¹ Atsika matanjaka tokony handefitry amin'ny fahalemeny drô mahalemy, sady tsy tokony agnano izay mahafalifaly tegnany. ² Hiangaviagna ny tsirairay mba agnanao raha mahafalifaly ny mpiara-monigny aminazy, fa zegny tsara mba hiposigna izy. ³ Fa na kristy tsy nagnano raha mahafinaritra tegnany. Zegny araka voasoratra hoe :" fagnambanian'olo anao, natreky aminaka." ⁴ Na ino na ino voasoratsara taloha, igny voasoratra mba fampianaragna atsika. Mbaka amin'ny faharetan-tsika draiky mbaka amin'ny soratra masigny no hanagnan-tsika toky. ⁵ Dragnahary faharetagna draiky fampaherezagna hagnamia fisaignana mitovy atsika jiaby araka an'i Kristy Jesosy. ⁶ Izy mba agnano zegny mba ho fisaignana araiky draiky vava araiky mba hideranaro Dragnahary draiky baban'i Tompotsika. ⁷ Noho zegny, mitambara, mitovy nandraisan'i Jesosy Kristy anaro koa, mba fideragna Zagnahary. ⁸ Ambarako anaro fa i Kristy mpanompo'ny voavositry (iro Jiosy) ho an'ny fahamarignan-Dragnahary, mba hahafagna magnamarigny iro fampagnatenagna iro razana, ⁹ ho an-dro Jentilisa mba hagnamezagnn-boninahitra Dragnahary nohon'ny famindram-pony. Zegny araka voasoratra hoe : "Noho zegny agnamia fideragna Anao amin'ny Jentilisa Za ary hihira fideragna agnaranao." ¹⁰ Mbola voavolagna koa hoe : "Miravoravo miaraka amin'ny vahoakany, ry Jentilisa. ¹¹ "Ary ko a hoe : "Derao ny Tompo, ry Jentilisa jiaby, hambila olo jiaby hidera Azy." ¹² Volagniny Isaia koa hoe : "Hisy vahatran'i Jese, ary araiky hitsangana hanapaka eo amin'ny Jentilisa. Hanagna fahatokisagna amin-dro Jentilisa." ¹³ Dragnahary fahaokisagna ane agnamia anaro firavoravogna draiky fiadanagna jiaby amin'ny finoagna, mba ho feno fahatokisagna anaro mbaka amin'ny herin'ny fagnahy masigny. ¹⁴ Tegnako io koa resy lahatra momba anaro, ry rahalahy. Resy lahatra koa za fa anaro feno fahatsaragna, feno fahaizagna jiaby. Resy lahatra koa za fa anaro mahavita mifagnanatra. ¹⁵ Manoratra ampasahiagna aminaro za, mba ampatsiavagna anaro raha sasany draiky, nohon'ny fagnamezan-pahasoavagna namiany Dragnahary za. ¹⁶ Zegny fagnamezan-pasoavagna zegny tokony hanompoako i Kristy Jesosy tany Jentilisa, mba agnamia filazantsaran-Dragnahary. Tokony ataoko zegny mba azo ekegna fagnatitry (raha ateriny) Jentilisa, voatokan'ny fagnahy masigny. ¹⁷ Nohony zegny ny hafaliako ao amin'i Kristy Jesosy draiky raha Dragnahary. ¹⁸ Za tsy hasaky hikoragna na ino na ino koa tsy raha vitan'i Kristy mboka taminaka mba ho fagnikihany Jentilisa za. Iro raha jiaby io vita tamin'ny teny draiky asa, ¹⁹ tamin'ny herin'ny famantagna, fahagagana, draiky tamin'ny herin'ny fagnahy masigny. Zegny mbaka agny Jerosalema, draiky lavidavitry mitovy Ilyrikioma, hahafako magnatanteraka filazantsaran'i Kristy. ²⁰ Amin'ny zegny fagniriako hitory filazantsara, fa tsy hahaizagna agnaran'i Kristy fo, mba hagnoregnana amin'izay efa nagnoregnany hafa. ²¹ Zegny araka voasoratra hoe : "Tamin-dro tsy nahita Izy, hahita Izy, draiky iro tsy naharegny no hahazo." ²² Noho zegny voavasaka matetiky tsy handeha matetiky aminaro za. ²³ Aminy zio, Za tsy managna fahefagna amindro toeragna aby io. Efa taogno nagniriako mare andeha aminaro. ²⁴ Noho zegny, na imbiagna na imbiagna andehanako agny Espana, magnategna za hahita anaro koa fa mandalo, avio aterinaro antany andianako, koa mbaka mankafy fiharagna naro betibetiky Za. ²⁵ Fa amin'ny zio andeha a Jerosalema Za hanompo iro mpino. ²⁶ Fa faravoravognan' i Makedonia sy Akaia hagnano fandraisagna anjara ho an-dro mpino agny Jerosalema. ²⁷ Ia, haravoagna ho an-dro zegny, ary, mpitrosa aminazy koa iro. Fa koa Jentilisa nizara raha masigny dro, tokony hanompo iro ara-materialy. ²⁸ Noho zegny, koa fa nataoko asa ary nagnamafy fa voaray dro vokatra izay navory, andeha a Espaina za hitsidika anaro no diako. ²⁹ Aiko fa za koa mandeha aminaro ka hiditry agnatiny fitahian'i kristy. ³⁰ Niany mampirisiky anaro za, ry rahalahy, amin'ny Jesosy Tompontsika, draiky amin'ny fitiavan'ny Fanahy, mba hiharaka hiady aminaka anaro amin'ny vavaka ataonaro amin-dragnahary. ³¹ Mivavaka mba ho avotro amin-dro izay tsy mankasitraka agny Jodia za, ary mba heken-dro mpino any Jerosalema ny fanompoako. ³² Mivavaha mba hihaviako aminaro ankaravoagna amin'ny sitrapo-Dragnahary, ary hahafako, mahita fitsaragna, miaraka aminaro. ³³ Zagnahary ny fiadanagna anie hiaraka aminaro jiaby. Amen.