¹ Lino Bbezaleli a Ohaliyabbu abantu boonse bala luzibo ndubapedwe a Jehova kukuziba kuchita kufumbwa mulimu mukuyaka busena busalala bayelede kuchita milimu kwindila mulizyonse ezyo Jehova nzyakabalayilila.'' ² Mozesi wakiita Bbezaleli, Ohaliyabbu, awonse muntu wakala luzibo ndwakapedwe mumiyeyo, a Jehova, alimwi ababo balamyoyo yakali kupyida kuchita milimu. ³ Bakatambula kuzwa kuli Mozesi zyoonse zipo nzibakali betela kuyasya busena busalala. Bantu bakachili kweta zipo zyakulimvwida chifumo achifumo kuli Mozesi. ⁴ Lino woonse muntu wakali aluzibo wakali kubeleka mubusena busalala kabazwa kumilimu eyo njibakali kuchita. ⁵ Bantu bachita milimu yamaboko bakabuzya Mozesi, ''Bantu balikweta zyiingi zyindilide kwinda zyiingi kuchitila mulimu wa Jehova eeyo njakatulayilila swebo kuti tuchite.'' ⁶ Lino Mozesi wakalayililwa kuti takwe umwi mubusena ucheeta zimwi zipo zyakuyasyanbusena busalala. Mpawo bantu bakaleka kweta ezyo zipo. ⁷ Bakali baba azyakubelesya zyindilide kuvula kumilimu. ⁸ Aboobo woonse muntu wakali kuchita milimu yamaboko akati kabo boonse bakayaka idumba lyakukombela amalembo alimakumi akachitidwe kuzwa kumulembo wamusyobo wasimakaka, musinza wenyangu, aboya busalala kalabwanze bwa Kkelibbimu. Oyo wakala luzibo lwamilimu yamaboko. ⁹ Bulamfu bwalimwi alimwi lembo bwakali makumi obile alamusanu aatutatu tukokola, busasa bwatukokola toone. Woonse malembo akalelene. ¹⁰ Bbezaleli wakaswanizya malembo alimusanu kulilimwi alimwi, alimwi amwi malembo alimusanu wakaswanizya limwi kuli limwi. ¹¹ Wakachita tukole twamusyobo wasimakaka kabatobelezya kumpela kumamanino alembo muchbaka chomwe, alimwi wakachita zikozyania kwindilila kumpela kwamamanino alembo muchibaka chabili. ¹² Wakachita tukole tuli makumi musanu kulembo tanzi atuli makumi alimusanu tukole kumpela lyamamanino alembo kumundando wabili. Abobo tukole otu twakali langene kuli kamwi akamwi. ¹³ Wakachita zijatilizyo zyengolide zili kkumi amusanu akuswanizya malembo amwi angawo kuchitila kuti idumba lyakukombela lijatane. ¹⁴ Bbezaleli wakachita malembo abooya abooya bwempongo kuti libe tente ajulu edumba lyakukombela; wakachita kkumi alimwi ayaya malembo. ¹⁵ Bulamfu bwalimwi lembo bwakali tukokola tulimakumi atatu, abusasa bwalimwi bwakali tukokola tone. Limwi alimwi lyamalembo alikkumi alimwi lyakalelene. ¹⁶ Wakaswanizya malembo alimusanu kuli limwi alimwi aambi alimusanu alimwi kuli limwi alimwi, ¹⁷ Wakachita tukole tuli makumi alimusanu kumamanino ampela lyalembo kuchibela chitanzi, atukole tulimakumi alimusanu kumamanino ampela alembo eelyo liswanizya chibeela chabili. ¹⁸ Bbezaleli wakachita zijatizyo zyamukuba zili makumi alimusanu kuswanizya tende antomwe kuchitila kuti libe chintu chomwe. ¹⁹ Wakachitla dumba lyakukombela chilivumbyo chazikumba chamugutu wambelele ipentedwe busalala, chimbi chilivumbyo chachikumba chebeka kuti chiinke ajulu achecho. ²⁰ Bbezaleli wakachita zisamu zyimvwi kaziya kujulu kuza kuzisamu zyamuunga zyadumba lyakukombela. ²¹ Bulamfu bwachimwi chikunguzyo bwakali tukokola tuli kkumi, abusasa bwachimwi chikunguzyo bwakali kakokola komwe achisela. ²² Chimwi achimwi chikunguzyo chakala nkanka zyazisamu zibili kukuswanizya zikunguzyo zikunguzyo amwi. Wakachita eezi kuli zyonse zikunguzyo zyadumba lyakukombela. ²³ Wakachita zikunguzyo zyadumba lyakukombela muleyi inzila: Makumi abili azikunguzyo kubbazu lyakumusansa. ²⁴ Bbezaleli wakachita zikkazyo zyansiliva zili makkumi one kazyiinka munsi azikunguzyo zili makumi abili. Kwakali zikkazyo zibili munsi kwachikunguzyo chomwe kuti ziswanizyenzikunguzyo amwi, alimwi zikkazyo zibili munsi achimwi zikunguzyo kuswanizya zikunguzyo amwi. ²⁵ Kubbazu lyabili lyedumba lyakukombela, kubbazu lyakunyika, wakachita zikunguzyo zilimakumi abili ²⁶ azikunguzyo zyansiliva zili makumi ane zyezyo. Kwakali zikkazyo izibili munsi kwachikunguzyio chitanzi, izibili zikazyo munsi lyachikunguzyo chitobela, alimwi kaziyobuya. ²⁷ Kusule lyadumba lyakukombela nkulili kumbo, Bbezaleli wakachita zikunguzyo zili musanu achimwi. ²⁸ Wakachita zikunguzyo zibili kumabbazu akusule adumba lyakukombela. ²⁹ Eezi zikunguzyo zyakalaanzene munsi lyezyo pesi kaziswenene ajulu munwenwe yomwe. Wakachita izibili zyazyo muliyeyi inzila kuzyooko izibili. ³⁰ Kwakali izikunguzyo zili musanu azitatu, amwi azikkazyo zyazyo zilimakumi musanu akamwi kuli zyoonse, zikkazyo zibili munsi lyechikkunguzyo chitanzi, izibili zikkazyo munsi lyachikkunguzyo chitobela, alimwi kaziyobiya. ³¹ Bbezaleli wakachita minkulu yezisamu zyamuunga misanu yezikunguzyo yabbazu lyomwe lyedumba lyakukombela, ³² Minkulu ilimusanu kuzikunguzyo zyalimbi ibbazu lyadumba lyakukombela, aminkulu ilimusanu kuzikungzyo kumabazu lyakusule adumba lyakukombela lyakuumbo. ³³ Wakachita minkulu akati kazikunguzyo, ili, akati kajulu, kusikila kumamanino akumasimpilo. ³⁴ Wakavumba zikunguzyo angolide. Wakazichita nwenwe zyengolide, kulinzyo kuti zibe zijatyo zyaminkulu, alimwi wakavumba minkulu angolide. ³⁵ Bbezaleli wakachita malembo amusyobo wasimakaka, amusinza wenyangu,azyaboya busalala, alimwi amulembo uyebeka, kuli muchimo chamakkelebbimu, milimu yabantu balaluzibo. ³⁶ Wakachita mulembo misemo iine yamusamu wamuunga, alimwi wakivumba angolide. Abobo wakachita ngobyobyo zyangolide kumisemo, wakaziyungizya zikkazyo zyansiliva zyone zyazyo. ³⁷ Wakachita chilengelezyo kumulyango watente. Chakachitidwe mumusyobo wasimakaka, musinzanyangu, aboya bwembelele, kabelesya mulembo uyebeka, mulimu wabasiyala malembo. ³⁸ Abobo wakachita zilengelezyo zyamisemo zilimusanu kazila ngobyobyo. Wakavumba ajulu azyo aziponda zyalyo zyangolida. Zikkazyo zyalyo zili musanu zyakali chitidwe kuzwa kumukaba.