¹ Chi phãaur dʉi, púrpura anʉm maigmua lana anʉm magua amach diu khãjũa wajapham khaajeejim anʉm ma santo thʉnʉm aar maagpaawaita jũajeejim anʉm. Amach diu khajierram chi khãjũa Aarón ithee santo sim aar maagpaawai jũajem ajim, magta Ẽwandamau Moiseeg jaauwai sieejim anʉm. ² Besalelau ephod phĩr den waujim, chi phãaur den, púrpura anʉm maigmua lana anʉm den maigmua put lino wajapham anʉm den pʉʉrsiir aujim. ³ Amach diu phĩr pĩisi auwia maigmua dasĩi thʉʉrkha aujierram chi phãaur, púrpura anʉm dʉi jʉ̃pʉyaag ithee maigmua lana anʉm maigmua lino wajapham den, chi phidkhaajemuata mag phidag waukhõchag waujim anʉm. ⁴ Amach diu upheeu gaai jũajem ephod ithee waujierram anʉm, ãba dau numi bigabam khʉʉn ithee. ⁵ I put daĩinaa wajapha khakitajim ephod joota sieejim; ma khĩir ãbpaimuata ephod dʉi wausiejim, put lino anʉmuata phĩir dʉi siir siejim anʉm, chi phãaur, púrpura anʉm maigmua eskarlata anʉm, magta Ẽwandamau Moiseeg jaaupʉatarr aawai. ⁶ Amach diu chi mokdau ónise anʉm denta waujierram, chi bigaau pʉʉrdʉnʉm phĩr den ajim, ma ichmag phãsisijim seyo denjo awia, maigmua phã sisijim chi chaain thʉ̃r 12 Israelam khʉʉn. ⁷ Besalelau ephod upheeu gaai aukherjim mokjo awia Ẽwandam khĩir eyaa aag ithee Israel chaain 12 narr khʉʉn; magta Ẽwandamau Moiseeg jaauwai sieejim anʉm. ⁸ Ich diu chi udigayamja waujim, chi phidag wajapha waaujemua, ephodjoota wau aujim. Phĩrdenta waujim, lana chi phãaur, púrpura maigmua eskarlata dʉi maigmua put lino dem wajapham. ⁹ Ma kajonaata siejim. Amach diu, chj udigayam pheeu sierr phõrr ujierram. Chi durag waisiejim anʉm 21 sm maigmua chi pheeu waisieejim anʉm agjo 21 sm. ¹⁰ Ileer jayap mokdau wajaphamua waukherjierram. nacharam ileerau waisieejim rubí anʉm ãb, moktheegnaa wajapham maigmua ãb mokdau wajapham khĩir phʉphʉisi sieejim. ¹¹ Ileer numiim den waisieejim mokdau esmeralda anʉm den, saphiro ãb waisieejim anʉmmaigmua diamante ãb. ¹² Chi ileer thãrjũpam ee waisieejim anʉm phũag kher duraam jasinto anʉm, ãbmua ágata waisieejim maigmua ãbmua amatista waisieejim anʉm. ¹³ Ileer jayapamua beliro ãb waisieejim, maguaja waisieejim ónise ãb maigmua jaspe ãb. Chi mokdau phĩr dʉita joothʉtkha abam ʉ̃r majim. ¹⁴ Chi mokdau gaai chi khodnaan trʉ̃r Israelpieen 12 nʉm aawai magta chi mok gaai phãkha wainaajierram, thumwe amach thʉ̃r wainʉm gaai. Maata sortik gaai phãsimjota sieejim seyojo awia, amach thʉ̃r ãhãbdu jaau sitheejim chi khodnaan 12 nʉm khʉʉn. ¹⁵ Udi gaai jũag ithee kadenta waujierram, mag phidag phĩr denta kisnegjoo khajierram. ¹⁶ Waujierram ãba phĩr dʉi joothʉdkha maigmua soortik phĩr den numi maigmua chi soortik numi udi gaai jũajem bigaau phʉʉr jõigkha siujierram. ¹⁷ Amach diu phĩr den wauwia kaden soortik gaai jõisiujierram anʉm udi gaai jũaajem bigaau. ¹⁸ Amach diu chi kaden chi khẽu jʉrnaa aba jõisiujierram anʉm chi kuadro numiim gaai. Amach diu ãba makhʉʉn upheeu gaai jũajem ephod den nacharamjo awia. ¹⁹ Amach diu soortik phĩr den numi waujierram maigmua apkhai udi gaai jũajem gaai jõisiujierram anʉm, chi bigaau ag bigaai ierr. ²⁰ Amach diu soortik phĩr den warag numi waujim anʉm maigmua khĩir thẽu khapʉijierram eegar upheeu maajem gaai ephod dakha, mamʉ eegarpai chi kha sim dakha maigmua uchkhun chi ãig ʉgthaagaapai ephod den khasim aig. ²¹ Amach diu chi udigaai jũajem ãba jʉ̃pʉijierram anʉm chi soortik ephod den dʉi jʉ̃gad phãaurau, magta ãba jʉ̃sisieg ajim chi ãig ʉgthaag ephod den khasimjo awia. Amʉ chi udigaai jũajem ẽreupimaaugau ajim ephod gayam. Achamʉ Ẽwandamau Moiseeg jaau wai sierrjoota waujim anʉm. ²² Besalelau put patham theraag ephod denjota waujim put púrpura anʉm den, chi phidag put khaajemuata khajim. ²³ Waisieejim anʉm por ithee weeuparaa jãdacha. Mag weeuparaa sim chi igaai phʉʉrdʉ khasieejim anʉm phak eu den jẽpimaaugau. ²⁴ Chi put eegar phõrrnʉm aar, granadas chi phãaurau pẽe phãpʉijierram, púrpura anʉm, ilo eskarlata maigmua put lino wajapham den. ²⁵ Amach diu kampan phĩr den waujierram anʉm maigmua amach diu chi kampan granada dʉi chi put pomaam bigaau jer ausiujim. ²⁶ Kampan ãb maigmua granada ãb, kampan ãb maigmua kampan ãb, ma chi put pomaam Aarón den igaaitamam. Magta Ẽwandamau Moiseeg jaau wai sieejim anʉm. ²⁷ Amach diu chi khajũaja lino denta khajierram Aarón ithee maigmua chi iewaan ithee. ²⁸ Amach diu put lino wajapham den durag wau aujierram, chi chihoo por gaai jũajũ agjo lino wajapham den ajim anʉm, chi eegar jũajem agjo lino wajapham den ajim, ²⁹ Agjo chi ãigaai jũajũjã lino chi phãaur wajapham den ajim, púrpura den maigmua lana eskarlata anʉm den, mag chi phidag nem jĩirjemuata waujim. Achamʉg wautarr Ẽwandamau Moiseeg jaau waisieejim anʉm. ³⁰ Amach diu agjo chi por gaai jũajũ phĩr den waujim anʉm; amach diu ag gaai phãjim anʉm; jãg seyo gaai phã thʉba simjo awia, " Ẽwandam santo aawai. " ³¹ Amach diu chi put duraam khʉʉn khẽu jʉ̃kha siujierram jʉ̃gad chi phãaurau chi put khẽu wajapham gar. Chamʉta Ẽwandamau Moiseeg jaau wai sieejim anʉm. ³² Magta chi phidag neminaam ʉrkhaajem aig, õor biirdʉajem aig, magta wau aaipajim anʉm. Chi Israelpienauta thumwe wau aaipajierram anum. ³³ Amach diu thumwe Ẽwandamau Moiseeg chi iek jaaupʉatarr waujierram anʉm.Amach diu chi neminaam ãkhaajem Móises aig aubeejim anʉm: maigmua thumwe am di aig neminaam thʉnarr khʉʉn, chi bronse , chi marko, chi barras, pa daphʉm khʉʉn maigmua chi eegar majũ khʉʉn;. ³⁴ Chi tap chib eu den ajim chi phur ee thʉtarr, chi taapjem phak eu den ajim, maigmua chi kortina thuurjem. ³⁵ Chi baaudi testimonio den, makhʉʉn polojo awia maigmua mag chi tap ʉ̃yaagau. ³⁶ Amach diu chi mes aubeejierram, thumwe chi neminaam jua choogjem khʉʉn, maigmua chi pan pod ogdʉba aajem, ³⁷ chi belpaajem piu khapan sim ma phĩr den ajim maigmua chi lampara; ³⁸ chi mesja phĩr den ajim anʉm, chi aseite phuurjem maigmua pabaadeewai thũpha apieejem, chi duugjem aig jiirjoophem neminaam ãkhaajem aig; ³⁹ chi mes bronse den ajim maigmua chi rejiyaja agjo bronse den ajim anʉm maigmua chi pa pomaam khʉʉn maigmua chi jua choogjem khʉʉn maigmua chi kuenka pomaam chi eegar maajem dʉi. ⁴⁰ Amach diu chi jiirjoophem khʉʉn aubeejim anʉm dijãrr pa pomaam gaai jiirjop siwaag ithee chi eegar aukheerjem dʉi, maigmua chi kortina agjo dijarr duugjem aig jiirjop siwaag; chi jʉ̃gad maigmua chi pa daig chi di aig jukhaag; maigmua thumwe chi neminaam iigjem khʉʉn chi neminaam wajapha ʉʉrkhajem ee, chi di biirdʉajem aig. ⁴¹ Amach diu jũajem juau khatarr wajapham khʉʉn aubeejierram anʉm santo sim aig aukheraag, chi chihoo Ẽwandam den ma Aarón ithee chi phad aawai maigmua ich iewaan, amach phadjo am khĩir. ⁴² Magta chi wounaanau Israelpieenau chi phidag waujierram Ẽwandamau Moiseeg jaautarrjoo. ⁴³ Moiseeu chi phidag wajapha oowia, maigmua, chadcha amach diu waujierram anʉm. Chadcha Ẽwandamau amag jaautarrjo, magta amach diu waujierram. Mag nʉm ee Moiseeu bendisieejim anʉm.