¹ Ji̧yȩnö̧ mo̧ro̧, pi̧yȩ ra̧huä̧huä̧mä̧ Judá ttö̧ja̧ tti̧rȩjä̧ttö̧ ra̧huä̧huä̧cuȩ. Tidepiyumä yorö'isotä juruhua'a, Diosmä ttoecuäbä'i̧nä̧ tta̧'ä̧rä̧tö̧rö̧'i̧nä̧ ttö̧ji̧pö̧nä̧ ppä'ädäji. ² Äpate ba'epätucui, adiu jȩpä̧tö̧, ja̧hua̧nö̧ jȩtä̧cuo̧tö̧jä̧ pättina'acu̧tä̧ ka̧cuä̧tö̧ dodetta. ³ Ucu cua̧mö̧cuädö ucunä kö̧mä̧, huȩnȩ juiyönä̧tä̧ chu̧'ä̧rä̧cuä̧u̧ kä̧hui̧, juhua'amä ucuru a̧'cua̧ i̧huȩnä̧ra̧'a̧ttö̧. ⁴ 'Cuäopönätä̧ Diosrö cua̧'cua̧ huȩnä̧rä̧tu̧cui̧, isopäi'önä TÖ̧Ä̧NÄ̧HUA̧MÄ̧ inähuä jö̧nä̧ hua̧. ⁵ Juhua'amä jitö ttucuo te'äu ka̧cuä̧tö̧rö̧ kä'ö icuäcua'attö̧; ötahuiyä 'quiyönä aditö ku̧nä̧huo̧mȩ ka̧cuä̧tö̧rö̧mä̧. Ja̧u̧mä̧ ttucuo juiyönä jȩpö̧ i̧cu̧pä̧cua̧, Ja̧u̧mä̧ jȩä̧cua̧ ttucuomä juittächi'ome jubö pätti'önä. Ja̧u̧mä̧ u̧tä̧cua̧ jahuötörömä rȩjȩ i̧sa̧ppȩ pä̧'i̧jo̧mȩ jubö päi'önä. ⁶ Usurä isotötä 'cuȩcu̧ tticuäcuotö ja̧'hua̧ta̧'a̧nö̧ usurä isotö ttö̧jä̧dä̧u̧ ju̧nä̧tä̧. ⁷ Adiu jȩpö̧ u̧mä̧nä̧mä̧ pä̧mä̧rä̧mä̧ ja̧'a̧, chutä jö̧ta̧'a̧nö̧, Adiu jȩpö̧ u̧mä̧nä̧mä̧ ucutä ja̧'a̧ jue'pömä. ⁸ Ja̧'hua̧nö̧tä̧, ucu jȩta̧ pä'ö huecuinö̧mä̧, TÖ̧Ä̧NÄ̧HUA̧ ucurutä tta̧tä̧rä̧cuo̧tö̧jä̧; Cui̧mi̧'i̧nä̧, ucurutä'i̧nä̧ 'cuäopönä̧tä̧ tu̧ju̧nä̧ra̧ pä̧huä̧rö̧jä̧u̧jä̧. ⁹ Yodo 'cuäo'önä pä̧huä̧rö̧jö̧nä̧ ja̧'i̧ja̧'a̧, ja̧'hua̧nö̧tä̧ jä̧'i̧ja̧'a̧, jacuänä cha̧'cua̧ru̧hua̧nä̧ ucuru usumä̧. Isopäi'önä pi̧jä̧ rȩjȩnä̧ttö̧ ucu huecu ichomenä̧mä̧, pi̧jä̧nä̧ ka̧cuä̧tö̧mä̧ adiu jȩä̧cuä̧huä̧ tö'cötä ttu̧huo̧jui̧'ä̧jä̧. ¹⁰ Suronä̧ jȩpö̧rö̧ adiu jȩä̧cuä̧huä̧ i̧jȩpo̧mȩnä̧mä̧, ja̧'hua̧nö̧ i̧jȩpa̧'a̧nä̧'i̧nä̧ adiu jȩä̧cuä̧huä̧mä̧ huo̧juä̧cho̧cö̧ jä̧cua̧, Pi̧jä̧nä̧ttö̧ ttucuo ku̧nä̧rä̧tö̧rö̧, suronä̧tä̧ jȩpö̧mä̧ ja̧'hua̧ta̧'a̧nö̧ TÖ̧Ä̧NÄ̧HUA̧ ucuomä topocö. ¹¹ TÖ̧Ä̧NÄ̧HUA̧ cu̧mö̧mä̧ cäecua'atä ka̧'a̧, ja̧'hua̧nö̧ ka̧'a̧nä̧ jahuätömä ttu̧'ȩpä̧ri̧'o̧co̧tö̧. Ja̧'hua̧nö̧ ja̧'a̧nä̧ ttö̧ja̧rö̧ cuä'cuoyäutä tottäcuotö ja̧'hua̧nö̧ jo̧mȩnä̧ dä'ä ttuhuähuätä jahuätörömä ku̧ju̧nä̧cua̧jä̧, juhua'amä cuaboiyotö ttucurätä ku icuäcua'attö̧. ¹² TÖ̧Ä̧NÄ̧HUA̧, Ucumä huȩnȩ juiyönä kä̧cuä̧huä̧tä̧ i'cächö cuiyä̧cuä̧jä̧ ujurutumä; juhua'amä isopäi'önä̧tä̧ o'cajuiyötä cuaditähuämä ujuturu ja'ute'ö isojuo'epinö̧jä̧. ¹³ TÖ̧Ä̧NÄ̧HUA̧ ucuttö'i̧nä̧ korotö turuhuotötö ujuturumä̧ hue'inä̧tö̧; ja̧'hua̧nö̧ ja̧'a̧ ujutumä Ucu cuimitä̧ esehuätöjä. ¹⁴ Jahuätömä 'corujuo'ächinä̧tö̧, jahuätömä ko̧co̧tö̧ ttäcuotö, jahuätömä hua'ö icuinä̧tö̧, jahuätömä ä̧rä̧mo̧co̧tö̧ ttäcuotö. Isopäi'önä̧tä̧ ucumä ro̧'ȩpö̧ ichinö̧jä̧ ja̧'hua̧nö̧ jȩpö̧ si'epö cui̧cui̧nä̧u̧, ji̧yȩtȩpö̧nä̧ jȩtti̧nö̧mä̧ ttamöcuädö juiyönä̧tä̧ jȩpö̧ icuinö̧jä̧. ¹⁵ Ucumä ttö̧ja̧ yottähuächönä̧ jȩpi̧nö̧jä̧, TÖ̧Ä̧NÄ̧HUA̧, ttö̧ja̧ ttirecuächönä jȩpi̧nö̧tä̧, ucumä ucuotäcuähuä i̧sa̧jä̧; ucumä tti̧rȩji̧yä̧'i̧nä̧ rö̧ä̧chö̧nä̧tä̧ jȩpi̧nö̧jä̧. ¹⁶ TÖ̧Ä̧NÄ̧HUA̧, huȩnȩ jö̧ pä̧nä̧mä̧ ucurutä usinätö; jahuätömä tta̧'cua̧nä̧tä̧ ucuocuinä̧tö̧ ucucumä jahuätörö ro̧cuȩpo̧mȩnä̧mä̧. ¹⁷ Isaju cu̧cuä̧ba̧ o'cajujuojuäcua'a tö'cöhuächa'a jä̧'i̧nö̧'a̧nö̧, jahuäju o'caju juojomenämä barahuäcua, ja̧'hua̧nö̧ jä̧'i̧nö̧'a̧nö̧tä̧ ucu cuä'ca jome ka̧cuä̧'i̧ja̧tö̧mä̧, TÖ̧Ä̧NÄ̧HUA̧. ¹⁸ Muchotö jö̧nä̧ ka̧cui̧nä̧tö̧jä̧ ja̧'hua̧nö̧ kä̧nö̧mä̧ o'cajuo'inä̧tö̧jä̧, ja̧'hua̧nö̧ ja̧'a̧nä̧ suro isoppatä o'cajuo'inä̧tö̧jä̧. Ujutumä ra̧huä̧pi̧ju̧ttö̧ ki̧'ä̧cuä̧huä̧mä̧ i'cächocotö pinä̧tö̧jä̧ pi̧jä̧ rȩjȩnä̧mä̧ ja̧'hua̧ta̧'a̧nö̧ pi̧jä̧nä̧ ka̧cuä̧tö̧mä̧ ma̧'ä̧cho̧co̧tö̧ pinä̧tö̧. ¹⁹ Ucunä hua'ö icuinä̧tö̧mä̧; ttidepä 'corujuoächinämä ttoächipä̧cuȩ. Porächi'i eseunö ra̧cua̧, ucu rȩjȩ i̧sa̧ppȩnä̧ kö̧mä̧; ucuttö 'chopömä tȩya̧u̧ 'chopa'a jä̧'i̧na̧'a̧nö̧ jä̧cua̧'a̧ ja̧'hua̧nö̧ iyepomenä hua'ö icuinä̧tö̧mä̧ rȩjȩttö̧ rättopäcuotö. ²⁰ Ichätucui, chahuaruhuä, cu̧jä̧tu̧cua̧ pä'ö ku̧nä̧huo̧mȩ cu̧ja̧cuä̧tu̧cua̧ ja̧'hua̧nö̧ do'ächi'ömä cuo'ca'acumä äpatemä mö̧'ȩpi̧, jurunä̧tä̧ dajahuächi'i, ö̧'ä̧i̧ 'cuäo'ome jubö. ²¹ Ja̧'hua̧nö̧ ja̧'a̧ topittö, TÖ̧Ä̧NÄ̧HUA̧MÄ̧ räopa pä'ötä ku̧tó, ö̧jo̧mȩttö̧mä̧ ttö̧ja̧ suronä jȩttä̧ji̧nä̧ ro̧ȩpa̧ pä'ömä, rȩjȩmä̧ cuä'äu tticuä'ijome i̧jȩpä̧cua̧'a̧, ja̧'hua̧nö̧ i̧jȩcuä̧cho̧mȩnä̧ cuä'äu tti̧cui̧nä̧u̧rö̧mä̧ dajäcuähuämä juiyäcua'a.