¹ Izy koa misy fampaherezagna ao amin'ny Kristy, izy koa misy fampionanagna baka amin'ny fitiavany, izy koa misy fikambanagna baka amin'ny fitiavany, izy koa misy fikambanagna ao amin'ny fagnahy, izy koa misy famindra-po maventy draiky ² hinakinaka, ataova haravoagnako mba ho saigny araiky, fitiagna araiky, fo araiky, hevitry araiky anaro. ³ Tsisy raha tokony atao amin'ny fitiavan-tegna na fagnaboniagna tegna. Izy koa draiky fanetrn-tegna, mihevera hafa mihoatra tegnanaro. ⁴ Tokony tsy hitady raha mahatsara tegnanaro fo anaro tsiaraikiaraiky, fa zegny mahatsara hafa koa. ⁵ Mihevera kara fisaignana izegny tao amin'i Kristy Jesosy koa. ⁶ Nisy kara endriky zagnahary Izy, tsy nihevitry iegny fitoviany amin-dRagnahary zegnyIzy. ⁷ Mifanohitry amin'izegny, nadosony tegnany tamin'ny nangalany bikan'ny mpanompo, draiky naviany izy misy fitoviagna amin'olombelogno. Bako hita nitovy tamin'olombelogno Izy. ⁸ Nanetry tegna Izy bako loso mpankatoa ziska Izy maty, izegny maty tamin'ny hazofijaliagna! ⁹ Dikan'izegny, nampanogain-dRagnahary faray hagnabo koa Izy. Namezany agnaragna agnambon'ny agnaragna jiaby Izy. ¹⁰ Nataony izegny mba ho amin'ny agnaran'i Jesosy handohalifan'ny lohaliky jiaby, lohalik'iro agny an-dagnitry draiky aty an-tany bako agny ambany tany. ¹¹ Nataony izegny, mba hagnikehan'ny lela jiaby fa i Jesosy Kristy no Tompo, ho voninahitay zagnahary Baba. ¹² Dikan'izegny, ry havako tiako, kara nankatoavanaro, tsy rango zaho ankilanaro fo, fa bebe kokoa izy koa tsy io zaho, Aboaha amin'ny tahotro draiky horohoro ny fagnavotagna anaro. ¹³ Fotony zagnahary miasa ao aminaro mba ho vognono agnano sady hiasa an-karavoagnany ianaro. ¹⁴ Tsy mila mitaraina, na miady hevitry, magnano raha jiaby. ¹⁵ Magnanaova kara zegny mba ho. zanaka zagnahary tsisy tsigny sady marigny, tsisy kilema anaro. Miasa kara izegny mba hangilagilatra anaro kara fahazavagna io amin'izao tontolo izao, io agnivon'ny taranaka diso sady maditry. ¹⁶ Mihezaha mare amin'ny andran'i Kristy. Amin'izegny haiko fa tsy very maigny lomoay bako tsy very maigny asa nataoko. ¹⁷ Ia, na ahidigny atao fagnateragna io amin'ny sorona draiky fanompom-pioagna aby zaho. ¹⁸ Bako kara izegny koa hiravoravoanaro, bako miaraka ravoravo aminaka anaro. ¹⁹ Magnategna ao amin'i tompo Jesosy zaho fa handefa an'i Timoty agny aminaro malaky, mba hahery koa zaho, izy koa haiko raha momba anaro. ²⁰ Tsy managna olo hafa mitovy toe-tsaina aminany zaho, mihiahiahy mare aminaro. ²¹ Iro jiaby mitady tombon-tsoany, fa tsy rahan'i Jesosy Kristy. ²² Hainaro fahamendrehany, fotony kara tsaiky manompo babany, nanompoany niaraka taminaka tao amin'ny filazantsara. ²³ Kay magnategna handefa izy zaho izy koa hitako fandehan-draha aty aminaka. ²⁴ Matoky Tompo zaho fa hoavy agny malaky zaho. ²⁵ Mieritreritry zaho fa ilaigny koa magnampody agny aminaro i Epafrodito, Ralahiko sady asa araiky aminaka sady miaramila namako bako mpitondra hafatranaro draiky mpanompo hagnamia zegny nilaiko. ²⁶ Malahelo mare izy fa manigny anaro jiaby, fotony efa regninaro narary izy. ²⁷ Tegna narary izy tsaiky maty. Fa namindra fo taminay zagnahary, bako tsy taminany araiky fo, taminaka koa, mba tsy hanagnako alahelo agnambon'ny alahelo. ²⁸ Nazoto be zaho hagniraka izy, mba hamparavoravo anaro, izy koa hitanaro izy, mba ho afaka alahelo koa zaho. ²⁹ Alaiva miaraka amin'ny aravoagna ao amin'ny Tompo izy, bako ameza voninahitry, izegny olo kara izegny. ³⁰ Asan'i Kristy tsaiky hamono izy, sady nagnano farany mare izy mba hagnfa izegny tsy vitanaro tamin'ny fanompoagna.