¹ Ampaherezo iareo hagneke i mpandily naho iareo manam-pahefagne, hagneke iareo, ho vognogne amy ty asa soa aby. ² Ampitsiarovo iareo tsy hagnambane ndre ia ia, hisintake amy ty aly hevetse, hagnenga ty ila'e hagnorike ty lala'e, le hanoro fiambaneagne amy ty ndaty aby. ³ Fa taloha ty vatantika mbe tsy naharendre-draha le tsy nagneke. Voatarike tamy ty lalagne tsie tika le nandevoze ty filagne naho ty fahafinaretagne sambe hafa. Nivelogne tagnate ty faharatiagne naho ty fialognagne tika. Tsy niteagne zahay le tsy nifankatea tika. ⁴ Fa naho niboake ty hasoavam-pagnahin'Andriagnanahare hamonje antika naho ty fiteava'e ty olombelogne, ⁵ le tsy tamy ty asa ty fahamarignagne natontika zay, fa tamy ty famindra-po'e ro namonjea'e antika. I reke le namonje antika tamy ty alala ty fagnaliovagne ty fahaterahagne vaovao naho ty fagnavaozagne tamy ty Fagnahy Masigne. ⁶ Andriagnanahare nandrotsake tamantika ty Fagnahy Masigne tamy ty alala i Jesosy Kristy Mpamonje antika. ⁷ Nata'e zay mba, mba hovoamaregne tamy ty fitahiagne, le toe lasa mpandova tika amy ty alala ty fahatokisagne ty fiaignagne hatrampara'e. ⁸ Ze hafatse zay le magneva atokisagne. Teako hirehake moba ze raha zay am-patokisagne nareo, mba iareo ze matoky an'Andriagnanahare le hametsevetse hanao o asa soa ze fa nafe'e tam'iareo eo. Ze raha zay le soa ro mahasoa hoe ze ndaty abike. ⁹ Isintaho ty aly hevetse gege naho ty tantaran-drazagne le ty fifandieragne naho ty aly mahakasike ty lily. Ze raha zay le raha tsy misy dika'e naho tsy mahasoa. ¹⁰ Mandietse ze ndaty aby miterake fizarazaragne agnivo'areo eo, afara ty fameperagne indraike na indroe, ¹¹ le hai'o fa ty ndaty manahake zay le nisintake tamy ty lalagne maregne le mana-kakeo naho le magnameloke ty vata'e. ¹² Naho fa magnirake i Artema ndra i Tykiko ama'areo agne raho, le ko manao ela le mandehana amako à Nikopolia agne, i nanampahako hevetse handaniagne ty andro manintsigne. ¹³ Ko manao ela le alefaso Zena, i mpahay lily, le i Apolosy, mba tsy hisy raha hanahiragne aze iareo. ¹⁴ Ty ndatitikagne le tsy maintsy mianatse manao asa soa ze ilaigne meke mba tsy hahavy iareo tsy hamokatse. ¹⁵ Iareo aby ze mindre amako le manao veloma anareo. Magnombarà iareo ze tea antika amy ty finoagne. Lonike ho ama'areo aby ty fitahiagne.