¹ Mobarog ako sa akong nahimutangan isip tigbantay ug gipahiluna ko ang akong kaugalingon sa bantayanang tore, ug magmabinantayon ako kung unsa ang iyang isulti kanako ug kung unsaon ko pagtalikod gikan sa akong reklamo. ² Mitubag si Yahweh kanako ug miingon, "Isulat kini nga panan-awon, ug isulat kini sa papan nga bato aron ang makabasa niini mudagan. ³ Kay ang panan-awon alang sa umaabot nga panahon ug mahitabo gayod ug dili mapakyas. Bisan kung malangan kini, hulata gayod kini. Kay moabot gayod kini sa dili madugay. ⁴ Tan-awa! Garboso ang tawo nga adunay dili husto nga tinguha. Apan ang matarong magkinabuhi pinaagi sa iyang pagtuo. ⁵ Kay maluibon ang bino ngadto sa batan-on nga garboso aron nga dili siya magpabilin, apan mosamot ang iyang tinguha sama sa lubnganan, ug sama sa kamatayon, nga dili gayod matagbaw. Iyang tigomon ang mga nasod nganha sa iyang kaugalingon ug tigomon ang tanang katawhan alang sa iyang kaugalingon. ⁶ Kay dili ba mahimo kining tanan ug usa ka panultihon aron sa pagbiaybiay kaniya ug usa ka awit aron sa pagbiaybiay kaniya, naga-ingon, "Pagkaalaot sa tawo nga nagpalambo sa dili iya! Kay hangtod kanus-a man nimo dugangan ang kabug-aton sa mga saad nga imong gikuha?' ⁷ Dili ba kaha kalit nga mobarog ang mga tawo nga nagpaak kanimo, ug makamata ang mga nagpalisang kanimo? Mahimong biktima ka alang kanila. ⁸ Tungod kay gitulis nimo ang daghang katawhan, tulison ka usab sa tanang nahibilin nga katawhan. Kay nakaula ka ug dugo sa mga tawo ug ikaw ang nagbuhat ug kasamok batok sa yuta, sa mga siyudad, ug sa tanan nga nagpuyo niini. ⁹ 'Pagkaalaot sa tawo nga nagkulit ug daotan nga pagpamintaha alang sa iyang panimalay, aron mapahiluna niya ang iyang salag sa habog nga dapit aron maluwas siya gikan sa kamot sa daotan.' ¹⁰ Ikaw ang nagdala ug kaulaw sa imong panimalay pinaagi sa paglaglag sa daghang katawhan, ug nakasala ka batok sa imong kaugalingon. ¹¹ Kay mosinggit ang mga bato gikan sa bungbong, ug motubag kanila ang mga babag nga kahoy, ¹² 'Pagkaalaot sa tawo nga nagtukod ug siyudad pinaagi sa dugo, ug nagtukod ug lungsod sa pagkadaotan.' ¹³ Dili ba gikan man kang Yahweh nga makagagahom nga naningkamot ang katawhan alang sa kalayo ug ang ubang mga nasod naghago sa ilang kaugalingon alang sa walay kapuslanan? ¹⁴ Apan mapuno ang yuta sa kahibalo sa himaya ni Yahweh sama nga gitabonan sa tubig ang dagat. ¹⁵ 'Pagkaalaot sa tawo nga nagpugos sa pagpainom ug bino sa iyang silingan- ipahayag ang imong kasuko ug gipahubog mo sila aron makita ang ilang pagkahubo.' ¹⁶ Mapuno ka unya sa kaulawan ug dili sa himaya. Karon panahon mo na! Inom, ug ipadayag ang imong dili pagkatinuli. Ang kopa sa tuong kamot ni Yahweh muabot kanimo , ug ang kaulaw mutabon sa imong himaya. ¹⁷ Ang kasamok nga gihimo sa Lebanon ug ang paglaglag sa mga mananap makapalisang kanimo. Kay nagpaula ka ug dugo sa tawo ug nagbuhat ka ug kasamok batok sa yuta, sa mga siyudad, ug sa tanan nga nagpuyo niini. ¹⁸ Unsa man ang imong makuha sa mga kinulit nga larawan? Kay magtutudlo ug bakak ang tawo nga nagkulit niini, o ang nagporma ug hulagway sa tinunaw nga puthaw; kay nagsalig siya sa kaugalingon niyang binuhat sa dihang gihulma niya kining mga amang nga dios. ¹⁹ 'Pagkaalaot sa tawo nga miingon sa kahoy, 'Pagmata! O ngadto sa hilom nga bato, Tindog!' Makatudlo ba kining mga butanga? Tan-awa, gitaplakan kini ug bulawan ug plata, apan wala gayod kini gininhawa. ²⁰ Apan anaa si Yahweh sa iyang balaang templo! Paghilom diha sa iyang atubangan, tibuok yuta."