¹ Musule akuchitika kwazintu ezi, Mozesi a Aaloni bakayinka kuli Falo bakuti, ''Nzeezi Yahuwe, Leza wa Izilayeli, nzyawamba: 'Leka bantu bangu bayinke, kuchitila kuti bakabe pobwe lykusekelela ndime munkanda.'' ² Falo wakati, ''Ngwani Yahuwe? Nkambonzi ninjelede kuswilila kujwi lyakwe alimwi kuti ndileke ba Izilayeli kuti bayende? Nsimuzi Yahuwe; aboobo, nsikoyoleka Izilayeli ayende.'' ³ Bakati, ''Leza waba Hibbulu waswanana andiswe leka twende lwendo lwamazuba atatu munkanda akupayilila kuli Yahuwe Leza wesu kuchitila kuti atatuumyi amalwazi a panga.'' ⁴ Pesi mwami wa Ijipita wakati kuli mbabo, ''Mozesi a Aaloni, nkambonzi nimulikugwisya bantu amulimo wabo? Amubwede kumulimu wanu.'' ⁵ Wakati alimwi, ''Kwaba bantu biingi lino munyika yesu, alimwi mulokubalesya milimu yabo.'' ⁶ Muzuba ndilelyo, Falo wakapa malayilile kubendelezi akuli basikubabelesya. Wakati, ⁷ ''Kutali mbuli kusanguna, tuchiyelede kupa bantu bwizu limbi kuti bawume zitina. Baleke bayinke bakalyete bwizu beni. ⁸ Nikuboobo, uyelede kuyanda kuli mbabo mwelwe ukozyania wazitina mbuli mbubali kuchita lutanzi. Utatambuli ziche, nkambo mbakandu. Nkiinkako nchibawompolola, tuleke tuyinke tukapayilile Leza wesu. ⁹ Yungizya kulema kwamulimu kubantu kuchitila kuti bawubambe akutachinoswilila makani akubeja.'' ¹⁰ Eelyo bapati ababelesyi babantu bakayinka bakwambila bantu bati, ''Nzeezi Falo nzyawamba: Nsichikamupi limbi bwizu.'' ¹¹ Nywe lwanu mulelede kwinka akulijanina bwizu nkomukonzya kubujana, pesi kulema kwamulimu wenu takukowubisigwa pe.'' ¹² Eelyo bantu bakamwayika munyika yonse ya Ijipita kukuyandula zisiko-siko zyabwizu. ¹³ Basikubabelesya bakabasungwazya akuti, ''Mumaninsye milimu yenu, mbuli kuti bwizu bwapegwa kulindinywe.'' ¹⁴ Basimulimu ba Falo bakawuma basikubabelesya baba Izilayeli, abo bantu mbibakabikkide kuti babe bapati babasimulimo. Bapati bamulimu bakaliswini kubabuzya kuti, ''Nkambonzi nimwatagwisya zitina zyonse nzimwambilwa, nikuba jilo kana sunu, mbuli mbumwalikuchita lutaanzi?'' ¹⁵ Elyo basikubabelesya ba Izilayeli bakeza kuli Falo akulila kulinguwe. Bakati, nkambonzi nujata balanda bako enzila ilibobu? ¹⁶ Takuchikwe bwizu buchipegwa kubalanda bako alimbi, pesi bachitwambila: mupange zitina! 'Swebo, tubalanda bako, tulikumvwa nikuba lino, ¹⁷ Pesi Falo wakati, ''Mulibakandu ! Mulibakandu ! Mulati, 'tuzumizye tuye tukapayile kuli Yahuwe. ¹⁸ Eelyo lino mubwede kumulimu. Takuchikwe bwizu buyopegwa kulindinywe, pesi muyelede kuchinochita mwelwe ukozyania wazitina.'' ¹⁹ Basikubabelesya bana ba Izilayeli bakabona kuti bakali mumapenzi nibakabuzigwa, ''Tamuyelede kuchesya mwelwe walubbe wezitina. ²⁰ Bakaswanana a Mozesi a Aaloni, bakayimvwi aanze ang'anda yamwami, bakalizwide kuzwa kuli Falo. ²¹ Bakati kuli Mozesi a Aaloni, ''Yahuwe alange kuli ndinywe akumupenzya, nkambo mwatuchita chisampawuzyo mumeso a Falo abalanda bakwe, mwabikka ipanga mujanza lyabo kuti batujaye.'' ²² Mozesi wakabwedakuli Yahuwe akuti, ''Mwami, nkambonzi mwetela mapenzi kubantu aaba? Nkambonzi niwakandituma lutanzi? ²³ Kuzwa kuchindi chindaza kuli Falo akwambula awe muzina lyako, wachita mapenzi kubantu aba, alimwi takwe aniwangununa bantu bako abunini.''