¹ Niditry Jesosy ary nandalo an'i Jeriko. ² Igny, nisy lelahy izay nangia hoe Zakaiosy teo. Izy da lehibene mpamory hetra sady nanan-karena. ³ Niezaky gne hahita izy hoe ia Jesosy, kanefa tsy afaky nahita tao agnatine vahoky, satria foho izy. ⁴ Da niazakazaky alohany gn'olo izy ary nagnaniky azon'aviavy raiky mba hahitany Anazy, satria handalo amizà lala izà Jesosy. ⁵ Raha avy teo amigne toera Jesosy, da niandra Izy nizaka hoe: "eh Zakaiosy, midigna malaky, fa androany da tsy maintsy hizano ao an-dragnonao Iaho." ⁶ Da nidigny nalaky izy ary nandray Enazy tamigne fitiava. ⁷ Rehefa hahitan enizà gne maro, da nitaraigny aby, nizaka hoe: "niditry hamangy lelahy izay mpanota Izy." ⁸ Nitsanga Zakaiosy da nizaka tamigne Tompo hoe: "iteo, Tompo, gn'asasaky gne fanagnako da omeko hoane mahantra, ary raha nisy raha nagnabakako gn'olo, da honerako amboniny gn'efatry." ⁹ Jesosy nizaka taminazy hoe: "androany gne famojena vo avy amin'ity tokatragno ity, satria izy da zanak'i Abrahama. ¹⁰ Fa gne Zanak'Olo da tonga mba hitady sy hamonjy gn'olo izay very." ¹¹ Raha naha izà raha izà indreo, da nanohy nizaka Izy ary nagnano fagnohara raiky, satria teo takeky en'i Jerosalema Izy, ary indreo nieritreritry fa hiboda teo noho eo gne fanjakan'Andriamanitry. ¹² Noho izà Izy da nizaka hoe: "nisy tandapa raiky nandeha tagny an-tany lavitry mba hahazo fanjaka hoany gne tegnany ary hipody avy eo. ¹³ Nangaiky folo lahy tamigne mpanompony izy, ary nagnomè farantsa folo andreo, ary nizaka tamindreo hoe: 'magnanoa raharaham-barotry mandra-piveregnako." ¹⁴ Kanefa gne vahoky nalaigny enazy ary nandefa solontegna nagnaraky anazy, nizaka hoe: 'tsy ilainay gne hanjakan'io lelahy io aminay eto.' ¹⁵ Ary rehefa nipody koa izy, avy nandray gne fanjaka, da nandidy gne mpanompony izay nomeny vola mba ho aminazy izy, mba hahafantarany gne tombony azondreo tamigne fagnanoa raharaham-barotry. ¹⁶ Avy talohany teo gne volohany, nizako hoe: 'Tompo, gne farantsanao da nahazo farantsa folo mihotry.' ¹⁷ Nizaka anazy gne tandapa hoe: 'tsara izà, ry mpanompo tsara. Noho enao natoky tamigne kidy da kidy, da hana mpahefa amigne tanà folo enao.' ¹⁸ Avy gne faharoy, nizaka hoe: 'gne farantsanao Tompo,da nahavita farantsa dimy.' ¹⁹ Ary nizaka taminazy gne tandapa hoe: 'hiandraikitry tanà dimy enao.' ²⁰ Avy koa gne raiky hoe: 'Tompo, ity gne farantsanao, nopiako tao agnaty lamba, ²¹ fa nalia anao iaho, satria lelahy masigny enao. Da mangala gne napetrakao, ary mihila gne ysy nafafiny.' ²² Nizaka taminazy gne tandapa hoe: 'amigne zakanao manoka gnitsarako anao, enao ry mpanompo ratsy fagnahy. Fantanao fa iaho da lelahy maseky, mangala gne raha tsy napetrakao, ary mihila gne tsy nafafiko. ²³ Da nagnino tsy napetrakao tagny amigne mpiompy vola gne volako, ka rehefa nipody iaho da ho nandray izà niaraky tamigne zanany?' ²⁴ Gne tandapa nizaka tamin'ireo izay nitsanga takeky teo hoe: 'alay aminazy gne farantsa, ary omeo gne mana gne farantsa folo.' ²⁵ Ary hoy indreo taminazy hoe: "Tompo, mana farantsa folo izy.' ²⁶ Iaho mizaka aminareo, fa gne mana da homè mihotry, fa gne tsy mana, ndre gnanagnany aza da ho alay. ²⁷ Fa gne fahavaloko, ireo izay tsy nagniry enahy hanjaka eo amindreo, indeso aty indreo ary vonoy aloako etoa."' ²⁸ Rehefa avy nizaka an'ireo raha ireo izy, da nandeha aloha, niakatry ho agny Jerosalema. ²⁹ Ary rehefa avy teo akeken'i Betifaga sy Betania Izy, tamigne tendrombohitry angia hoe Oliva, da nagniraky gne roy tamigne mpianatriny Izy, ³⁰ nizaka hoe: "mandehana agny amigne tanà magnaraky. Rehefa miditry enareo, da hahita zanak'apondra raiky mbola tsy mipitian'olo mihitsy. Vahao izà da indeso aty aminahy. ³¹ Raha misy magnotany anareo hoe: 'Nagnino no vahanareo io? da zakay hoe: 'misy ilànigne Tompo enazy.' ³² Gne nirahiny da nandeha ary nahita gne zanak'Apondra arakigne nozakain'i Jesosy tamindreo. ³³ Raha tamigne famahà gne zanak'Apondra indreo, da hoy gne tompony tamindreo hoe: "nagnino no vahanareo gne zanak'Apondra?" ³⁴ Nizaka indreo hoe: "misy ilànè Tompo enazy." ³⁵ Nindesindreo tagny amin'i Jesosy izà, ary napetrakindreo teo amboniny zanak'Apondra gne lambany ary nametraka an'i Jesosy teo amboniny. ³⁶ Raha nandeha igny Izy, da novelarindreo tamigne lala gne lambandreo. ³⁷ Ary rehefa nagnakeky gne toera fidigna amigne Tendrombohitr'Oliva Izy, da nanomboky nifaly gne mpianatriny maro be ary nidera anè Zagnahary tamigne feo mafy nohonign'asa zakabe izay itandreo aby, ³⁸ nizaka hoe: "deray aza gne mpanjaka izay avy amign'agnaranè Tompo! Fiadana agny an-dagnitry ary gne voninahitry agny amign'ambony indrindra!" ³⁹ Gne Fariseo sasany tamigne vahoky da nizaka taminazy hoe: "eh! ramosè, zakay mafy gne mpianatrao." ⁴⁰ Namaly Jesosy ary nizaka hoe: "zakaiko aminareo, fa raha mangigny ireo, da hitoreo gne vato." ⁴¹ Rehefa nagnato gne tanà Jesosy, da nitomagny enazy, ⁴² nizaka hoe: "raha mba fantatrao mantsy am'zao andro izao, eka enao, gne raha izay miday fiadana ho anao! Nefa am'zaofotoa izao da mifiny amigne masonao. ⁴³ Fa ho avy aminao ireo andro, izay hanangananè fahavalonao tovon-tany magnodidy anao, ary hagnodidy anao, ary hanery anao amigne lafiny rehetra. ⁴⁴ Indreo da handavo anao amigne tany miaraky amigne zanakao. Tsy hagnambela ndre da vato raiky mifapipitiky aza indreo. ⁴⁵ Niditry tamigne tempoly Jesosy ary nonomboky nandroky gne nivarotry, ⁴⁶ nizaka tamindreo hoe: "efa vosoratry hoe: 'gne tragnoko da nany tragno fivavaha,' fa enareo kosa da nagnano enizà ho toera vivezivezehanè jiolahy. ⁴⁷ Da nampinatry isan'andro tao an-tempoly Jesosy. Gne mpitariky gne mpisorogny sy gne mpanora-dalàgna ary ireo mpitariky gne vahoaky da nitady hamono anazy, ⁴⁸ fa tsy nahita fomba hagnanoa enizà indreo, satria nazoto niteno Enazy gne vahoky aby.