¹ Paoly, mpanompon' Andrinagnahare naho Apostoly i Jesosy Kristy, hagnamafe ty finoa ty ndaty jinobon' Andrianagnahare naho ty fahafantaragne ty Tò ze magnarake ty toe-pagnahy arake an'Andrianagnahare, ² ama ty fahatokisagne ty fiaiganagne hatra amparae, nampitamaen'Andrianagnahare, i tsy mandagnitsey, tama ty fahagola. ³ Tama ty fotoagne voatondro, le naboae tama ty hafatse i tsara natokisa'e hambarako'oy. Nataoko zay arake ty lilin'Andrianagnahare Mpamonje antika' ay. ⁴ o ie Titosy, anake vata'e agnate ama ty finoagne hiombognantika. Fahasoavagne naho fiadanagne avy aman' Andrianagnahare ie Rae naho i Jesosy Kristy Mpagnavotse antika. ⁵ Naho zo sankagne zao ro nagnengako azo a Kreta agne, le ty mba hagnalignovako ze mbe tsy vita naho ty hanondro zoke ondaty isan-tanagne arake ze fa nandiliako azo. ⁶ Ty zoke ondaty le hanan-kakeo vatae, valy ty ampela raike, managnanake mino voampanga ho magnaram-po ama ty raty na marengerenge. ⁷ Mpaia ty mpiambegne, ama ty maha mpanompo ty asan' Andrianagnahare, ty tsy fanagnankakeo. Tsy tokoe ho mafe rehake na hieboebo, tsy lia naly, ara tsy ondaty tea vola. ⁸ Fa ie, toko'e hampiditse antragno reke, ragne ty fanjaka. Mahay tsy hanognonan-tegna, maregne, masigne, ara le mahamben-tegna. Tokoe mitagne mafe ty hafatseze ze fa ⁹ nampianare'e, mba hahaia'e mampikepake ty hafa ama fampianaragne soa naho hagnitsy iareo ze mandietse aze. ¹⁰ Fa lako ty ndaty mpitologne, loho tsie iareo voa savatse. Tsy misy haja'e ty reha iareo. Mandiso fagnantenagne naho mitarike ty ndaty agne ama ty lalan-tsie iareo. ¹¹ Paiagne ty manakagne iareo. Magnanatse ty tsy toko'e hagnanaragne iareo mba hahazoan-kareagne maloto ara le mandrava ty fianakaviagne manontolo. ¹² Nisy raika tama iareo, ze lahilahy tsy magnahy iareo zay, le nirehake te ie: " Ze Kretana le mandagnitse hatra amparae, raty ara le biby mandoza, maleme fo be feo." ¹³ Maregne ze rinehake zay, a naho izao anaro mafe iareo mba hatanjake ama ty finoagne. ¹⁴ Ko andream-betsevetse ze talily ty Jiosy naho iareo lily ondaty ze nisintake ty fahamarignagne. ¹⁵ Ho ei ze malio, le malio ze kila raha. Fa hoe iareo ze voaloto naho tsy mino ka, le tsy malio ndre ia ndre ia. Lehe ty saigne naho ty vetsevetse ro voaloto. ¹⁶ Miantoke ty fahianan' Andrianagnahare iareo, fe ie mandietse Aze ama ty asa'e. Heje'e handika ty lily iareo. Tsy mahavita asa soa na inogne na inogne.