¹ Yahuwe wakambula kuli Mozesi, kuti, ² ''Bweza Aloni abana bakwe balombe, zyakusama amafuta akunanika mupule wachipayizyo chazibi, abagutu bambelelebabili alimwi achisuwo chazibunge chitakwe busweezyo. ³ Bungania imbungano yoonse kumulyango wakubunganina." ⁴ Mpawo Mozesi wakachita ezyo Yahuwe nzyakamulayilila, alubo mbungano yakabungana aamwi kumulyango watente lyakubunganina. ⁵ Mpawo Mozesi wakati kumbungano, "Eechi nchicho Yahuwe nchalayilila kuti chichitwe." ⁶ Mozesi wakeeta Aloni abana bakwe balombe akubasanzya amanzi. ⁷ Wakazwatika Aloni chigogo akumwanga lukumba muchibuno chakwe, wakamuzwatika antambo akubika efodi alinguwe, wakamwangila efodi alinguwe ili alutambo lweebeka ndwakanzya aalinguwe muchibuno. ⁸ Wakabikka sami lyakaango aali nguwe, alimwi musami lyakaango wakabikka Ulimu a Tumimu. ⁹ Wakamuzwatika chitambala amutwe, alimwi achitambala, kunembo aacho, wakabika mbede yangolida, musini usalala, mbuli Yahuwe mbakali wamulayilila. ¹⁰ Mozesi wakabweza mafuta akunanika, wananika chikombelo azyoonse zyakali mumo akuzipeda kuli Yahuwe. ¹¹ Wakasansila mafuta akunanika aachipayililo kwazyiindi zili musanu azibili akunanika chipayililo azyoonse zibelesyo zyacho, achisambilo atako lyacho kuti azibambile Yahuwe. ¹² Wakatila amwi mafuta akunanika aamutwe waAloni akumunanika kuti amusalazye. ¹³ Mozesi wakeeta bana balombe ba Aloni akubazwatika zizwato. Wakabaanga mulembo kumitwe yabo mbuli Yahuwe mbakamulayililde. ¹⁴ Mozesi wakeeta mupule wakupayizya chibi, alubo Aloni abana bakwe balombe bakabikka maboko aabo aamutwe wasipule ooyo ngubakeetede mbuli chipayizyo chachibi. ¹⁵ Wakamujaya, mpwo wabweza bulowa wabubikka ameja aachipayililo amunwe wakwe, wasalazya chipayililo, wakatila bulowa aatako lyachipayililo akuchisala kuli Leza kuchitila kuti kube bumwi mulinchicho. ¹⁶ Wakabweza mafuta woonse aayo akali mukati, mwakaputidwe chini, ansa zibili amafuta aazyo, alubo Mozesi wakazitenta achipayililo. ¹⁷ Pesi, pule achitobo, anyama yakwe, amafumba wakazitentela aanze aalubuwa, mbuli Yahuwe mbakali wamulayilila. ¹⁸ Mozesi wakimikizya mugutu wambelele kuti chibe chipayizyo chakumpa, alubo Aloni abana bakwe balombe bakabikka maboko aabo aamutwe wamugutu wambelele. ¹⁹ Wakamujaya akusansila bulowa bwakwe kumabazu woonse achipayililo. ²⁰ Wakanenguula mugutu wambelele waba zikkata zikkata, alimwi wakatenta mutwe azikkata amafuta. ²¹ Wakasanzya zyamukkati ansumba amaanzi, alimwi wakatenta mugutu wambelele woonse aachipayililo. Chakali chipayililo chitentedwe chakali abwema bubotu bwa aloma, chituzyo chakachitwa aamulilo kuli Yahuwe mbuli Yahuwe mbakalayilide Mozesi. ²² Eelyo Mozesi wakatola umbi mugutu wambelele, mugutu wakusalazya, alimwi Aloni abana bakwe balombe bakabikka maboko aabo amutwe wamugutu wambelele. ²³ Aloni wawukajaya, alimwi Mozesi wakabweza bumwi bulowa, akububikka kumpela akutwi kwa Aloni kwakuchilisyo, akulambika kuchaala chakuboko kwachilisyo chakwe, akuchala chipati chakukuulu kwakwe. ²⁴ Wakeeta bana baAloni balombe, wakabikka bulowa bumwi kumpela kwamatwi aabo akuchilisyo, akuchala chipati chakukuulu kwabo kwakuchilisyo. Mpawo Mozesi wakasansila bulowa kumabazu woonse aachipayililo. ²⁵ Wakabweza mafuta, mafuta amuchila, awoonse mafuta aayo akaali mukati, akasiside chini, insa zibili amafuta aazyo achibelo chakuchilisyo. ²⁶ Muchisuwo chazibunge chitakwe busweezyo eecho kunembo lya Yahuwe, wakabweza chibunge chimwi chitakwe buswezyo, achimwi chibunge chakananikidwe mafuta, amweendo, akuzibikka aamafuta aachibelo chakuchilisyo. ²⁷ wakazibikka zyoonse mumaboko aaAloni amumaboko abana balombe ba Aloni akuzivukuzya kunembo lya Yahuwe mbuli chipayizyo chakuvukuzya. ²⁸ Mpawo Mozesi wakazibweza kuzwa kumaboko aabo akuzitenta achipayililo mbuli chipayizyo chakuumpa. Zyakali zyakupayizigwa zyakagwisya bweema bununka kabotu bwa Aloma. Chakali chipayizyo chakachitwa amulilo kuli Yahuwe. ²⁹ Mozesi wakabweza katiti akukavukuuzya mbuli chituzyo chakuvukuuzya kuli Yahuwe. Chakali chaabilo cha Mozesi chamugutu wambelele kunanikwa kwamupayizi, mbuli Yahuwe mbakamulayilide. ³⁰ Mozesi wakabweza amwi mafuta aakunanika abulowa bwakali achupayililo; wakasansila eezi ali Aloni, azizwato zyakwe, abana bakwe balombe, azizwato zyabana bakwe anguwe. Muli eyi nzila wakatula Aloni azizwato zwakwe, abana azizwato zyabo kuli Yahuwe. ³¹ Eelyo Mozesi wakati kuli Aloni abana bakwe, "Bizya nyama kumulyango watente lyakubunganina, akulya chibunge chili muchisuwo chakusalazigwa, mbuli mbundakulayilila, kuti, Aloni abana bakwe balombe bayozilya. ³² Kufumbwa eecho chichaala kunyama na kuchibunge welede kuzitenta. ³³ Twelede pe kuzwa aanze amulyango wakunjilila kwamazuba aali musanu aabili, kusikila kumazuba akunanikwa kwako akazuzikizigwe. Nkambo Leza ulakusalazya kwazyiindi zili musanu azibili. ³⁴ Eecho chachtwa zuba eeli - Yahuwe wakachilayilia kuti chichitwe kuti kuchitwe bumwi kulinduwe. ³⁵ Uyokkala sikati amansiku kwazyiindi zili musanu azibili kumulyango wakuswanana, akubamba imbeta zya Yahuwe, kuti atafwi, nkambo eezi nzindakalayilwa." ³⁶ Eelyo Aloni abana bakwe balombe bakachita zyoonse zintu eezyo Yahuwe nzyakali wabalayilila kwiindila kuli Mozesi.