¹ Yawe wakaambula a Mozesi, wakati, ² ''Wambila bantu bakwa Izilayeli, 'Eelyo umwi nabisya katayandide kuti abisye, mukuchita kufumbwa zintu eezyo Yawe nzyakalayilila kuti zitanoochitwi, alimwi na wachita chintu eecho chikasigwa, zitobela zyeelede kuchitwa. ³ Na kakuli kuti mupayizi mupati wabisya mukweeta bubi kubantu bakwe, mpawo ngakapede kuchibi chakwe nchakachita ikapule kachili kanini katakwe kampenda kuli Yawe mbuli muliiyo wechibi. ⁴ Weelede kweeta sipule kumulyango wedumba lyembungano kunembo lya Yawe, abike maanza akwe amutwe wasipule, alimwi akajaye sipule kunembo lya Yawe. ⁵ Mupayizi munanike uyoobweza bumwi bulowa bwa sipule akubutola kudumba lyakubunganina. ⁶ Mupayizi uyoobbizya munwe wakwe mubulowa akusansila bumwi bulowa musanu atubili kunembo lya Yawe, kunembo lyamulembo wachisitilizyo chabusena busalalisya. ⁷ Mpawo mupayizi uyobika bumwi bulowa aameja a chipayililo chatununkilizyo kunembo lya Yawe, ichili mudumba lyakubunganina, alimwi uyotila bumwi boonse bulowa a chikkalilo chachipayizyo chazipayizyo zitentwa, eechi chili amulyango wadumba lyakubunganina. ⁸ Uyoogonkola inyama yoonse yasipule wachitulo chazibi; imafuta ayo avumba nyama yamukati, luvumbula lwamafuta loonse ilujisini azyamukati, ⁹ insa zyobile aluvumbula luli alinzizyo, zibambene a lulyang'anga, aantomwe aluvumbula lwachini, aantomwe ensa - akazigonke zyoonse eezi. ¹⁰ Uyoyinenga yoonse, mbuli mbwayinenga kuyigisya kuli sipule wachipayizyo chachituzyo chalumuno. Mpawo mupayizi uyozitente zipanzi eezi achipayililo kazili zipayizyo zyakutenta. ¹¹ Ichitobo chapule alimwi ayimwi nyama yasyala, aantomwe amutwe wayo alimwi amawulu aayo azyamukati alimwi abufumba, ¹² ayimwi yoonse nyama yapule - ngakabweze eeyi yoonse akwitola aanze ambungano akwitola kubusena oobo mbobakasalazizya ndime, ooko nkobasowela mulota; bayotenta nyama isyede ankuni. Beelede kuyotenta nyama isyede eeyo ooko kusowelwa mulota kuchaala. ¹³ Na imbungano yoonse ya Izilayeli yabisya kitayandide kubisya, alimwi imbungano kitazi kuti babisya akuchita zintu eezyo Yawe nzyakalayilila kuti zitachitwi, alimwi na balimvwa mulandu, ¹⁴ mpawo, eelyo chibi nchibakachita chazibinkana, mpawo mbungano yoonse yeelede kuyopa chituzyo chapule munini wachituzyo chachibi kunembo lya dumba lyakubunganina. ¹⁵ Bapati bembungano bayobika maboko amutwe wapule kunembo lya Yawe, alimwi pule uyojayigwa kunembo lya Yawe. ¹⁶ Mupayizi munanike uyoyeta bumwi bulowa bwapule kudumba lyembungano, ¹⁷ alimwi mupayizi uyoobbizya munwe wakwe mubulowa akuyoolisansila musanu atubili kunembo lya Yawe, kunembo lya chisitikizyo. ¹⁸ Uyobika bumwi bulowa ameja achipayililo eecho chili kunembo lya Yawe, eecho chili mukati kedumba lyakubunganina, alimwi uyotila boonse bumwi bulowa etako lyachipayililo chazituzyo zyakutentwa, eecho chili amulyango wadumba lyembungano. ¹⁹ Uyonenga akugwisya mafuta kuzwa kulinchicho akuyochitenta achipayililo. ²⁰ Eezyo nzenzizyo nzyayelede kuchita apule. Mbubonya mbuli mbwakachita apule utililwa zibi, mbombubo mbwayelede kuyochitila pule oyu, alimwi mupayizi uyopa chituuzyo cha bantu, alimwi bayolekelelwa. ²¹ Uyobweza pule akumugwisya anze kwembungano akuyomutenta mbuli mbwakatenta pule mutaanzi. Eechi nchechituuzyo chazibi zyembungano. ²² Na muzuluzi wabisya katakwe chilangilizyo chakubisya, mukuchita kufumbwa chezintu Leza wakwe nzyakakasya kuti zitanoochitwi, ²³ alimwi uli azibi, mpawo chibi chakwe nchakachita chazibisigwa kuli nguwe, uleelede kulyeetela mpongo yachipayizyo, pule utakwe kampenda. ²⁴ Uyobika kuboko kwakwe amutwe wampongo akwiijana abusena aawo mpubajiila zituzyo zitentwa kunembo lya Yawe. Eechi chinoli nchituuzyo chezibi. ²⁵ Mpawo mupayizi uyootola bulowa bwachituuzo amunwe wakwe akuyobubika aameja a chipayililo chazituuzyo zitentwa, alimwi uyootila aanze bulowa eethako lya chipayililo chazituzyo zitentwa. ²⁶ Uyotenta mafuta woonse achipayililo, mbubonya mbuli mafuta aachipayililo chazituuzyo zya luumuno. Mupayizi uyoobamba chituuzyo chamuzuluzi katulangene ezibi zyakwe, alubo mweendelezi uyoolekelelwa. ²⁷ Na umwi wabantu biyo wabisya katakwe chilangilisyo chakubisya, mukuchita kufumbwa chazintu eezyo Yawe nzyaakamulayila kuti atachiti, alimwi aawo nazootilimuka akulimvwa mulandu, ²⁸ mpawo chibi chakwe nchakachita chazibinkana, mpawo weelede kuyoyeta mpongo yachipayizyo chakwe, mpwizi itakwe kampenda, kayili yachibi nchakachita. ²⁹ Uyoobika maboko aakwe ajulu lya chituuzyo akujaya chituuzyo chazibi abusena bwazituuzyo zyakutentwa. ³⁰ Mupayizi uyoobweza bumwi bulowa amunwe wakwe akuyobika ameja achipayililo chazituuzyo zitentwa. Uyotila anze obo bumwi boonse bulowa bwasyaala eetako lya chipayililo. ³¹ Uyonengula mafuta wonse, mbubonya mbuli mbwanengwa akugusya mafuta achipayizyo chezituuzyo zyalumuno. Mupayizi uyotenta woonse achipayizyo kuti apange bweema bubotu bwa aloma kuli Yahuwe. Mupayizi uyochita chituuzyo chamuntu, alimwi uyolekelelwa. ³² Kuti mwalumi weeta mwana mbelele kuti nchechipayizyo chazituuzyo, uyelede kweta kakali kazyazi katakwe kampenda kechibi. ³³ Uyobika ijanza amutwe wachituuzyo chezibi akuyojayila chituuzyo chazibi abusena awo mpobajayila zituuzyo zitentwa. ³⁴ Mupayizi uyobweza bumwi bulowa bwechituuzyo chezibi amunwe wakwe akuyonanika ameja achipayililo chezituuzyo zitentwa, alimwi uyotila anze bulowa boonse etako lyechipayililo. ³⁵ Uyonenga akugusya woonse mafuta, mbubonya mbuli mafuta akabelele mbwanengwa akugusigwa kuzwa kuchituuzyo chechipayililo cha Yahuwe kachipangidwe amulilo. Mupayizi uyochita chituuzyo chakwe chezibi ezyo nzyakachita chazibi ezyo nzyakabisya, alimwi muntu oyo uyolekelelwa.