¹ Yääje mma yaawä Wanaadi cönaadeuwöi Moises cönä'döa'cä: ² "Edääje ecammacä Israelita wwäiñe: 'Aneeja mmädä ajaatawäiñe nä'döa'dö, yäätä naadö jeiñemma tönnedö u'ajäcä ñäädä Moloc wwä, tämaamö je yeichojo na. Yätoncomo soto näwäjä'ato'de täjuuque. ³ Öwö mmaja ñäädä soto ijumtaca waade, tönnedö u'tujödö weiyajäcä Moloc wwä, wema'de ijaatawä, öwö weichojo chonemajödö weijäcä, yeetö täjeeda tödööjödö yeijäcä mmaja. ⁴ Yaawä aneeja yä'tono aneenejönö nönge yeiyajäcä towanäcä yeichame tönnedö u'ajäcä, aneemada yeiyajäcäiñe mmaja, yaawä Öwö mmaja ñäädä soto täjeeda wödö'ade, ⁵ Öwö dea töjajaiñe wa ñanno wa, tameedä masuudui ja'como, chu'tajä ecanö'namo mmaja. ⁶ Ñanno soto yä'jaacomo woncomo wadeuwödö, chäcatoichomo wwä mmaja nimasuduichato, öwö mmaja ñäädä soto täjeeda wödö'ade; Öwö dea mmaja wema'de ñäädä shimmä dö'tonnoiñe. ⁷ Yaawääne öwö ñäädä Cajiichana Awanaadiyöcomo, yääje yeijäcä, ä'tutäcä änwanno owoijeiñe dea mma, aashicha meichäiye. ⁸ Yääje yeijäcä änwanno ajaichäcä iyä wanonntädö, äwwäiñe tödöödö wetä mmaja. Öwö ñäädä Wanaadi, Ajiishichacomo je asancwajotäiñe wänenedö. ⁹ Tameedä ñanno omotoncomo, anötoncomo jäcä conemjönö nödö'atodö töwäjaamo je naato. Ñäädä omo, anö jäcä conemjönö tödööneijödö näämade. ¹⁰ Ñäädä dhanwa aneeja wodi inño'jano aca töweiyato, aneeja töweichacono jimñamo jeiñe mma, ñäädä dhanwa yääjato, wodi mmaja yäämadöcomo tujunne na a'nädäncädä. ¹¹ Ñäädä dhanwa tuumö jinñamo acä tönnö'cato, tuumö täjeeda nödö'a. A'nädäncäcä yäämadö'como tujunne na, inñedö yuumö jiiñamo mmaja. ¹² Ñäädä dhanwa töjaadanö acä nönö'cadö, yääjato a'nädäncadä yäämadö'como tujunne na. ¹³ Ñäädä dhanwa aneeja dhanwa acä tönnö'cato, wodi acä weiñä nönge, a'nädäncädä yäämädö'como tujunne na iyä inñö´jocomo e'nei. ¹⁴ Ñäädä dhanwa wodiijadä nä´döa´dö, yeenö jaadä mmaja, conemjönö nödö'a, yä'jato tuuca emaadö'como tujunne na, a'nädäncadä dhanwa, wodi mmaja, mädä'jeeda adhantawäiñe yeichö wetä. ¹⁵ Ñäädä dhanwa odocajaato acä tönnö'cato, yäämadö tujunne na, odoocajato mmaja. ¹⁶ Ñäädä wodi odocajaato acä tönnö'cato, yäämadö tujunne na, odoocajato mmaja. Yää inñö'cojocomo e'nei. ¹⁷ Ñäädä dhanwa töjaaduichö acä tönnö'cato, tuumö nnedö acä, senö nnedö acä jeiñe mma, a'nädäncädä yääje yeiyacomjäcä, se'nato conemjönö nödö'a. Tönwanno yäämadö'como tujunne na töjiimä owaadädäiñe, töjaaduichö acä tönnöcö'jödö e'nei. ¹⁸ Ñäädä dhanwa, wodi acä tönnöcato munuuje yeichö awä, conemjönö nödö'a. A'nädäncäcä ñäädä wodi, dhanwa mmaja yäämadä'como tujunne na. ¹⁹ Änwanno änööjaicha mato anötoncomo jaduichö acä, omotoncomo jaduichö mmaja, mädääje täjeeda äwä'jimmä'tädö mödööja. Änwanno dea ännöjocomo mejeemato'de. ²⁰ Ñäädä dhanwa töwaiñene acä nönö'cadö, täjeeda owoodö mödöa. Tönwanno yäämacomjäcä, öwö wiimaminchato'de, yäämacomjäcä mmaja, öwö dea wajäiyade iyä inñacomowoncomo töweiyemö jödö. ²¹ Ñäädä dhanwa tudui jinñamo jada nä'döa'dö, chääjadä yeiyancädä, conenjönö nödö'a. Töwö täjeeda nödöa tudui, öwö wajäiyade iyä omo äwwäiñe inchuudu jatajödö. ²² Yääje yeichame änwanno, yätäädä aweichöcomo tujunne na, äwäätäse'tädöcomo mmaja; Änwanno äwwäiñe iyä tödöödö tujunne na, coneedada aweichöcomo wetä yää nono änwaiñe wu'adö awä. ²³ Änwanno yääje eijaicha maato, aneejacomo iyä tödönnamo jödö nönge, ñanno nönga'como öwö wacöjeeda naato. ²⁴ Öwö äwwäiñe wecammane: "Ännödöcomo je na'de nono; Öwö wu'ade äwwäiñe aashichato aweichocomo je. Öwö ñäädä Acaajichanaichomo Awaanadiyöcomo mmaja, aneejacomo antawonnoiñe odhucannamo jödö. ²⁵ Änwanno odhowanäcäiñe yeichö tujunne na odoocajacomo aashichacomo, noosajacomo mmaja, tadiiñamo ajiichacomo, noosajemjöcomo mmaja. Änwanno ecoodeiñajaicha mato odoocajacomo queiñe, tadiiñamo noosajemjöcomo queiñe mmaja, aneejacomo töweenöcamo wötäädö queiñe mmädä mmaja, ñanno inñanmädä'como önsancwajoodö äwwoncomo je. ²⁶ Änwanno chänönge aweichöcomo tujunne na, öwö Awaanadiyöcomo waadöje, öwö mänsancwajotäne aneejacomo jonno, äwwoncomo je aweichocomo wetä. ²⁷ Ñäädä dhanwa, wodi mmaja yäämajä wwäno wadeuwödö, chuutajä wwäno mmaja, tämaamö je naato ñanno. Soto wwäiñe töwäjä'amo je naatade tönwanno. Mädääje tumja'e cönä´ja'to inñöjocomo jo'tädööje.'''