¹ Uyake idumba lyakukombela lili amakketeni aabambidwe amulembo mubotu alimwi awuulu yamuteme, yantumbula, iiswankukide kinengulwidwe mbuli Kkelubbimu. Ooyu uyooba mulimo wasikubeza munkutwe abusongo. ² Ibulamfu bwalimwi alimwi kketeni bwelede kuba makumi obile amusanu awatatu makkiyubbiti, ibusasa bube aane kweelana bupati. ³ Imakketeni musanu ayelede kujatanisigwa kulimwi alimwi, alimwi amwi aali musanu lubo ayelede kujatanisigwa kuli limwi alimwi. ⁴ Welede kupanga myoondo yamubala wamuteme kutobelezya aanze lyamunkome wamamanino aakketani lyenkama yomwe. Munzila njiyo ikozyenie, uyelede kuchita mbubo kotobelezya aanze amunkume wakketeni lyamamanino munkama yabili. ⁵ Welede kupanga myondo makumi musanu kukketeni lyakusanguna, alimwi upange myoondo makumi musanu kukketeni lyamamanino kunkama yabili. Uchite eezi kuchitila kuti imyondo isandikane umwi awumwi. ⁶ Welede kuchita zikobela zyangolida zili makumi musanu alimwi uswanizye makketeni antoomwe azikobekelo kuchitila kuti dumba lyakukkombela lijatane. ⁷ Welede kuchita makketeni aaboya bwampongo akuchita bbakasa litavumbe idumba. Welede kuchita makketeni aya abe kkumi alimwi. ⁸ Ibulamfu bwakketeni lyomwe bube makkiyubbiti makumi otatwe, alimwi busasa bwakketeni lyomwe bube makkiyubbiti oone. Limwi alimwi lyamakketeni alikkumi alimwi lyelede kukozyania kukomena aamwi. ⁹ Welede kuswanizya makketeni musanu kuli limwi alimwi amwi makketeni aali musanu alimwi aswanizigwe kuli limwi alimwi. Welede kwaavunga tubili ikketeni lyamusanu alimwi kunembo lyabbakasa. ¹⁰ Welede kuswanizya myondo makumi musanu kumukkome wakketeni lyamamanino lyankomo ntanzi, alimwi mondo makumi musanu kumukome wakketeni lyamamanino eelyo liswanana ankama yabili. ¹¹ Welede kuchita zikobekelo makumi musanu zyamubala wabbulonzi alimwi uzibike mumyondo. Mpawo uswanizye bbakasa antomwe Kuchitila kuti chibe chintu chomwe. ¹² Ichisela chakketeni chisyaala, eelyo bbazu lichaala kalilengelede kuzwa kumakketeni abbakasa, ayelede kulengelela kusule lya dumba. ¹³ Kwelede kuba kkiyubbiti yomwe yakketeni kuti limbi bbazu - eelyo lyachala kubulamfu bwakketeni lyabbakasa lyalede kulengelela kumabbazu aadumba. Kubbazu lyomwe akuli limbi bbazu, kuti lichivumbe. ¹⁴ Welede kuchitla dumba ichivumbyo chachikkumba chembelele chakayanikwa kachisalala, alimwi achimwi chivumbyo chachikkumba chisukidwe kuti chiinde aatala aachechiya. ¹⁵ Welede kuchita busanza bwiimvwi njii bwa dumba kuzwa kumasamu aa akasiya. ¹⁶ Bulamfu bwayimwi ayimwi impanda bwelede kuba ikkumi lyamakkiyubbiti, alimwi ibusasa bwelyo bwelede kuba kkiyubbiti yomwe achisela. ¹⁷ Kwelede kuba inkanka zyobile zyachisamu muchisansa chomwe izyakuswanizya zisanza kuli chimwi achimwi. Welede kuchita zyonse zisanza zyadumba muli njiyeyi inzila. ¹⁸ Iwachita zisanza izyadumba, welede kuchita zisanza makumi obile aabbazu lyakunsi. ¹⁹ Welede kuchita mazeteko aansiliva aali makumi oone atayinke kunsi lyamasanza aali makumi obile. Kwelede kube mazeteko obile munsi lyasanza tanzi kuti zibe zilyatililo zyazyo zyobile. ²⁰ Kubbazu lyabili lya dumba kubbazu lyakumbo, welede kuchita masanza makumi obile ²¹ amazeteko azyo aansiliva makumi oone. Kwelede kuba mazeteko obile munzi lyamasanza itanzi, mazeteko obile kuchisanza chitobela, kaziyobiya mbuboobo. ²² Kubbazu lyakusule edumba kubbazu lyakububbila, welede kuchita zisanza musanu achimwi. ²³ Welede kuchita zisanza zyobile zyamakkona akusule lyadumba. ²⁴ Eezi zisanza zyelede kwaanzana kunsi, pesi kaziswenene ajulu kulubalo lomwe. ²⁵ Kwelede kuba mbubobu kuli woonse obile makkona akusule. Kwelede kuba zisanza musanu azitatu, antomwe amazeteko azyo ansiliva. Kwelede kuba mazeteko aali kkumi amusanu alimwi mubwingi, mazeteko obile munsi lyasanza litobela, alimwi kaziyabuya mbubobu. ²⁶ Welede kuchita zisamu zyamu akkasiya zyiingene - zili musanu nzyazisanza zyalimwi ibbazu lyedumba. ²⁷ Zili musanu zisamu zyingene nzyakuli limbi bbazu lya dumba, alimwi zisamu zyiingene zili musanu nzyabbazu lyakusule adumba kububbila. ²⁸ Izisamu zyiingene zili aakkati kazisanza, nkokuti; akkati aakkati kukuya mujulu, zyelede kusika kumagolelo akumagolelo. ²⁹ Welede kuvumba zisanza angolida. Welede kuchita bwaanzo bwazyangolide, kuchitila kuti zibeleke mbuli zijatizyo zyazisamu zyiingeene, alimwi welede kuvumba zisamu zyiingeene angolide. ³⁰ Welede kwimikizya idumba munzila itobela njiwakatondezegwa aachilundu. ³¹ Welede kuchita kketeni lyamubala wamuteme, muntumbula awuulu iyebeka, alimwi amulembo uumaninide, uli abweengo bwakkelubbimu, imulimu wasimulimu uuli aaluzibo. ³² Welede kuzyaanzika aazisanza zyoonse zyamusamu wa zisanza zyelede kuba azikobekelo zyangolida zibikidwe amazeteko angolide oone, ³³ Welede kwanzika makketeni munsi lyazikobekelo, alimwi welede kweeta mukati ibwaato bwabukamboni. Ikketeni ndyakwanzanisya busena busalala kubusena busalalisya. ³⁴ Welede kubika chivunisyo chabulemu abwaato bwabukamboni, ichili mubusena busalalisya. Welede kubika tafula aanze aakketeni. ³⁵ Welede kubika chikkalilo chelampi kachileyene atafula kubbazu lyakuunsi aanyika kwadumba itafula lyelede kuba kubbazu lyakujulu. ³⁶ Welede kuchita mulengalenga kumulyango wabbakasa. Welede kuuchita amubala wamuteme, wamuntumbula, azibelesyo zyeebeka, amulembo uumaninide uuvungidwe, mulimu wasikuluka. ³⁷ Ikwa mulengalenga, welede kuchita mbandama musanu zyamu akkasiya alimwi uzivumbe angolida. Izikobekelo zyazyo zibe zyengolide, alimwi welede kusala mazeteko aazyo aabbulonzi aali musanu.