¹ Jitämä ä̧ju̧cui̧, ucu chumöhuä̧ya̧ Jacobmä, Israel pä'ö'i̧nä̧ mi̧cua̧mä̧, Ttötä pojopö chȩmi̧nä̧cu̧mä̧: ² Pi̧yȩ ja̧'a̧ TÖ̧Ä̧NÄ̧HUA̧ päömä, ucuru aditinö ja̧'hua̧ta̧nö̧ cua̧ju̧ ku̧cuä̧ba̧ jacuättö i̧sa̧ jö̧nä̧ cunä juhua'atäcu ucuru ppä̧dä̧cua̧mä̧: Yecuecuä chu̧mö̧huä̧ya̧ Jacob: ja̧'hua̧ta̧nö̧ ucu Jesurún'i̧nä̧, ucumä pojopö chȩmi̧nä̧cu̧jä̧. ³ Ja̧'hua̧nö̧ ja̧'a̧ Ttömä rȩjȩ ajiya ahua a̧di̧ rö̧jä̧jä̧nä̧ ajiya to̧dä̧cua̧sä̧ ja̧'hua̧ta̧nö̧ aje o̧rä̧'i̧nä̧ rȩjȩ jo̧ä̧jä̧ttö̧ huerächö rö̧nä̧; Ttö ucu cui̧tti̧mö̧rö̧ cha̧'cua̧ru̧hua̧rö̧ chi̧yä̧cua̧sä̧ ja̧'hua̧ta̧nö̧ adiu jö̧nä̧ pähuä'i̧nä̧ cui̧tti̧mö̧rö̧ chi̧yä̧cua̧sä̧. ⁴ Juätömä isä'cua 'cä̧tȩttö̧ buö juottäcuotö, dau aje pö̧o̧mȩ käi jä̧'i̧nö̧'a̧nö̧. ⁵ Ya̧tȩ pä̧cua̧: TÖ̧Ä̧NäÄ̧HUA̧NÄ̧TÄ̧ kö̧sä̧, ka̧ra̧ Jacob iminä huo̧ä̧cua̧ juhua'atäcu ka̧ra̧mä̧ i̧huȩyu̧tä̧cua̧ u̧mö̧ Ö̧Ä̧NÄ̧HUA̧NÄ̧ to̧dȩhuä̧mö̧nä̧, ja̧'hua̧ta̧nö̧ Israel iminä'i̧nä̧ ja̧'hua̧nö̧tä̧ o̧ttä̧cua̧. ⁶ TÖ̧Ä̧NÄ̧HUA̧MÄ̧ pa̧'a̧nö̧ pä''ö-- Israe ttö̧ja̧ ttu̧ru̧hua̧mä̧ ja̧'hua̧ta̧nö̧ ppädäcuähuä i̧sa̧ TÖ̧Ä̧NÄ̧HUA̧ o'cajuiyönä ju̧ru̧hua̧mä̧: Ttömä ä̧cuo̧mȩnä̧'i̧nä̧ röjinä̧'i̧nä̧ i̧sa̧sä̧; Ttöttö'i̧nä̧ ka̧ra̧ Diosmä toa'a. ⁷ ¿Dijättö̧ ka̧ra̧ Ttö'anö hua̧mä̧? Jittähua'anä ja̧'a̧tä̧ topitö, ja̧'hua̧ta̧nö̧ chu̧mö̧huäyotö täbo ttö̧ja̧rö̧ chu̧ju̧ni̧no̧mȩttö̧ kä̧mä̧dö̧ jittähuipa'anä ja̧'hua̧ta̧nö̧ i̧chä̧cuȩ'i̧nä̧ jittähua'anä̧ ja̧'a̧tä̧ topitö. ⁸ Yecuecuätucuä, yecuecui'ätucuä. ¿Mo̧ täbocutä päi'önä 'cuäopö̧cuȩmä̧ ji'ähuocö pinösä? Ucutumä ä̧ju̧cui̧nä̧tö̧jä̧: ¿Diosmä Ttöttö'i̧nä̧ ka̧ra̧ Dios ö̧ja̧'a̧? Inähuä korohuämä juiya'a; koro ka̧'a̧mä̧ Ttömä jȩru̧pa̧sä̧. ⁹ O'catoi'önä a̧'cuä̧juä̧ o'ca tätö aditätömä micuähuocotö; jahuätö ku'quecunä tottömä micuähuocö ja̧'a̧; jȩtta̧'a̧ topätömä tottö juiyönä huotö, ji̧yȩtȩ'i̧nä̧ jerupätö ja̧'hua̧nö̧ jo̧mȩttö̧ jahuätömä da'ä ttöhuähuänätä̧ ku̧nä̧huo̧tö̧. ¹⁰ ¿Ditättö̧ ttö̧ä̧nä̧hua̧rö̧ aditö'anö hua̧mä̧ ja̧'hua̧nö̧ jo̧ca̧'a̧ttö̧'i̧nä̧ a̧'cua̧juä̧ isä'ca micuähuoco'ca ku aditö'anö hua̧mä̧? ¹¹ Topittö, jahuätucu ppä̧'ä̧chä̧rä̧tö̧mä̧ dä'ä ttuhuähuänä̧tä̧ rötähuäcuotö, tä̧tä̧rö̧ aditätömä ttö̧ja̧ jö̧nä̧tä̧ huotö. Yo̧mȩtȩnä̧ ä̧rä̧mi̧'ö̧ ttö̧ja̧cua̧'a̧nä̧ ja̧'a̧tä̧ topitö; jahuätö yettecui'äcuotö ja̧'hua̧ta̧nö̧ dä'ä ttuhuähuänä̧tä̧ ku̧nä̧huä̧cuo̧tö̧. ¹² Cuoräuttö adicuä ttö̧ja̧sa̧mä̧ ji̧yȩtä̧ juei adicuänätä̧ aditö, a̧'cua̧juä̧ ku̧nö̧, ä̧ya̧ri̧sa huä̧mȩ rötö 'cuäi'önä̧. Ja̧u̧mä̧ 'tahuähuäyunä̧ 'ta'ö aditö, u̧mö̧nä̧mä̧ ujuru o'cajuiyönä̧ aditö. Ja̧u̧mä̧ ucua pä'ö'i̧nä̧ ppä̧i̧rö̧jä̧cu̧ ja̧'hua̧ta̧nö̧ ujuru'i̧nä̧ beipächäcu; ja̧u̧mä̧ ajiya ahuocomenämä diyapächi'ö. ¹³ Dauttö adicuä ttö̧ja̧sa̧mä̧ dau isodämä isappänä pa̧ja̧tö̧ rö̧nö̧ i̧sa̧ri̧nä̧ saropö. Ji̧yȩtȩ juäi adicuänä ji̧yȩtȩ a̧'cua̧juä̧ aditö ja̧'hua̧nö̧ aditömä̧ jä̧ro̧bö̧nö̧ sarocuänä saropö. Ja̧u̧ ttö̧ja̧sa̧ a̧'cua̧jua̧ jö̧'a̧cuä̧ aditö, ttö̧ja̧sa̧ korotö tottönä hua̧rö̧, ttoju isodenä do'ädö ttu̧ju̧nä̧cua̧'a̧nö̧. ¹⁴ Ja̧u̧mä̧ cedro dau'i̧nä̧ 'cui'opöcö̧, ciprés dauttö'i̧nä̧ 'cui'opöcö̧, roble dauttö'inä 'cui'opöcö̧. Chutätä daumä de'attö ȩmö̧ chö̧. Ja̧u̧mä̧ conífero dau ku̧nu̧ ja̧'hua̧nö̧ u̧ju̧na̧'a̧mä̧ ajiyatä buo juoepiyäcu. ¹⁵ Ja̧'hua̧nö̧ ja̧'a̧ ttö̧ja̧sa̧mä̧ ja̧u̧nä̧mä̧ ocurä'i̧nä̧ kuhuö ja̧'hua̧nö̧ kuhuö du̧'o̧sȩnö̧ jö̧nä̧ täjecu. Ja̧'hua̧nö̧ kuhuömä u̧cuä̧ pan'i̧nä̧ ȩttö̧. Ja̧'hua̧nö̧ ja̧'a̧ ja̧u̧mä̧ ja̧u̧nä̧tä̧'i̧nö̧ ö̧ä̧nä̧hua̧ a̧'u̧cuä̧ aditö ja̧'hua̧nö̧ aditi'ö'ca̧mä̧ ja̧u̧ ä'ca jo̧mȩ ja̧rȩyu̧ pä'ipä'chö; ja̧u̧mä̧ a̧'cua̧juä̧ isä'ca'i̧nä̧ aditi'ö'ca̧mä̧ ja̧u̧ ä'ca jo̧mȩ ja̧rȩyu̧ pä'ipä'chö. ¹⁶ Ja̧u̧ dau isodättö päcuädodämä ocurä kuhuö, i̧sa̧ idepä so'ömä. Ja̧u̧ cui'ipö'ca̧mä̧ su'ädi'ö'ca̧ kö̧. Ja̧u̧mä̧ ja̧u̧nä̧tä̧ du'osȩnö̧ täjecumä pä'ö: "Ah, du'i'äcusä, täcö ocurämä topäjisä. ¹⁷ Ja̧u̧ ku icua'a ka̧cui̧pä̧ji̧ttö̧mä̧ Ja̧u̧mä̧ ö̧ä̧nä̧hua̧rö̧ aditö, ji̧yȩtȩ a̧'u̧cuä̧ 'co̧'ö̧; aditi'ipönä ja̧u̧ ä'ca jo̧mȩ ja̧rȩyu̧ pä'ipä'chö, ucuo te'äu; ja̧'hua̧nö̧ jȩpö̧mä̧ pa̧'a̧nö̧ pä'ö ucuocu: Ppä'äditö ucu chö̧ä̧nä̧hua̧jä̧." ¹⁸ Jahuätömä jerupätö, yorö'iso huo̧jui̧'o̧co̧tö̧, juhua'amä tti'äriyämä ttä̧to̧ca̧'a̧tä̧ ja̧'a̧ttö̧ topocotö ja̧'hua̧ta̧nö̧ tta̧mö̧cuädönä'i̧nä̧ huo̧jui̧'o̧co̧tö̧. ¹⁹ Ya̧tȩ'i̧nä̧ a̧mö̧cuädocö, jitötä'i̧nä̧ ttu̧huo̧jui̧pö̧ juiyönä̧ jä̧u̧mä̧ pä'ötö: Päcuädodämä ocuränä ku icuäjisä; ja̧'hua̧ta̧nö̧ ttömä ja̧u̧tä̧ a̧ya̧ri̧ isäsanämä chu̧cuä̧ pan ȩttä̧ji̧sä̧. Ttömä cuo'ö icuäjäsa huä̧mȩ huä̧nö̧ idepä so'äji'ca̧mä̧ cuäjisä. Ja̧'hua̧nö̧ ja̧'a̧mä̧ ¿Ja̧u̧ttö̧ päcuädodämä surojö ucuo tedähua pä'ö jö̧ chaditö'anö ja̧'a̧ tä̧ji̧? ¿Dau isodä ju'todänätä'i̧nö̧ ä'ca jo̧mȩ ja̧rȩyu̧ pädipä'chö'anö ja̧'a̧ tä̧ji̧? ²⁰ Ja̧u̧mä̧ a̧ya̧ri̧sa cu jä̧'i̧nö̧'a̧nö̧ hua̧; a̧mi̧so'quimä uyaparehuäcu retehuächö, chutä a̧mö̧nä̧ pa̧ja̧tö̧ ö̧ji̧pö̧nä̧ ppädäcuähua pä'ömä jui̧'a̧, ja̧'hua̧ta̧nö̧ päö juiyönä hua̧: "Pi̧yȩ chu̧huo̧jua̧'a̧cu̧nä̧ chu̧ju̧nä̧rä̧cu̧ chö̧ä̧nä̧hua̧mä̧ yaparetä i̧sa̧ ja̧'a̧ jö̧nö̧mä̧." ²¹ Pi̧yȩ a̧mö̧cuädittö, Jacob, Israel pä'ö'i̧nä̧ mi̧cua̧, ucumä chumöhuäya̧jä̧tó: Ucumä i̧sa̧ cunä chaditinä̧cu̧jä̧, ucumä chu̧mö̧huä̧ya̧jä̧, Israel pä'ö mi̧cua̧mä̧, ttömä ucurumä unichi'ocö chä̧cua̧sä̧. ²² Ttömö si'epö icuinö̧sä̧ ajiya isoppa siecuächa'a ja̧'i̧nö̧'a̧nö̧, cucuotocö ji̧nö̧mä̧, ja̧'hua̧ta̧nö̧ ajiya isoppa jä̧'i̧nö̧'a̧nö̧ suronä jȩ'cu̧mä̧ Ttörö ppa̧huä̧cha̧'a̧, ja̧'hua̧nö̧ ji̧yä̧cu̧ Ttötä mitäu chȩmi̧nä̧cu̧jä̧. ²³ Ucutu mo̧ro̧ji̧yä̧mä̧ ra̧'a̧tä̧cui̧, isopäi'önä̧tä̧ TÖ̧Ä̧NÄ̧HUA̧MÄ̧ pi̧yȩ jȩpi̧nö̧; ucutu rȩjȩ tä̧cuä̧jä̧mä̧ huopätucui. Ucutu mö̧ä̧'quiyö pä̧i̧cu̧nä̧ ra̧'a̧tä̧cui̧, ucu dauhuiyä de'a ka̧cu̧'i̧nä̧, isopäi'önä̧tä̧ TÖ̧Ä̧NÄ̧HUA̧MÄ̧ Jacobrömä mitäu ȩmi̧nö̧ ja̧'hua̧nö̧ jo̧mȩtö̧ Israelnä̧mä̧ usärötä i̧jȩpä̧cua̧. ²⁴ Pi̧yȩ TÖ̧Ä̧NÄ̧HUA̧ päömä, ucuru ppädäcuähuä i̧sa̧, cua̧ju̧ ku̧cuä̧ba̧ jacuättö i̧sa̧ juocunä aditinö: Ttötä ja̧'a̧ TTÖ̧Ä̧NÄ̧HUA̧MÄ̧, o'cajuiyönä aditinömä, ka̧tä̧hua̧tä̧, mo̧ro̧jä̧'i̧nä̧ rö̧'ä̧di̧nö̧mä̧, ka̧ta̧hua̧tä̧ rȩjȩ'i̧nä̧ uhuäbe'inömä. ²⁵ Ttö ja̧'a̧ 'cuä̧o̧pä̧cuȩ yapare ji'ähuätörö ra̧huä̧rö̧mä̧ ja̧'hua̧ta̧nö̧ Ttötä ja̧'a̧ 'cuä̧o̧pä̧cuȩ topö ucuocuätörö kö'cocömä; Ttö ja̧'a̧ huo̧juä̧tö̧jä̧ pä'ätörö ttieröhuönä̧tä̧ jȩpö̧mä̧ ja̧'hua̧ta̧nö̧ ro̧'ȩpö̧ jittäu'i̧nä̧ huo̧juȩcu̧nä̧ huocotö jittäu'anötä̧. ²⁶ Ttö, TTÖ̧Ä̧NÄ̧HUA̧TÄ̧ ja̧'a̧ ucu chumöhuäya̧ cui̧huȩnä̧ isojuoäcua'a pä'ömä ja̧'hua̧ta̧nö̧ chu̧mö̧huäyotö huȩnȩ ji'ähuätö'i̧nä̧ jittäunä jȩpö̧mä̧, Jerusalén tö'cömä pä'ätö: Ja̧u̧ ötahuiyänämä ttö̧ja̧cuä̧cuo̧tö̧ ja̧'hua̧ta̧nö̧ Judá rȩjȩnä̧'i̧nä̧, ja̧u̧ o̧dö̧nä̧mä̧ pä'äjita'anö adicuäcua'a juahua'atäcu maächiana'amä pä'äjita'anö chä̧rä̧bȩ'ä̧cua̧sä̧; ²⁷ De'ähuotö tö'cömä tocu pättättö: Jo'i'i ja̧'hua̧nö̧ pä'ömä Ttötä ajemä jo'ädö chi̧cuä̧cua̧sä̧. ²⁸ TÖ̧Ä̧NÄ̧HUA̧TÄ̧ ja̧'a̧ Ciro ötö'cö'i̧nä̧ pä̧cua̧mä̧: Ja̧u̧mä̧ Ttö chu̧ru̧hua̧ jö̧nä̧ tta̧'a̧rö̧ ja̧'a̧, o'cajuiyönä jȩö̧nä̧ ttörö pä̧huä̧rö̧jö̧tä̧ jȩä̧cua̧; Ja̧u̧mä̧ Jerusalén ttö̧ja̧ jȩttä̧cuȩ'i̧nä̧ pä̧cua̧: Ja̧u̧ ötahuiyämä pä'äjita'anö adicuäcua'a: ja̧'hua̧ta̧nö̧ Diosrö ucuocuähuode tö'cömä: "chu̧huä̧rö̧nä̧ kä̧cuo̧mȩtä̧ ttu̧ju̧na̧ pä'ö ja̧'a̧.