧tö̧ ruhuotö tti̧tti̧mö̧mä̧ topömä ttihue'quiyönä ttö̧'ä̧mä̧jä̧cua̧jä̧, TÖ̧Ä̧NÄ̧HUA̧ päjita'anö jȩpö̧, jähuänä, Israel ttö̧ja̧ ttu̧ru̧hua̧ surojö jui̧'a̧rö̧, ucurutä'i̧nä̧ pojopö emi̧nö̧rö̧." ⁸ Pi̧yȩ ja̧'a̧ TÖ̧Ä̧HUA̧ päömä: "Ttö ja̧u̧ru̧ ppädäda pädö chijȩpö̧ mo̧ro̧mä̧ Ttötä chä̧dä̧tä̧cua̧jä̧ ja̧'hua̧ta̧'a̧nö̧ ra̧huä̧pi̧jö̧ttä̧ ki̧'ä̧cuä̧huä̧ mo̧ro̧mä̧ Ttötä ppä̧dä̧dä̧cua̧jä̧; Ttötä tta̧dä̧rä̧cua̧jä̧ juhua'atäcu esecuäcuähuänä ttö̧ja̧cu̧ todeunä ku̧ja̧ pä'ö chi̧yä̧cua̧jä̧, pä'äjita'anö cuidepiyutucu cuaditäcua'anö, juiyome tti̧rȩjä̧ päi'önä cuiyä'chäcua'anö. ⁹ Ucumä cärenä pȩjä̧tö̧rö̧ päcuajä: Porömä rä'opächätucui, jitö cärenä pä̧cuä̧huo̧mȩ yo̧mȩ pȩjä̧tö̧mä̧: I̧jȩcuä̧tu̧cui̧. Jahuätömä mä̧nä̧ otoächia'a tottäcuotö; o'cajuiyönä jäyänä huäkä'co päi'omemä isä'cuatä kä̧cua̧'a̧. ¹⁰ Jahuätömä ppäittö'ocotö ttäcuotö, a̧di̧'i̧nä̧ rö̧jo̧co̧u̧ ttäcuotö, ja̧'hua̧ta̧nö̧ du'o'i̧nä̧ du'oco̧u̧ ttäcuotö, juhua'amä chu re kä̧cuä̧huä̧ i̧sa̧ oipa'attö̧ jahuätörömä; Ja̧u̧mä̧ aje rȩjȩttö̧ räopotora̧'a̧cu̧ oipäcuotö. ¹¹ Ja̧u̧nu̧ o'ca'a Ttömä mö̧ä̧'quiyu o'cajuitönä mäniyä̧tä̧ chu̧nä̧cua̧sä̧ ja̧'hua̧ta̧'a̧nö̧ mä̧ni̧yä̧mä̧ yorätetö chi̧cuä̧cua̧sä̧. ¹² Topittö, pitö ttö̧ja̧mä̧ otottö ttichäcuotö, korotömä chu̧huo̧u̧a̧'a̧cu̧nä̧ttö̧ ja̧'hua̧ta̧nö̧ korotömä kä̧hua̧ ma̧ä̧cha̧'a̧cu̧nä̧ttö̧ juhua'atäcu korotömä Sinim rȩjȩcu̧nä̧ttö̧. ¹³ ¡Mo̧ro̧jä̧mä̧ ra̧'i̧ ja̧'hua̧ta̧nö̧ rȩjȩmä̧ esehui, ucutu möä'quiyumä rö̧ä̧nä̧ eseu ra̧'ä̧tu̧cui̧! Isopäi'önä TÖ̧Ä̧NÄ̧HUA̧MÄ̧ i̧tti̧mö̧rö̧ tta̧'cua̧ ttȩmö̧nä̧ ppä'ädö ja̧'hua̧ta̧'a̧nö̧ tta̧'cua̧ tta̧'ȩcuä̧tö̧rö̧mä̧ rȩrö̧jö̧nö̧ to̧ä̧cua̧. ¹⁴ Ja̧'hua̧nö̧ ja̧'a̧nä̧ Sionmä pä'äji: "TÖ̧Ä̧NÄ̧HUA̧MÄ̧ icuipinä̧cu̧sä̧ ja̧'hua̧ta̧nö̧ ttörö unichi'inö̧. ¹⁵ ¿Isajumä ki̧tti̧ atate kajäcurumä ku̧ni̧chi̧'a̧'a̧nö̧ ja̧'a̧ tä̧ji̧, ja̧'hua̧nö̧ jö̧ttö̧mä̧ ki̧tti̧rö̧mä̧ juajumä rȩrö̧jö̧nö̧ to̧po̧co̧ju̧ ja'a? Jahuäju kunichi'äjittö'i̧nä̧, Ttömä chunichi'ococu cuä̧cua̧jä̧. ¹⁶ Topittö, Ttömä chumö jacuätä huȩyu̧tu̧ chutinä̧cu̧jä̧ cui̧mi̧mä̧; ucuru tto̧ȩpä̧rö̧ obämä 'cuäopönätä kä̧cua̧'a̧ Ttö chä'ca jo̧mȩttö̧mä̧. ¹⁷ Ucu cui̧tti̧mö̧mä̧ jurunä ppa̧'ä̧chä̧tö̧, jitö si'epö icuäjätömä tti̧hua̧'a̧nä̧. ¹⁸ Topi cuippeyänä ja̧'hua̧ta̧'a̧nö̧ adiu topi, juätö o'catoi'önä ji̧nä̧ yo̧mȩtȩ ca̧ca̧cui̧pö̧ cu̧ja̧'a̧cu̧ rȩbȩhui̧pä̧tö̧. Isopäi'önä Ttömä̧ chö̧ja̧'a̧ttö̧, pa̧'a̧nö̧ huäjunätä ji'äu TÖ̧Ä̧NÄ̧HUA̧MÄ̧--ucumä isopäi'önätä̧ rö̧ä̧nä̧ micuäu jähuänä jahuätötä ttö̧'ca̧tä̧cua̧jä̧ ja̧'hua̧nö̧ 'ca̧tö̧ tti'queräiyaju jä̧'i̧nö̧'a̧nö̧ ttö̧ju̧nä̧cua̧jä̧. ¹⁹ Ucumä su̧ro̧tä̧cuä̧hua̧ cuina'anä ja̧'hua̧ta̧'a̧nö̧ jui̧'a̧tä̧ cuina'anä, rȩjȩmä̧ jui̧yä̧jä̧tä̧ ji̧na̧'a̧nä̧, jitämä ttö̧ja̧ recuätö ttö̧ja̧cuä̧mä̧cuä̧jä̧ ja̧'hua̧ta̧nö̧ jitö si'epö icuinä̧tö̧mä̧ ototä ttö̧ja̧cuä̧cuo̧tö̧. ²⁰ Ppo̧'ä̧tö̧ cuajau mo̧ro̧ uhuäpächinä̧tö̧mä̧, cuä̧ju̧cu̧nä̧ pä̧ttä̧cua̧jä̧: Pȩnȩmä̧ ujuturumä juiyo a̧'u̧cuä̧jä̧ ja̧'a̧, ujuturu ja'ute'ö yabonä̧nö̧ cähueti, pȩnȩtä̧ tö̧ja̧cuä̧cua̧'a̧nö̧. ²¹ Ja̧u̧nu̧ o'ca'amä, ucurutä jä̧ttȩpä̧cua̧jä̧: ¿Di ji̧na̧'a̧ pide ji̧'qui̧cha̧hua̧rö̧ ttörö iyinömä? Ttömä ajahuäcuähuänätä ki̧nä̧ju̧sä̧ ja̧'hua̧ta̧nö̧ chi̧tti̧mö̧'i̧nä̧ to'inäju̧sä̧, ko̧ro̧jö̧ra̧'a̧'i̧nä̧ ttȩpi̧nä̧cua̧sä̧, juhua'atäcu recuatä ki̧nä̧ju̧sä̧. ¿Di ji̧na̧'a̧ttö̧ pide ji̧'qui̧cha̧hua̧rö̧ pöttädinömä? Topittö, yorö'isö katätä chu̧ji̧pö̧nä̧ tticuioinä̧cua̧sä̧; ¿Pitömä tottö ichäjätöttö? ²² TÖ̧Ä̧NÄ̧HUA̧MÄ̧ pi̧yȩ pä'ö: "Topittö, ttö̧ja̧ ttö̧ja̧cua̧'a̧cu̧ chu̧mö̧ cä̧dȩpä̧cua̧sä̧, Ttömä banderatä̧ cä̧dȩpä̧cua̧sä̧ ttö̧ja̧rö̧ i̧jȩcuä̧ jö̧nä̧tä̧. Jahuätömä tti̧tti̧mö̧rö̧ ttöjonä ja̧ppo̧hui̧'ö̧ tti'cächäcuotö ja̧'hua̧ta̧'a̧nö̧ tti̧tti̧mö̧ nä̧tö̧rö̧mä̧ ttu'upi'canä huȩnä̧hui̧'ö̧ tti'cächäcuotö. ²³ Ruhuotötä jä̧cua̧'a̧ jahuätörö ttä̧'o̧tö̧ jö̧nä̧ ttȩmä̧cuo̧tö̧mä̧ juhua'atäcu nä̧tö̧ ruhuotömä ppo̧'ä̧tö̧rö̧ tta̧huä̧rä̧cuä̧huä̧ ttö̧ja̧ jö̧nä̧tä̧ ttäcuotö; jahuätömä ucuru ttihue'quiyunä kä̧mä̧dö̧ rȩjȩcu̧ ja̧rȩyu̧ pätti'äcuotö; cu̧jä̧pö̧ i̧sa̧ppȩ topö tta̧'cua̧ tta̧ttȩcuä̧cuo̧tö̧; ja̧'hua̧nö̧ jo̧mȩnä̧ ucumä cu̧huo̧juä̧cua̧jä̧ Ttötä ja̧'a̧ CU̧Ä̧NÄ̧HUA̧MÄ̧ pä'ö; jittö Ttörö tta̧'a̧rö̧ ka̧cuä̧tö̧mä̧ dä'ä ttu'ocotö ttäcuotö." ²⁴ ¿Curä rohuäu 'chottipäjimä rohuähuäcuähuä ttö̧ja̧sa̧rö̧ c'hottipa'anö tä̧ji̧, cärenä pö̧rö̧mä̧ su̧ro̧da̧u̧ pä̧i̧cuä̧tö̧ttö̧mä̧ töipächa'anö tä̧ji̧? ²⁵ Ja̧'hua̧nö̧ ja̧'a̧nä̧ TÖ̧Ä̧NÄ̧HUA̧MÄ̧ pi̧yȩ pä'ö: carenä pȩjä̧tö̧rö̧mä̧ su̧ro̧da̧u̧ttö̧mä̧ 'choicuäcua'a ja̧'hua̧ta̧'a̧nö̧ 'chottipäji'i̧nä̧ 'choicuäcua'a; Ttömä cuaboi̧ya̧rö̧ to'ija̧'a̧cu̧ jȩpö̧ cui̧tti̧mö̧rö̧mä̧ ttö̧ji̧pö̧nä̧ ppä̧dä̧dä̧cua̧sä̧. ²⁶ Ttömä cuaboiyotörömä tta̧mö̧nä̧ ttidepättö chucuäjetä̧cuä̧u̧; ja̧'hua̧ta̧'a̧nö̧ tta̧mö̧nä̧ ttucuoja autä tä̧ttä̧mä̧chä̧cuo̧tö̧, vino ahuipö jä̧'i̧nö̧'a̧nö̧. Ja̧u̧nu̧ o'ca'amä pi̧jä̧ ttö̧ja̧ o'catoi'önä ttu̧huo̧juä̧cuo̧tö̧ Ttötä ja̧'a̧ TÖ̧Ä̧NÄ̧HUA̧ ucuru rä̧huä̧pi̧jo̧mȩttö̧ rä'epö icumä, ja̧'hua̧ta̧'a̧nö̧ ucuru ppä'ädömä, Jacob u̧ru̧hua̧ o'cajuiyönä ju̧ru̧hua̧mä̧.