¹ Pide ja̧'a̧ ttö chu̧mö̧huä̧ya̧ 'chu̧dä̧rä̧cu̧mä̧; pojopö chȩmi̧nä̧cu̧mä̧, Ja̧u̧nä̧ cha̧'cua̧ru̧hua̧rö̧ ku̧ni̧nö̧sä̧, ko̧ro̧jä̧ ttö̧ja̧rö̧ adihuomenä jȩä̧cuä̧huä̧ i̧'cä̧chä̧cua̧. ² Ja̧u̧mä̧ huopocö jä̧cua̧ ja̧'hua̧ta̧'a̧nö̧ rö̧ä̧nä̧ rä̧mi̧pä̧nä̧'i̧nä̧, mä̧nä̧ttä̧ ttä̧ju̧cu̧n'i̧nä̧ huopocö jä̧cua̧. ³ Na̧ja̧'quȩ meru i̧cuä̧huä̧'quȩmä̧ ja̧'hua̧ta̧'a̧nö̧ isärämä u̧cua̧pö̧nä̧ cuoa'anä̧ nahui̧po̧ca̧'a̧ jä̧cua̧'a̧; ja̧u̧mä̧ päina'acu̧tä̧ adihuomenä jȩä̧cua̧. ⁴ Ja̧u̧mä̧ na̧'a̧chi̧po̧cö̧ jä̧cua̧ ja̧'hua̧ta̧'a̧nö̧ ja̧'a̧tä̧mä̧ pä'i'ocö jä̧cua̧ pi̧jä̧ rȩjȩnä̧ adihuomȩnä̧ jȩo̧mȩ jubö; jäyoto ka̧cuä̧tö̧mä̧ ji̧yȩtȩ hueähuä huȩnȩ tta̧'a̧rä̧tö̧. ⁵ Pi̧yȩ ja̧'a̧ TÖ̧Ä̧NÄ̧HUA̧ Dios päömä Ja̧u̧mä̧ mo̧ro̧jä̧'i̧nä̧ uhuäbe'inö̧ ja̧'hua̧ta̧'a̧nö̧ otodinö̧, Ja̧u̧mä̧ rȩjȩ'i̧nä̧ uhuäbe'inö juhua'atäcu ja̧huä̧jä̧nä̧ ka̧cu̧ u̧huä̧ju̧ iyö'i̧nä̧, Ja̧u̧tä̧ ja̧'a̧ ttö̧ja̧ tta̧'cua̧rö̧ iyinö'i̧nä̧ ja̧'hua̧ta̧'a̧nö̧ ja̧huä̧jä̧nä̧ ka̧cuä̧tö̧rö̧'i̧nä̧. ⁶ "Ttö TTÖ̧Ä̧NÄ̧HUA̧MÄ̧ adihuomenä huoäcujä ja̧'hua̧ta̧'a̧nö̧ cu̧mö̧nä̧ 'chu̧huä̧rä̧cu̧jä̧. Ucurumä yo̧mȩtȩ ku̧ju̧nä̧ jȩchä̧cua̧jä̧ juhua'atäcu ttö̧ja̧cu̧ esecu cu̧ju̧nä̧ jȩchä̧cua̧jä̧, ttö̧ja̧rö̧ tȩya̧u̧tä̧ jö̧nä̧, ⁷ Ä̧to̧cä̧tö̧ tti'äriyä bachächipa pä'ömä, cärenä ttö̧'ȩjo̧mȩttö̧ rättopächa pä'ömä ja̧'hua̧ta̧'a̧nö̧ jitö isode jacuä yo̧u̧nä̧ ka̧cuä̧tö̧mä̧ tȩya̧u̧ tottäcua'anö. ⁸ Ttömä̧ CU̧Ä̧NÄ̧HUA̧TU̧CU̧SÄ̧ pi̧yȩ ja̧'a̧ chi̧mi̧mä̧; chusärumä ka̧ra̧rö̧mä̧ iyocö chä̧cua̧sä̧, ja̧'hua̧ta̧nö̧ Ttö ra̧dö̧'i̧nä̧ 'co̧'ö̧ adicuä'carömä iyocö chä̧cua̧sä̧. ⁹ Topätucui, täbo jähuämä 'cuäopina'a, jitämä̧ jareö jähuätä jidähua pä'ö kö̧sä̧. Ja̧u̧ 'cuäopäcua'a ä'canä ttömä ji̧dä̧huä̧cua̧sä̧ pi̧yȩmä̧. ¹⁰ TÖ̧Ä̧NÄ̧HUA̧RÖ̧ ra̧'a̧tu̧cui̧ jareö ra̧huä̧huä̧, ja̧'hua̧ta̧'a̧nö̧ ja̧u̧ ra̧huä̧huä̧mä̧ pi̧jä̧ rȩjȩ beipome jubö; ucutu aje rö̧o̧to jacuättö kä̧'ä̧mä̧tö̧mä̧ ja̧'hua̧ta̧'a̧nö̧ o'catoi'önä ja̧u̧nä̧ ka̧cuä̧tö̧mä̧, jäyoto ju̧huȩnȩtä̧ ka̧cuä̧tö̧'i̧nä̧. ¹¹ ¡Rȩjȩ jui̧yä̧jä̧ huopi ja̧'hua̧ta̧'a̧nö̧ ötahuiyä ttö̧ja̧'i̧nä̧, Kedar ötahiyänä ka̧cuä̧tö̧'i̧nä̧, eseu huopätucui! Sela ötahuiyä ttö̧ja̧ ra̧'ä̧tu̧cui̧, jahuätö mö̧ä̧'ca ju'tättö huopätö. ¹² TÖ̧Ä̧NÄ̧HUA̧RÖ̧MÄ̧ usärutä iyätucuirö juhua'atäcu aje jäyotö kä̧tö̧mä̧ churutä ra̧'ä̧tu̧cui̧. ¹³ TÖ̧Ä̧NÄ̧HUA̧MÄ̧ curä rohuäu 'cua̧rö̧nä̧ rä̧o̧pä̧cua̧; ya̧tȩ ttö̧ja̧sa̧ curä urohuähuomenä ä'cuoyäu räoa'a jä̧'i̧nö̧'a̧nö̧. Huo̧ä̧cua̧ ja̧'hua̧nö̧tä̧, ja̧u̧mä̧ du̧ru̧ä̧cua̧ curä tturohuähua'a jä̧'i̧nö̧'a̧nö̧; ja̧u̧ ujurumä̧ i̧jȩpä̧mä̧ aboiyotörömä. ¹⁴ Ttö recuo mo̧ro̧ 'coruchi'ö ki̧nö̧sä̧; koro'i̧nä̧ jȩcho̧ca̧'a̧tä̧ ja̧'hua̧ta̧nö̧ rädopoca'atä; jitämä, huo̧chä̧cua̧sä̧, isaju uhuäbecu huoja'a jä̧'i̧nö̧'a̧nö̧; ppa̧'ä̧dä̧rö̧ juä̧chä̧cua̧sä̧. ¹⁵ Ttömä mö̧ä̧'canä'i̧nä̧, po̧ri̧yä̧'tä̧ päi'ome kä̧cuä̧tö̧rö̧mä̧ chujuatädi'äcua̧sä̧ ja̧'hua̧nö̧ jo̧mȩnä̧ dauhuiyämä jo'ädö chi̧cuä̧cu̧sä̧ ja̧'hua̧nö̧ jȩpö̧ ajehuiyämä kä'co o̧sa̧ jö̧nä̧tä̧ pärotö chi̧cuä̧cua̧sä̧ juhua'atäcu ajiya acu ose jo'ädö chi̧cuä̧cua̧sä̧. ¹⁶ Ttömä ä̧to̧cä̧rö̧ mä̧nä̧ tti̧ȩru̧huä̧mä̧nä̧ chi̧'cä̧chä̧cuä̧u̧, jahuätö yorö'iso tti̧ȩru̧huä̧mä̧nä̧ odipä̧cua̧sä̧. Ttömä jahuätö ttä'ca jo̧mȩttö̧ yo̧u̧mä̧ tȩya̧u̧ jö̧nä̧tä̧ pärotö chi̧cuä̧cua̧sä̧ juhua'atäcu hui̧sa̧u̧mä̧ jue'epö chi̧cuä̧cua̧sä̧. Pi̧yȩmä̧ ttötä jȩchä̧cuȩ ja̧'hua̧nö̧ jȩpö̧mä̧, chi̧cui̧po̧co̧u̧ ttäcuotö. ¹⁷ Jahuätömä tto'ca'acu ppa̧ttä̧chä̧cuotö, jahuötörömä dä'ä ttuttunä̧tä̧ jȩpä̧cuä̧huä̧cuo̧tö̧, jahuätö 'co̧'ö̧ adicuä'catä tta̧'cua̧ huȩnä̧rä̧tö̧mä̧, i̧sa̧ a̧'u̧cuä̧ cuoräuttö ku icu adicuätä: "Ucutu ja̧'a̧ tö̧ä̧nä̧huo̧tö̧mä̧ pä'ätörömä." ¹⁸ Ucutö järiyähuätömä, ä̧ju̧cuä̧tu̧cui̧; ucutu ä̧to̧cä̧tö̧mä̧ topätucui, to'cuätucu'anö̧ jö̧ttö̧mä̧. ¹⁹ ¿Dijä̧ttö̧ ä̧to̧ca̧mä̧ chu̧mö̧huä̧ya̧ ja̧'a̧ tä̧ji̧? ¿Jä̧ri̧yä̧hua̧mä̧ huȩnȩ ȩpö̧ jiähua pä'ö huedäcu tä̧ji̧? ¿Dijä̧ttö̧ ä̧to̧ca̧mä̧ cha̧hua̧ru̧hua̧ cu̧hucu chesecuäcu tä̧ji̧, ä̧to̧ca̧mä̧ TÖ̧Ä̧NÄ̧HUA̧ u̧mö̧huä̧ya̧ tä̧ji̧? ²⁰ Ucutömä rö̧ä̧nä̧ topätöjä, ja̧'hua̧nö̧ to'cuätucua'anä̧ huo̧jui̧'o̧co̧tö̧jä̧, tä̧ja̧hui̧yä̧tu̧cu̧mä̧ bahuecua'anä yorö'iso ä̧ju̧cuo̧co̧tö̧jä. ²¹ TÖ̧Ä̧NÄ̧HUA̧MÄ̧ eseu chutä adihuomenä jȩö̧mä̧ ja̧'hua̧ta̧'a̧nö̧ chutä hueähuä huȩnȩnä̧ ucuo te'äcuäu. ²² Ja̧hua̧nö̧ ja̧'a̧nä̧ pitö ttö̧ja̧mä̧ ttu̧nä̧u̧cui̧nä̧u̧ ja̧'hua̧ta̧'a̧nö̧ 'cho̧tti̧pi̧nä̧u̧; jahuätömä o'catoi'önä̧tä̧ rejuhuiyänätä tto'epö ku̧nä̧huo̧tö̧; jahuätömä ttȩmi̧pä̧u̧ jä̧'i̧nö̧'a̧nö̧tä̧ huotö ya̧tȩ'i̧nä̧ ppädö juiyönä̧tä̧ ja̧'hua̧ta̧'a̧nö̧ ya̧tȩ'i̧nä̧ pä'ocö: "Tocu i'cächitö jö̧nä̧mä̧!" ²³ ¿Dijä̧ttö̧ ucututtö pi̧yȩ ä̧ju̧cuä̧cua̧mä̧? ¿Dijä̧ttö̧ ä̧ju̧cuä̧cua̧mä̧ ja̧'hua̧ta̧'a̧nö̧ yodoji 'cuä̧o̧pä̧cuȩmä̧? ²⁴ ¿Dijä̧ttö̧ Jacobrö nä̧u̧cuä̧rä̧tö̧rö̧ iyö icuinömä ja̧'hua̧ta̧'a̧nö̧ Israel ttö̧ja̧rö̧ 'cho'ipä'chätörömä? ¿TÖ̧Ä̧NÄ̧HUA̧MÄ̧CÖ̧ ji̧na̧'a̧, ujutu suronä jȩti̧na̧'a̧mä̧ a̧mö̧cuädö u̧ju̧ni̧na̧'a̧cuä̧mä̧ tti̧'cha̧mä̧ pä'ocotö pinä̧tö̧ ja̧'hua̧ta̧'a̧nö̧ hueähuä huȩnȩ'i̧nä̧ päö'acuämä jȩtta̧mä̧ pä'ocotö pinätö? ²⁵ Ja̧'hua̧nö̧ jo̧mȩttö̧ ja'huatörö rö̧ä̧nä̧ ra̧huä̧ri̧pinö, curänä si'epö icutä. Jahuätö ttö̧ja̧cuo̧mȩ jäyänämä säruhuötä kä̧dȩpi̧na̧'a̧, ja̧'hua̧nö̧ ja̧'a̧nä̧'i̧nä̧ huo̧jui̧'o̧co̧tö̧ pinä̧tö̧, kutä i̧cui̧nä̧u̧, ja̧'hua̧nö̧ ja̧'a̧nä̧ isopäi'önä ja̧'a̧ti̧ pä'ömä pä'ocotö pinä̧tö̧.