¹ Ang pag-ampo ni Habakuk nga propeta: ² Yahweh, nadungog ko ang balita mahitungod sa imong gipangbuhat , ug nahadlok ako. Yahweh, buhia ang imong buhat sa taliwala niining mga panahona; sa taliwala niining mga panahona ipahibalo kini; hinumdumi nga adunay kalooy sa imong kasuko. ³ Miabot ang Dios gikan sa Teman, ug ang Balaan nga Dios gikan sa Bukid sa Paran. Selah. Mitabon sa kalangitan ang iyang himaya, ug napuno sa pagdayeg kaniya ang kalibotan. ⁴ Uban ang kasilaw sama sa kahayag,duha nga silaw mokidlap gikan sa iyang kamot; ug didto gitagoan niya ang iyang gahum. ⁵ Nag-una kaniya ang makamatay nga balatian, ug nagsunod kaniya ang katalagman. ⁶ Mitindog siya ug gisukod ang kalibotan; mitan-aw siya ug giuyog ang kanasoran. Nalumpag bisan ang walay kataposang kabukiran, ug miyukbo ang walay kataposang mga bungtod. Walay kataposan ang iyang dalan. ⁷ Nakita ko ang mga tolda sa Cushan diha sa kasakit, ug ang panapton sa mga tolda sa yuta sa Midian nga nagkurog. ⁸ Nasuko ba si Yahweh sa kasapaan? Napungot ka ba sa mga sapa, o hilabihan ba ang imong kaligutgot sa dagat, sa dihang misakay ka sa imong mga kabayo ug sa imong madaugon nga mga karwahe? ⁹ Gipagawas nimo ang imong pana nga walay tabon; nagbutang ka ug udyong sa imong pana! Selah gibahin mo ang kalibotan pinaagi sa mga sapa. ¹⁰ Nakita ka sa kabukiran ug nalubag kini tungod sa kasakit. Giagian kini ug dakong tubig nga mihaguros sa ibabaw nila; misinggit ang kinahiladman sa dagat. Gibayaw niini ang iyang mga balod. ¹¹ Wala milihok ang adlaw ug ang bulan sa habog nga dapit nga ilang nahimutangan diha sa kahayag sa imong mga udyong ug nanglupad sila, diha sa kasilaw sa hayag nga kidlap sa imong bangkaw. ¹² Naglakaw ka ibabaw sa kalibotan uban ang kasuko. Imong gigiok ang kanasoran tungod sa imong hilabihan nga kasuko. ¹³ Migawas ka alang sa kaluwasan sa imong katawhan, alang sa kaluwasan sa imong dinihogan. Gibuntog nimo ang pangulo sa panimalay sa daotan aron makita ang liog niini. Selah. ¹⁴ Gitusok nimo ang ulo sa iyang mga manggugubat pinaagi sa kaugalingon niyang mga udyong sanglit miabot man sila sama sa unos aron sa pagpatibulaag kanamo; ang ilang pagpasigarbo sama sa tawo nga molamoy sa mga kabos diha sa tagoanan nga dapit. ¹⁵ Mipanaw ka nga nagkabayo ibabaw sa dagat, ug daw gipundok ang dagkong tubig. ¹⁶ Nadungog ko, ug nangurog ang akong kinasulorang bahin! Nagkurog usab ang akong ngabil tungod sa tingog. Misulod sa akong kabukogan ang pagkadunot, ug nagkurog usab ang akong kinasulorang bahin samtang hilom akong naghulat sa adlaw sa kasakit nga moabot sa mga tawo nga misakop kanamo. ¹⁷ Bisan kung dili na manalinsing ang igera ug wala nay abot gikan sa kaparasan; ug bisan pa kung dili na usab mamunga ang kahoy nga olibo ug wala nay pagkaon gikan sa uma; ug bisan pa kung wala nay karnero gikan sa mga sudlanan niini ug wala nay mga baka sa toril, mao kini ang akong buhaton. ¹⁸ Magmaya gihapon ako diha kang Yahweh. Magmalipayon ako tungod sa Dios sa akong kaluwasan. ¹⁹ Si Yahweh nga akong Ginoo ang akong kusog ug gihimo niyang sama kalig-on sa osa ang akong mga tiil. Gihimo niya nga makapadayon ako sa habog nga mga dapit. -- Ngadto sa pangulo sa mang-aawit, sa akong mga instrumento nga adunay kwerdas.