¹ Nandaiha tagny amin'ny synagoga tagny koa Jesosy ary nisy lehilahy maty tagnana tao. ² Nagnaramaso Izy olo sasantsasany hizahandrô na hagnajanga izy amin'ny sabata Jesosy na tsy hagnajanga mba hahafahandrô magnameloko Izy. ³ Baka iô, Jesosy nivolagna tamin'olo maty tagnana ìo nagnano hoe: " Mitsangana agnivon'olo jiaby eto anao". ⁴ Avy iô, nivolagna tamin'olo tiô Izy : " Aradalàgna ma magnano raha tsara amin'ny andro Sabata sa magnano raha ratsy; magnavotra aigny sa mamono?" baka iô, irô tsy nahita raha volagnigny. ⁵ Neloko Jesosy nizaha irô sady nahinakinaka navy bakamin'ny hamafin'ny fondrô, abakô nivolagna tamin'ny lehilahy io Izy hoe: "Vavara tagnanao" Avy tiô, nivavaran'ny lehilahy io tagnagnanany, janga izy baka tiô. ⁶ Niboaka navy tagny irô fariseo aby irô ndraiky herodiana nikononkonogno hitady fomba hamonoagna Izy. ⁷ Avy tiô, nandaiha niaraka tamin'ny mpianatranany tan-dranomasigny tagny Jesosy, ary nisy vahoaka maro baka avy agny Galilia, avy agny Jodia, ⁸ avy agny Jerosalema, avy agny Edoma, mbaka amin'ny irô avy agny amin'ny matsaborin'ny Jordana ndraiky irô boaka magnodidigny Tyra ndraiky Sidona nagnaraka irô. Izy kofa naharegny raha aby nataony igny irô, nisy vahoaka maro navy taminany tiô. ⁹ Baka iô nagniraka mpianatranany hitady lakana ho anany Jesosy baka avy amin'ny hamaroan'olo tiô, baika Izy tsy angorognan'olo. ¹⁰ Navy tamin'Izy nagnajanga olo maro, nisarombaka nagnatogno hikasiky Izy olo jiaby nanagna aretigny. ¹¹ Izy kofa mahita Izy irô fagnahy maloto aby io, niondriky talohanany tiô sady nihaikaiky, mivolagna hoe : " Anao no Zanakan-dRagnahary". ¹² Nivolagniny mafy irô mba tsy hampahafantatra Izy. ¹³ Nanonga tagnabon'ny bongo Izy, nikaiany irô izay tiany, abokô navy nagnatogno Izy tiô irô. ¹⁴ Nanondro irô aroa ambin'ny folo Izy ( izay nataony hoe : Apostoly) baika irô afaka miaraka aminany ¹⁵ ndraiky hahafahany magnandefa irô mitory hafatra, ndraiky hahafahan'irô mandroaka demono. ¹⁶ Avy tiô, nanondro irô aroa ambiny folo Izy: Simona namezany agnaragna hoe: Petera, ¹⁷ Jakoba zanaka Zebedio, draiky Jaona rahalahinany, namiany agnaragna hoe: Boanarijesy dikan'izaigny "zana-baratra"; ¹⁸ draiky Andrea, Bartolomeo, Matio, Tomasy, Jakoba zanaka Alfeo, Tadeo, Simona Zelota, ¹⁹ ndraiky Jodasy Iskariota araiky hamadiky Izy. ²⁰ Abokô, nody tan-tragno Izy, nisy vahoaka koa niara-navy tamin-drô tiô, tsy afaka nihinagna eky irô baka tamin-jaigny. ²¹ Izy kofa naharegny izaigny fianakaviagnanany, niboaka irô hangala Izy, fotony novolagnindrô : " lasa lefaka Izy". ²² Irô mpanora-dalàgna baka avy agny Jerosalema nivolagna fa: "Ipitrahan'ny Belzeboba Izy", kay " avy baka amin'ny sefon'ny demono fo androahany demono" ²³ Baka tiô nikaian'i Jesosy ho tonga taminany tiô irô, abokô, nivolagna tamin-drô tamin'ny fagnoharagna Izy hoe: "Magnano akory ma ahafahan'ny Satana mandroaka Satana? ²⁴ Izy kô misy fanjakagna miady an-tragno, Ho ravagna Fanjakagna zaigny. ²⁵ Izy kô misy tokan-tragno miady an-tragno, tsy haharitry tokan-tragno zaigny. ²⁶ Izy kô nitsangagna nanohitry tegnanany edy Satana abokô nisaraka, tsy haharitry izy ary hifaragna. ²⁷ Tsisy olo afaka miditry agnaty tragnon'olo araiky matanjaka, sady mangalatra fanagnagnanany izy kô tsy matahotro olo matanjaka io aloha, ndraiky mamaky tragnonany boaka iô. ²⁸ Volagniko marigny aminarô, ambela aby fahotagnan'ny zanak'olombelogno jiaby, mboany karazagna asaha jiaby aboakan'ny vavananany, ²⁹ izay magnasaha Fanahy Masigny ndreky tsy voavela heloko mandrakizay, meloko baka avy amin'ny ota mandrakizay." ³⁰ Nivolagna zaigny Jesosy fotony nivolagna irô fa :" Managna fagnahy maloto Izy". ³¹ Avy tiô, navy renin'ny Jesosy ndraiky irô rahalahinany nitsangagna tambelagna tiô. Nagniraka olo irô hampahafantatra ndraiky hagnantso Izy. ³² Baka tiô, Nipetraka nagnodidigny Izy tiô vahoaka maro sady nivolagna taminany hoe: " An-tany ao reninao draiky ralahinao mitady anao". ³³ Namaly irô Izy boaka tiô nagnontany: " Azôvy ma reniko ndraiky rahalahiko?" ³⁴ Nizahany olo magnodidigny Izy, boaka tiô nivolagna Izy hoe: " Zahavanarô, ireto no rahalahiko ndraiky reniko! ³⁵ Na zôvy na zôvy magnano sitrapo-Ndragnahary, irô no rahalahiko ndraiky anabaviko ndraiky reniko."