¹ Paoly draiky Timoty, mpanompon'ny Jesosy kristy, irô jiaby voatôkana ho an'i Jesosy Kristy zay agny Filipy, miaraka amin-drô mpiandraikitry draiky irô diakona. ² Ho aminarô ane ny fahasoavagna dariky fiadanagna boaka amin-dRagnahary Babantsika draiky Jesosy Kristy Tompo. ³ Misaotra Zagnahary za amin'ny fahatsiarôvako anarô. ⁴ Amin'ny fivavahako anarô jiaby zegny, an-kafaliagna fo agnanovako fivavangna naka. ⁵ Magnamia fisaoragna amin'ny fagnampianarô za amin'ny tenin-dRagnahary, nanomboko tamin'ny vohalohany zisaka zioty. ⁶ Matoky zegny za fa, Izy araiky nanomboko asa tsara taminarô kai hanohy agnatanteraka zegny zisaka amin'nyandra ny Jesosy Kristy. ⁷ Fa tsara aminaka ny mahatsapagna fa kara zegny momba anarô jiaby fotony am-pô naka ato anarô. Anarô jiaby zegny mpiara-miasa taminaka tamin'ny fahasoavagna na tamin'ny figadrako draiky fiharôvako na koa tamin'ny fagnamasignana ny tenin-dRagnahary. ⁸ Fa Zagnahary zegny vavolombelogno naka, fa manigny anarô fatatra za amin'ny famelahankeloko ny Kristy Jesosy. ⁹ y za mivavaka karaty: "Hahay hitombo fo ny fitiavanarô amin'ny fahaizagna draiky amin'ny fahazavan-tsaingny jiaby. ¹⁰ Mivavaka zegny za baika hagneky ny tegna tsara anarô, baika ho tsara fagnahy dariky tsisy tsigny amin'ny andra ny Kristy. ¹¹ Mivavaka koa za baika ho feno vokatra ny fahamarignana araiky boaka amin'ny Jesosy Kristy anarô, ho voninahitry draiky fideragna Zagnahary. ¹² Sady tiako ho hainarô rahalahy, fa irô raha jiaby nandalo taminaka zegny niasa tamin'ny fampandianagna ny tenin-dRagnahary fo. ¹³ Vokatra zegny, ny hidokoako amin'ny Kristy zegny nagnarihary mazava tamin-drô mpiambigny lapa jiaby driaky irô olo hafa. ¹⁴ Ankamaroan-drô rahahy zegny mangna toky maventy amin'ny Tompo nohon'ny fiankignako, sady masaky magnambara tsisy fataôragna volagna irô jiaby. ¹⁵ Ny sasany draiky mitory Kristy amin'ny fana fô draiky fifanipahagna foeky, sady olo hafa draiky amin'ny sitrapô tsara. ¹⁶ Irô farany ty zegny magnano izy amin'ny fitiavagna, mahay fa za napetraka eto andeha hiaro tenin-dRagnahary. ¹⁷ Fa irô vohalohany io mitory Kristy amin'ny fitiavan-tegna, fa tsy hatsaram-pagnahy. Irô igny zegny mihevitry fa hangnakoronagna za izikoa mbala amin'ny fifehezgna naka za. ¹⁸ Ino fo basy? amin'ny fomba jiaby, na fihatsaram-belatsihy na fahamarignana, Kristy fo volagniny, sady ravoravo amizegny za. Ya, ravoravo za, ¹⁹ fotony haiko fa izegny hifaragna amin'ny fagnavôtagna za boaka amin'ny vavaka natao narô draiky fagnampian'ny fagnahy ny Jesosy Kristy. ²⁰ Araka fiambesako mare draiky fiantôhako fa za tsy ho megnatra foeky, sady mbala amin'ny fasakiagna jiaby koa, zioty kara taloha koa, hiaraka aminaka ato Kristy, na amin'ny fiainagna na amin'ny fahafatesagna. ²¹ Aminaka, ny atao hoe miaigny zegny Kristy sady ny atao hoe maty zegny tombony. ²² Fa izikoa draiky miaigny amin'ny nôfy za, midika fa asa mahavokatra hoanaka zegny. kanefa ino koa ma fahadisoagna naka? tsy haiko nino aby. Fôtony za kara itako latsaka agnivon-drô roe io. ²³ Ny fagniriagnanaka zegny ny handè sady hiaraka amin'ny kristy, zaingny tsara lavitry, ²⁴ kanefa ny mipetraka agnaty nôfy, ilaingna lavitry kara anarô. ²⁵ Resy lahatra amin'ny zegny sady aiko fa hipetraka draiky andeha hiaraka aminarôjiaby za, ho an'ny fandrosoagna draiky fifaliagna agnatin'ny finoagna. ²⁶ Aminaka zegny hisy antony hipoeragna amin'ny Kristy Jesosy anarô izikoa fa mimpody aminarô agny koa za. ²⁷ Ny fitondran-tegnanarô mba ho mendriky ny volagna ny Kristy, na hoavy hizaha anarô za na tsy hoavy, baika hahaizako toetry nanarô, fa maharitry midoko amin'ny fagnahyaraiky fo anarô, sady miaraka mihezaka ho jery araiky mba ho finoagna ny tenin-dRagnahary. ²⁹ Sady kaza mety ampitahôrin-drô fahavalonarô aby io anarô. Midika fahapotehan-drô zegny, draiky mariky ny famonjegnanarô koa, sady boaka amin'ny Zagnahary. ²⁸ Fa namiagna anarô zegny, ho an'i Kristy, tsy mba hinoagna Izy fo fa, mba hijaliagna hoanany koa, ³⁰ fa anarô zegny managna fomba fiadivagna araiky fo amin'ny araiky hitanarô taminaka, sady araiky hitandrignesarô aminaka zioty.