¹ Pi̧yȩ o'cajuiyönä 'cuäopäji o'ca'a, ja̧'hua̧ta̧nö̧ rö̧ä̧nä̧ pä'cäri jȩpö̧ ttesehuäcuäji o'ca'a, Asiriattö ru̧hua̧ Sanaquerib, ichö Judá tti̧rȩjä̧nä̧ do'ächinö. Ötahuiyä jäyänä 'quiyönä ttoecuä kada'ca kä̧mä̧di̧nö̧ örohuähua pä'ö, ja̧u̧ ju̧huȩnȩ ö̧ji̧nö̧mä̧ ja̧u̧ ötahuiyä 'choipa pä'ö ji̧na̧'a̧. ² Ezequías, Sanaquerib ichäja'a topömä ja̧'hua̧ta̧nö̧ Jerusalén ttö̧ja̧cu̧'i̧nä̧ urohuähua pä'ö jȩi̧yä̧cu̧, ³ ja̧u̧mä̧ ttö̧ja̧ tturuhuotörö'i̧nä̧, ja̧'hua̧ta̧nö̧ su̧ro̧da̧u̧ tturuhuotörö'i̧nä̧ jä'epö ä̧ju̧cui̧nö̧ ajiya rȩjȩnä̧ ötahuiyä u̧mi̧cu̧ttö̧ ichoya mö̧'ȩpö̧ tticua pä'ö; jahuätömä mö̧'ȩpö̧ tticua'amä ppä'ädinä̧tö̧. ⁴ Recuätö ca̧ca̧cui̧pö̧ ajiya rȩjȩ jacuänä̧ ichoya mö̧'ȩpö̧ icuinä̧tö̧ ja̧'hua̧ta̧nö̧ ajehuiyä o̧rä̧ ja̧u̧ rȩjȩnä̧ rö̧jö̧ o̧rä̧'i̧nä̧. Jahuätömä pä'inä̧tö̧: Asiria rȩjȩttö̧ ruhuotö ajiya rö̧ä̧nä̧ ka̧'a̧ ttö̧'o̧cui̧'ö̧ juiyäcua'anö. ²⁷ Ezequíasmä öäre rö̧ä̧nä̧ ku̧nä̧ri̧nö̧ ja̧'hua̧ta̧nö̧ ucuo'o̧i̧nä̧. Ja̧u̧mä̧ ca̧ca̧tö̧ ku̧ni̧nö̧ oro'i̧nä̧, plata'i̧nä̧, inä o'qui rö̧ä̧nä̧ micuäu'i̧nä̧, a̧mȩu̧'i̧nä̧ juhua'atäcu ttoecuäcuähuä obi'i̧nä̧, koro o'cajuiyönä rö̧ä̧nä̧ micuäu'i̧nä̧. ²⁸ Ja̧'hua̧ta̧nö̧ ja̧u̧mä̧ ku̧nä̧ri̧nö̧ u̧huä̧ju̧ ote ku̧nä̧huo̧mȩ'i̧nä̧, vino ku̧nä̧huo̧mȩ'i̧nä̧ juhuatäcu a̧dȩ ku̧nä̧huo̧mȩ'i̧nä̧ ja̧'hua̧ta̧nö̧ ajicuäcuähuotörö ku̧nä̧huo̧mȩ'i̧nä̧. ²⁹ Koro jȩi̧nö̧mä̧, ja̧u̧mä̧ ötahuiyö rö̧ä̧nä̧ aditinö ja̧'hua̧ta̧nö̧ äjicuäcuähuotörö'i̧nä̧ ca̧ca̧tö̧ ku̧ni̧nö̧, juiyo recuätörö, juhua'a Dios öäre rö̧ä̧nä̧ u̧ju̧nä̧rö̧nä̧ iyinä̧cu̧ ja̧'a̧ttö̧. ³⁰ Pi̧dȩ Ezequíastä ji̧na̧'a̧ Gihón aje ju'tänättö̧ tto'epö ku̧nö̧, David idepiyuttömä ttu̧huo̧jua̧'cu̧ jui'ädipö jueönä i'cächinö'i̧nä̧. Ezequíasmä adihuomenä räopina̧'a̧ adita pä'ö a̧mö̧cuädäjimä. ³¹ Ja̧'hua̧nö̧ ja̧'a̧nä̧, Babiloniattö ru̧hua̧cu̧ ippeyänä ruhuo hue'ö aditätömä, ja̧u̧ ö̧ja̧'a̧cu̧ huȩtti̧nä̧u̧, u̧huo̧ju̧ huȩnȩ''i̧nä̧ ja̧huä̧jä̧ rȩjȩttö̧ jȩtto̧cö̧ jä̧'i̧juei jȩä̧'i̧jö̧'i̧nä̧ jä̧ttȩpä̧ri̧ya̧tö̧ pä'ö, Diosmä ja̧u̧rö̧ ka̧cuä̧mö̧ totta'anä̧ ja̧'a̧tä̧ topinö, juhua'amä amiso'quinä̧mä̧ däjetä ku̧nä̧rö̧jä̧ttö̧ pä'ö u̧huo̧jua̧ pä'ö.