¹ Mao kini ang mga butang mahitungod sa Israel nga nadawat ni Amos, nga usa sa mga magbalantay sa karnero sa Tekoa, diha sa panan-awon. Nadawat niya kining mga butanga sa mga adlaw ni Uzia nga hari sa Juda, ug sa mga adlaw ni Jeroboam nga anak nga lalaki ni Joas hari sa Israel, duha ka tuig sa wala pa ang linog. ² Miingon siya, "Modahunog ang tingog ni Yahweh gikan sa Zion; mosinggit siya gikan sa Jerusalem. Mauga ang mga pasibsibanan sa mga magbalantay ug karnero; ang tumoy sa Carmel malaya." ³ Mao kini ang giingon ni Yahweh: "Tungod sa tulo ka sala sa Damascus, bisan sa upat, dili ko isalikway ang silot, tungod kay ilang giusikan ang Gilead pinaagi sa mga hinagiban nga puthaw. ⁴ Magpadala ako ug kalayo sa balay ni Hazael, ug lamuyon niini ang mga kota ni Ben Hadad. ⁵ Gubagon ko ang mga babag sa ganghaan sa Damascus ug putlon ko ang tawo nga nagmando sa Walog sa Aven, ug ang tawo usab nga nagkupot sa septer sa Bet Eden. Pagabihagon ngadto sa Kir ang katawhan sa Aram," miingon si Yahweh. ⁶ Mao kini ang giingon ni Yahweh: "Sa tulo ka sala sa Gaza, bisan sa upat ka mga sala niini, dili ko isalikway ang silot, tungod kay gibihag nila ang tibuok katawhan, aron itugyan ngadto sa Edom. ⁷ Magpadala ako ug kalayo ngadto sa mga paril sa Gaza, ug pagalamuyon niini ang iyang mga kota. ⁸ Patyon ko ang tawo nga nagpuyo sa Ashdod ug ang tawo nga nagkupot ug septer gikan sa Ashkelon. Bawion ko ang akong kamot batok sa Ekron, ug mangamatay ang nahibilin nga mga Filistihanon," miingon si Yahweh nga Ginoo. ⁹ Mao kini ang giingon ni Yahweh; ''Ang tulo ka sala saTyre, o bisan sa upat, dili ko isalikway ang silot, tungod sa pagtugyan nila sa tibuok katawhan ngadto sa Edom, ug gisupak nila ang kasabotan sa pagnag-igsoonay. ¹⁰ Magpadala ako ug kalayo sa mga paril sa Tyre, ug pagalamuyon niini ang iyang mga kota." ¹¹ Mao kini ang giingon ni Yahweh, ''Ang tulo ka sala sa Edom, o bisan sa upat, dili ko isalikway ang silot, tungod kay gigukod niya ug espada ang iyang igsoon ug wala niya kini gikaloy-an. Nagpadayon ang iyang kasuko, ug milungtad hangtod sa kahangtoran ang iyang kapungot. ¹² Magpadala ako ug kalayo sa Teman, ug pagalamuyon niini ang mga palasyo sa Bozra." ¹³ Mao kini ang giingon ni Yahweh, "Ang tulo ka sala sa Amon, o bisan sa upat, dili ko isalikway ang silot, tungod kay gilaslas nila ang tiyan sa mga babayeng buros sa Gilead, aron makapalapad sila sa ilang mga utlanan. ¹⁴ Pagasunogon ko ang mga paril sa Raba, ug pagalamuyon niini ang mga palasyo, uban ang singgit sa adlaw sa pagpakiggubat, uban ang makusog nga hangin sa adlaw sa alimpus. ¹⁵ Mabihag ang ilang hari, siya ug ang iyang mga opisyal," miingon si Yahweh.