¹ Ang nadawat nga mensahe ni Habakuk ang propeta, ² "Yahweh, hangtod kanus-a ako mohilak sa pagpangayo ug tabang, ug dili ka maminaw? Mohilak ako kanimo, 'Kasamok!' Apan dili ka moluwas. ³ Nganong gipakita mo kanako ang kasal-anan ug maglantaw sa dili maayong binuhatan? Ang kalaglagan ug ang kasamok anaa sa akong atubangan; adunay panag-away, ug ang panagbingkil motungha. ⁴ Busa ang balaod nahuyang, ug dili na molungtad ang hustisya. Tungod kay gilibotan sa mga daotan ang mga matarong; busa mikaylap ang bakak nga hustisya." Mitubag si Yahweh kang Habakuk ⁵ "Tan-awa ang mga nasod ug susiha sila; nahibulong ug natingala! Kay magbuhat gayod ako ug usa ka butang sa imong mga adlaw nga dili nimo matuohan sa dihang isugilon kini kanimo. ⁶ Kay tan-awa! Ituboy ko ang mga Caldeanhon-- ang bangis ug madali-dalion nga nasod-- nagmartsa sila diha sa tibuok kayutaan aron sa pagilog sa mga balay nga dili ilaha. ⁷ Makalilisang sila ug gikahadlokan; naggikan sa ilang mga kaugalingon ang ilang paghukom ug pagkahalangdon. ⁸ Ang ilang mga kabayo usab mas paspas pa kaysa mga leopardo, mas abtik pa kaysa mga lobo sa kagabhion. Busa nagpanikad ang ilang mga kabayo, ug lagyo ang gigikanan sa ilang mga tigkabayo-- nanglupad sila sama sa agila nga nagdali aron mokaon. ⁹ Moabot silang tanan alang sa kasamok; mangabot ang ilang kadaghanon sama sa hangin sa kamingawan, ug ilang tigomon ang ilang mga bihag sama sa balas. ¹⁰ Busa ilang gibugalbugalan ang mga hari, ug kataw-anan lamang alang kanila ang mga tigdumala. Gikataw-an nila ang matag kuta, kay gitapok nila ang yuta palibot niini ug giilog kini. ¹¹ Unya mohuros ang hangin; kusog ang paghuros niini-- ngadto sa mga sad-an nga tawo, kadtong ilang kusog mao ang ilang dios." Nangutana na usab si Habakuk kang Yahweh ¹² "Dili ka ba gikan sa karaang kapanahonan, Yahweh nga akong Dios, akong Balaan nga Dios? Dili kami mamatay. Gitagana na sila ni Yahweh alang sa paghukom, ug ikaw, Bato, ang nagtukod kanila alang sa pagsaway. ¹³ Putli kaayo ang imong mga mata aron sa paglantaw sa daotan, ug dili ka makatan-aw sa sayop nga binuhatan uban ang pabor; busa nganong gikaluy-an mo man kadtong nagbudhi? Nganong nagpakahilom ka man lamang samtang gilamoy sa mga daotan ang mga matarong pa kay kanila? ¹⁴ Gihimo mo ang mga tawo sama sa mga isda sa kadagatan, sama sa nagkamang nga mga butang nga walay nagmando kanila. ¹⁵ Gitapok nila sila pinaagi sa mga taga; giguyod nila ang mga tawo pinaagi sa ilang pukot; gitigum nila pinaagi sa pukot; nagmaya ug nalipay siya. ¹⁶ Busa naghalad ug nagsunog sila ug insenso ngadto sa ilang mga pukot, kay pinaagi sa iyang pukot nagkinabuhi siya nga haruhay, ug ang iyang pagkaon mao ang pinakadato nga matang. ¹⁷ Busa iyabyab ba diay nila ang ilang mga pukot, ug magpadayon pagpamatay sa mga nasod sa walay kaluoy?"