¹ Baka aìa nahavian'iregny ady ndraiky korotagna amin'narô iô? Ziô ma tsy raha efa nilainarô izay miady amin'ny mpikambana ao agnivonarô? ² Magniry anarô, nefa tsy managna. Mamono ndraiky magniry anarô, ka nefa tsy afaka ahazo. Miady ndraiky tsy fankahazo anarô. Tsy managna anarô satria anarô tsy mangataka. ³ Mangataka anarô nefa tsy mahazo satria ratsy fangataka, baika hafanarô mampiasa izegny ho amin'ny fagnirianarô. ⁴ Hoanarô mpijanganjaga! Moa tsy hainarô va fa fiaragna amin'izao tontolo izao fandrafiagna micontre an-dRagnahary? Koa na zôvy na zôvy te-ho naman'izao tontolo izao ka magnano taignany ho fahavalon-dRagnahary. ⁵ Sa anarô mieritreritra fa Soratra Masigna iô, mivolagna zava-poagna? iô fagnahy nataony tamin'tsika iô, nataony iz'iô baika ho fahasarotan-piaro. ⁶ Fa ndRagnahary magnamia fahasoavagna bebe kokoa, noho zegny hoy soratra masigny: "ndRagnahary micontre olo mpiraiharaiha, fa magnamia fahasoavagna n'olo mpanetry taigna" ⁷ Ka magnekeha an-dRagahary. Tohero ny devoly,ka hilaifa anarô izy. ⁸ Magnatontongna marikitra ndRagnahary,ka hagnakaiky anarô Izy. Diova tanagna narô, ry mpanota; baka iô atavanarô madio fonarô, ry mpiroa saigny. ⁹ Malahelovà, misaonà, avy iô mitomoangnihà! Aoka faharavoravoanarô hivadika fitomagniagna, baka iô fifalianarô ho fanjoretana. ¹⁰ Manetre-tena eo ankilan'ny Tompo, ka hanandratra anarô Izy. ¹¹ Kaza mifagnaratsy anarô, rahalahy. Olo izay magnaratsy rahalahiny na mitsara rahalahiny, izy manohitra lalàgna ndraiky mitsara lalàgna. Raha tsarainarô lalàgna, anarô zegny olo tsy mpagneky lalàgna fa olo mpitsara. ¹² Araiky fo magnamia lalàgna ndraiky mitsara. izy araiky fo mpamonjy ndraiky mpandringana. Azovy ma anao, kay andaihy hitsara namanao? ¹³ He! mitandregny anarô izay mivolagna hoe: "Iniany na amaray atsika iditra ato amin'ity tanàgna ity, hijanogno togno araiky agny, hivarotro sady haka tombo-barotra atsika." ¹⁴ kanèfa azovy aminarô mahay raha hiboaka amaray; mba ino raha hainarô? Fa anarô kara zavogno anié! miboaka betibetiky avio ravagna. ¹⁵ Fa ndraiky, tôkono hivolagna anarô hoe: "Raha sitrapon'ny Tompo,ho velogno atsika hanao ity na hanao iry." ¹⁶ Fa amiziô ndraiky anarô, mirèharèha amin'ndrô raha jiaby sady hitetika hipoèrapoèra. Ny fireharehana jiaby kara izegny. ¹⁷ Ka izay mahay magnano tsara nefa tsy magnano izegny, kay heloka ho azy izegny.