¹ Mikasiky favian'i Jesosy Kristy Tompotsika draiky namoriagna antsika iaraka aminanay : magnotany anarô zahay ralahy, ² mba tsy mora tabitabaigny na hangorohoro anaro, na amin'ny fagnahy, na amin'ny hafatra, na amin'ny taratasy izegny baka aminay, baka amin'ny fihavian'izegny andran'ny Tompo izegny. ³ Kaza ambela hisy olo hamitaka anaro amin'ny fomba hafahafa. Tsy ho avy raha zegny izy koa tsy hafaran'ny fahavian'ny faharavanigny, bako lelahy mpandika lalàgna draiky, zanaky fanaovagna raha tsy manjary aseho. [Fagnamariagna : dikany volagna taloha sasany : "bako lelahy mpanota aseho"]. ⁴ Izy araiky manohitry draiky mampanonga tegnany amin'ny raha jiaby kaliagna Zagnahary na izegny hivavagna. Baka amin'izegny, nipetrahany tao amin'ny Tragnon-dRagnahary draiky nampisehoany tegnany ho kara zagnahary. ⁵ Tsy tsaroanarô mba zaho niaraka taminarô nivolagna raha jiaby zegny ? ⁶ Hainarô ino raha mitana izy, mba hiboahany amin'ny fotoagna araiky fo. ⁷ Miasa eky raha misitsiky, tsy fagnaragna lalàgna, mandra-pialany olo araiky manakana lalagna amin'izio. ⁸ Avy io araiky tegna mpandika lalàgna andeha ambara, ho vonoen'i Jesosy Tompo amin'ny fofokaignin'ny vavany. Tompo hitonga izy amin'ny tsisy dikany baka amain'ny fisehoan'ny fiaviany. ⁹ Fiaviany araiky tegna mpandika lalàgna avy amin'ny asan'ny setoany miaraka amin'ny hery jiaby, irô famantaraga, bakô irô fahagagana tsy marigny, ¹⁰ bako miaraka amin'ny fitaka jiaby amin'ny fahamarignana. Raha jiaby izegny nidrô olo very, fotony irô tsy nangala fitiavagnan'ny fahamarignana mba ahavoavonjy irô. ¹¹ Baka amin'izeny antony izegny andefasan-dRagnahary fahadisoagna mba hinoan-drô vandy. ¹² Ho sazigna irô jiaby, irô zegny tsy mino fahamariagna nefa mankasitraka tsy fahamarignana. ¹³ Zahay tokony magnamia fankasitragna ndRagnahary ho anarô fo, ralahy nitiavin'ny Tompo. Zagnahary nifidy anarô voalohany vokatra amin'ny famonjegna amin'ny fagnamasigna Fagnahy draiky finoagna fahamarignana [Fagnamarihagna : dikany volagna hafa vakigna : Zagnahary nifidy anarô rango tamin'ny voalohany amin'ny famonjiagna]. ¹⁴ Izegny nikahiagna anarô tamin'ny filazantsaranay mba ahazoanarô voninahitr'i Jesosy Kristy Tompontsika. ¹⁵ Dikan'izegny, ralahy, mijoroa mafy. Tana irô fahamarignana nampianarigny anarô. Na tamin'ny volagna na tamin'ny taratasinay. ¹⁶ Amin'izio ty ambila i Jesosy Kristy Tompotsika tegnany, bako zagnahary baba tsika tian-tsika draiky nagnamia antsika fankaherezagna mandrakizay draiky fahatokisagna tsara amin'ny ho avy baka amin'ny fahasoavagna, ¹⁷ hampangigniny fô naro bakô hampaherezigny anaro amin'ny asa draiky volagna tsara jiaby.