¹ Mao kini ang giingon ni Yahweh: "Sa tulo ka mga sala sa Moab, bisan gani sa ika-upat, dili ko gayod bawion ang silot, tungod kay gisunog niya ang mga bukog sa hari sa Edom hangtod nga naabo kini. ² Paulanan ko ug kalayo ang Moab, ug lamyon niini ang mga kuta sa Keriot. Mangamatay ang Moab diha sa kaguliyang, inubanan sa panagsinggit ug tingog sa trumpeta. ³ Laglagon ko ang iyang maghuhukom, ug pamatyon ko ang tanang prinsisa uban kaniya," miingon si Yahweh. ⁴ Mao kini ang giingon ni Yahweh: "Sa tulo ka mga sala sa Juda, bisan gani sa ika-upat, dili ko gayod bawion ang silot, tungod kay gisalikway nila ang balaod ni Yahweh ug wala tumana ang iyang mga kasugoan. Ang ilang pagkabakakon maoy nakapasalaag kanila nga gisubay usab sa ilang mga amahan. ⁵ Paulanan ko ug kalayo ang Juda, ug lamyon niini ang mga kuta sa Jerusalem." ⁶ Mao kini ang giingon ni Yahweh, "Sa tulo ka mga sala sa Israel, bisan gani sa ika-upat, dili ko gayod bawion ang silot, tungod kay gibaligya nila ang mga inosente alang sa plata ug ang mga kabos sa usa ka pares sa sandalyas. ⁷ Gitunobtunoban nila ang mga ulo sa mga kabos sama sa mga tawo nga nagtunob sa abog diha sa yuta; gisalikway nila ang mga dinaogdaog. Ang usa ka lalaki ug ang iyang amahan nakighilawas sa usa ra ka babaye busa gipakaulawan ang akong balaang ngalan. ⁸ Nanghigda sila sa kilid sa matag halaran nga nagsul-ob sa mga bisti nga gikuha ingon nga mga saad, ug diha sa templo sa ilang Dios nanginom sila ug bino gikan niadtong nakamulta. ⁹ Apan giguba ko ang mga Amorihanon sa ilang atubangan, diin ang ilang katas-on sama sa gitas-on sa kahoy nga sidro; kusgan siya sama sa kahoy nga tugas. Bisan pa man niana gub-on ko ang iyang mga bunga ug ang iyang mga gamot sa ilalom. ¹⁰ Usa pa, Gipalingkawas ko usab kamo gikan sa yuta sa Ehipto ug gigiyahan kamo sulod sa kap-atan ka tuig didto sa kamingawan nga gipanag-iya sa mga Amorihanon. ¹¹ Nagpili ako ug mga propeta taliwala sa inyong mga anak nga lalaki ug mga Nazareno gikan sa inyong mga batan-ong lalaki. Dili ba mao man kini, katawhan sa Israel? --mao kini ang pahayag ni Yahweh. ¹² Apan gidani ninyo ang mga Nazareno nga moinom ug bino ug gimandoan ang mga propeta nga dili managna. ¹³ Tan-awa, dugmokon ko kamo sama sa karomata nga puno sa trigo nga modugmok sa usa ka tawo. ¹⁴ Bisan pa ang tawong abtik dili gayod makaikyas; ang kusgan dili gayod makadugang sa iyang kaugalingong kusog; bisan pa ang mga gamhanan dili gayod makaluwas sa iyang kaugalingon. ¹⁵ Dili gayod makasugakod ang tigpana; dili gayod makaikyas ang kusog modagan; ang tawong nangabayo dili gayod makaluwas sa iyang kaugalingon. ¹⁶ Bisan pa ang labing isog nga mga manggugubat mangikyas nga hubo diha nianang adlawa --mao kini ang pamahayag ni Yahweh."