¹ Fe ie rehe, magnambarà ze mifagnarake amy ty fampianaragne maregne. ² O lahilahy fa nahazo taogne reo le tsy maintsy mahay miaigne, hendre, mahay mampionogne ty tegna'e, matanjake amy ty finoagne, amy ty fiteavagne, naho amy ty faharetagne. ³ Le manao hoe'izay ka o ampela fa nahazo taogne reo le toko'e haneho avao ty tegna'iareo te soa fiaignagne, fa tsy mpitsiko. Tsy toko'e hoandevoze ty divay bey iareo. Toko'e hampianatse ze soa iareo ⁴ mba hampiofagnagne ze ampela tanora ho tea vata'e ty valy aman'ana'e manokagne. ⁵ Toko'e hampianatse iareo hampionogne ty tegna'e, halio, hikarakara soa ty tokantragno, naho le hagneke ty vali'e iareo. Toko'e hanao ze raha iaby zay iareo mba tsy ho voatsikike ty saontsin'Andrianagnahare. ⁶ Le manahake zay, ampaherezo ze lahilahy mbe tanora reo mba hampinogne ty tegna'e. ⁷ Ami'ze fomba iaby le atorò ty vata'o ho modely asa soa reo; naho fa mampianatse rehe, le manehoa fahitsiagne naho fahamendrehagne. ⁸ Mirehafa hafatse salama naho tsy misy tahigne, mba himegnara ze manohitse ndre ia ndre ia, satria tsy managne ndre ino ndre ino raty ho rehefigne momba antika reke. ⁹ Ze mpanompo le toko'e hagneke ty tompo'e ami'ze kila raha iaby. Le hanao ze sitrapo'e fa tsy ndra hiale ama'e. ¹⁰ Tsy toko'e hangalangalatse iareo. Fe ie ka, le toko'e hanoro ty finoagne soa iaby iareo, mba hahamendreke ty fampianarantika momba an'Andrianagnahare mpamonjy antika amy ty lafy ze raha iaby. ¹¹ Fe ie fa niseho tami'ty o ndaty iaby ty fahasoavan'Andrianagnahare. Mampianatse antika handietse ty fomba tsy arake ¹² an'Andrianagnahare naho ty filà ty tane toy zay. Mampianatse antika hiaigne am-pionognagne, am-pahamaregnagne, naho ty arake ty lalan'Andrianagnahare ami'ze fotoagne zao zay ¹³ am-pandignisantika mafe ze handrambesantika ty fanantenagne soa, ty fisehoa'ty volonahe'i Andrianagnahare bey naho i Mpamonjy Jesosy Kristy. ¹⁴ Jesosy le nagnome ty tegna'e ho antika mba hagnavotse antika hiala ami'ty tsy fagnarahan-dily iaby naho handiovagne, hoey ty tegna'e, ndaty raike manokagne ze mazoto vata'e ty hanao asa soa. ¹⁵ Ambarao naho indeso am-paherezagne o raha reo. Magnomeza fahitsiagne ami'ze fahefagne iaby. Ko magneke hatao'o ndaty tsinontsinogne rehe.