¹ Elyo Mozesi abantu ba Isilayili bakayimba lwiimbo oolu kuli Jehova. Bakayimba, "Ndiyoyimbila Jehova nkaambo wazunda chabulemu; mbong'olo amweenzyi wayo wakazisowela mulwizi. ² Jehova ninguzu zyangu alwiimbo, wakandibeda lufutuko lwangu. Ooyu ngu Leza wangu alimwi ndiyoomutembawula, Leza wa taata, ndiyomusumpula. ³ Jehova muzundi; Jehova ndizina lyakwe. ⁴ Wakawaala nkalaki zya Falo abasilumamba mulwizi. Basimulimu basalidwe ba Falo bakabbizigwa mu Lwizi lwa Matete. ⁵ Bunike bwakabavumba; bakabbila mubunike mbuli bbwe. ⁶ Luboko lwako lwachilisyo, Jehova, luli aabulemu munguzu; luboko lwako lwachilisyo, Jehova, wakamwaya basinkondo. ⁷ Mubupati wakasowa aabo bakakubukila. Wakatumina bukali bwako; bwakabalobya mbuli zisense. ⁸ Akuyoya kwampemo zyako maanzi akaba ntunduundu; maanzi ayeta akayimikila mulwi; maanzi malamfu aakayuma mumoyo walwizi. ⁹ Sinkondo wakati, 'Ndiyobaandilila, ndikabayinde, ndiyoobanyanzya nzibalaazyo; chiyandisyo changu chiyoozulila kuli mbabo; ndiyoosomona panga lyangu; luboko lwangu luyoobanyonyoona.' ¹⁰ Pesi wakawungya luuwo lwako mpawo lwizi lwakabavumba; bakabbila mbuli lubulo mumaanzi makali. ¹¹ Nguni uli mbuli nduwe, Jehova, akaati katuleza leza? Nguni uli mbuli nduwe, uli aajulu mubusalali, ulemekwa muntembawuzyo, uchita malele? ¹² Wakatandabika luboko lwako lwachilisyo, mpawo nyika yakabamena. ¹³ Muchizuminano chako cheelede wakazulwida bantu mbwakavuna. Munguzu zyako wakabazulwida kubusena busalala ooko nkukkala ¹⁴ Bantu bayoomvwa, alimwi bayookankama; buyoofu buyoojata bakkala mu Filisitiya. ¹⁵ Mpawo baami ba Idomu bayoyoowa; basilumamba baku Moyabbu bayookankama; bakkali boonse baku Kkenani bayoyaaya. ¹⁶ Buyoofu akukankama kuyoowida aalimbabo. Nkaambo kanguzu zyaluboko lwako, bayooba mbuli bbwe litasunzuluki mane bantu bako bakayinde, Jehova- mane bantu mbwakavuna bakayinde. ¹⁷ Uyoobayobola akubabyala achilundu chalukono lwako, abusena, Jehova, mbwakachita kuti kukkalwe mumo, busalala, Mwami wesu, oobo maboko aako mbwakayaka. ¹⁸ Jehova uyooyendelezya kwalyonse alyoonse." ¹⁹ Nkaambo mbong'olo zya Falo zyakeenda ankalaki zyakwe abeenzyi mulwizi. Jehova wakaboozya maanzi akulwizi aalimbabo. Pesi ba Isilayili bakeenda aanyika njumu mukati kalwizi. ²⁰ Miliyemu musinsimi wachanakazi, muchizi wa Aloni, wakabweza nsaka, aboonse banakazi bakazwa kabali ansaka, balazyana aanguwe. ²¹ Miliyemu wakayimba kuli mbabo: "Mwiimbe kuli Jehova, nkaambo wazunda chabulemu. Mbong'olo amweenzyi wayo wakazisowela mulwizi." ²² Mpawo Mozesi wakasolwedela bantu kuzwa ku Lwizi lwa Matete. Bakazwa baya kunkanda ya Syuli. Bakeenda kwamazuba aatatu munkanda mpawo kakutajaniki maanzi. ²³ Mpawo bakasika ku Mala, pesi tebakakonzya pe kunywa maanzi nkaambo akali kulula. Elyo bakawulika busena oobo kuti Mala. ²⁴ Mpawo bantu bakatongawukila Mozesi akwaamba kuti, '''Tulanywaanzi?" ²⁵ Mozesi wakalila kuli Jehova, mpawo Jehova wakamutondeezya musamu. Mozesi wakawusowela mumaanzi, mpawo maanzi akaba manono kukunywa. Nkuko ooko Jehova wakabapa mulawu muyumu muyumu, alimwi nkuko ooko wakabasunka. ²⁶ Wakati, "Na mwaswiilila kabotu loko kujwi lya Jehova Leza wanu, akuchita chiluleme mumeso aakwe, akupempeka matwi kumalayilile aakwe akuswiilila milawo yakwe yoonse- tandikwe kuyoobika chilwazi aalindinywe eecho nchindibika kuba Ijipiti, nkaambo ndime Jehova umusilika." ²⁷ Mpawo bantu bakasika ku Elimu, ooko kwali misawu yamaanzi ili kkumi ayibili amakumi musanu aabili aa misamu itegwa palumu. Bakakkala nkuko ooko kumbali aa maanzi.