¹ Paoly, draiky Silasy, abako Timoty, andeha amin'ny eglise drô Tesaloniana amin-dRagnahary babatsika draiky Jesosy Kristy Tompo. ² Ho avy amianarô fahasoavagna draiky fiadanagna avy amin-dRagnahary babatsika draiky Jesosy Kristy Tompo. ³ Zahay tokony hagnamia fisaoragna amin-dRagnahary ho narô. Ô! Ralahy. Fa izegny tsara atao, satria tegna mitombo mare finoagna narô, draiky fitiavanarô tsiaraikiaraiky mampy tombo ny nolo afa. ⁴ Nohony zegny zay mivolagna am-pirerehagna momba anarô amin-drô eglise ndRagnahary. Zahay magnabara momba faharaitagna narô draiky finoagna narô tamin'ny raha jiaby nagnijaihagna anarô. Magnabara momban-drô fahoriagna zaigny niharaitanarô. ⁵ Izegny famantaragna fitsaragna marin-dRagnahary. Vokany horaisigny ho mendriky fanjakan-dRagnahary izaigny nijalianarô. ⁶ Marigny amin-dRagnahary hamaly fahoriagna drô izaigny nampahoriagna narô, ⁷ draiky hagnamia fitsaragna ho ninarô izaigny nampahoriagna niaraka taminay. Ho ataony zegny amin'ny fisehoagnan'i Jesosy Tompo avy agny an-dagnitry miaraka amin-drô anjelin'ny angoviny. ⁸ Amin'ny môtro mijailajaila hagnanaovany valifaty amin-drô izaigny tsy mahay ndRagnahary draiky amin-drô izaigny tsy mamaly filazantsaran'i Jesosy Tompontsika. ⁹ Irô io hijaly amin'ny hiziky fadringagna mandrakizay lavitry ankilany Tompo draiky voninahitry ny angoviny. ¹⁰ Hagnano izegny izy jiaby navy amin'ny zegny andra zegny mba hagnamaizagna olo nany voninahitry izy draiky higagan-drô jiaby izaigny nino. Fa fitsangananay vavalombelogno aminarô ninoanay. ¹¹ Nony zegny miavavaka isanandra ho anarô koa zahay. Mivavaka zahay mba ho mendriky ho alain-dRagnahary amin'ny fikahiagna anarô. Mivavaka zahay mba ho tanterahiny amin'ny angoviny fagnirianarô fahatsaragna draiky asan'ny finoagna jiaby. Mivavaka raha mba namianarô voninahitry agaran'i Jesosy Tompontsika. ¹² Mivavaka zahay mba hagnamaizany voninahitry anarô, nohon'ny fahasoavan-dRagnahary draiky Jesosy Kristy Tompo.