¹ Amin'ny fotoagna niany ty rahalahy, vavàha zahay mba hideragna ndraiky agnamezam-boninahitra ny volagnan'ny Tompo, kay karaha zaigny koa ny aminarô. ² Vavaha zahay mba ho afaka amin'ny olo ratsy fagnahy ndraiky olo ratsy, fa tsy manam-pinoagna aby olo jiaby io. ³ Fa ny Tompo mahatoky, magnafy origny ndraiky miambigny anarô amin'ny ratsy Izy. ⁴ Fa zahay managna fatokiagna amin'ny Tompo hampahery ndraiky hiaro anarô tsy ho azon'ny ratsy salakady agnanaovanarô ndraiky hanohizanarô zaka jiaby nandidianarô zahay. ⁵ I Tompo hitariky ny fonarô amin'ny fitiavan-dRagnahary ndraiky fiaraitan'ny Kristy. ⁶ Niany ty, mandidy anarô zahay rahalahy amin'ny alalan'i Jesosy Kristy Tompo, mba hiala aminarô rahalahy jiaby izay miaigny agnatin'ny hakamoagna ndraiky tsy arakaraka ny fomban-drazagna nalainarô aminany. ⁷ Fa ny tegnanarô mahay ny tokony hianaranarô momba zahay salakady efa nipettraka tsara taminarô koa zahay. ⁸ Avy iô, tsy nihinagna hanignin'olo maimaimpoagna tsy nandoavam-bola zahay, fa kanefa ndreky, niasa andro aman'aligny tamin'ny asa sarotro zahay mba tsy ho enta-mavesatra ho aminarô tsy araiky araiky. ⁹ Tsy hoe : noho ny tsy fanagnam-pahefagna nagnanaovanay anarô izegny. Fa kanefa ndreky, antony nahatonga zahay nagnano zegny mba ho fitaratra ho anarô, kay zegny angalanarô tahaka zahay. ¹⁰ Tamin'ny zahay niaraka taminarô, nivolagna taminarô izy hoe :" Raha ohatra olo araiky malaigny hiasa, zaigny midika fa tsy tokony hihinagna izy." ¹¹ Fa regninay fa miraviravy tagnana ny sasany taminarô fa tsy miasa aby irô fa mivandravandra magnano rahan'olo. ¹² Amin'ny fotoagna ziô ty, bekoinay ndraiky anarinay amin'i Jesosy Kristy Tompo, mba hiasa tsara amin'ny fiadanagna ndraiky hihinagna ninany. ¹³ Anarô rahalahy aza ketraka amin'ny fagnanaovagna ny marigny. ¹⁴ Raha ohatra misy tsy magneky ny tenintsika amin'ny taratasy ty, marihà tsara olo zaigny aviô aza mikambagna aminany mba hampamaignatra izy. ¹⁵ Kay, aza raisigny ho fahavalo koa izy fa anarô karaha olo mpirahalahy. ¹⁶ Fa ilay Tompon'ny fiadanagna agnamia fiadanagna anarô mandrakariva amin'ny zaka jiaby, enga anie ho tonga aminarô jiaby ny Tompo. ¹⁷ Ity veloma ataon'ny tagnako farany amirô, zaha Paoly, ity famantaragna amin'ny taratasy izay nosoratako. ¹⁸ Kay, ny fahasoavan'ny Jesosy Kristy Tompo handeha aminarô Jiaby.