¹ Ry rahalaheko, ko andesegne migege ty ndaty hafa ila'e ty finoantika i Tompontika Jesosy Kristy, ie Tompo ty volonahetse. ² Ampanahafo te hoe misy ndaty miditse amy ty fivoria areo ao manao peratse volamena naho akanjo soa, le misy lahilahy mahantra niditse tao avao ka manao akanjo maloto. ³ Naho magnete i ndaty manao akanjo soa'y rehe le hirehake te hoe: "Ajafady mitoboha amy ty toeragne soa toa," fa hirehake am'i lahilahy mahantra'y ka te hoe: "Mitsangana mberoa rehe!"Mipetraha an-tomboko eto" ⁴ avaho tsy mifampitsara ama'areo avao vao nareo? Avaho tsy lasa mpitsara amy ty eretseretse draty vao nareo? ⁵ Mitsanogna, ry rahalaheko mamiko, tsy fa jinibon'Andriagnahare vao ty tsy managne amy ze kila tane mba ho mpagnarivo amy ty finoagne naho ka ho mpandova amy ty fanjakagne nampitama'e iareo tea Aze. ⁶ Fa nareo nagnafake baraka ty mahantra! Avaho tsy ty mpagnarivo vao ty maha ore anareo? Avaho tsy iareo avao vao ty minday anareo am-pitsaragne ey? ⁷ Avaho tsy iareo avao vao ty nandraty ty agnara areo soa? ⁸ Ndra zay aza, naho magnatanterake ty lily ty mpanjaka nareo, arake ty Soratse Masigne hoe: "Teavo ty ragne'o ampanahafo ty vata'o," le manao ty soa rehe. ⁹ Fa naho magnomey ze zoto ty ndaty ila'e avao nareo, le behakeo, le hohelofegne manahake ty mandika lily. ¹⁰ Fa ndra ia ndra ia magnamaregne ze kila lily, faie lavo amy ty lalagne raike avao, le hohelofagne amy ze lily aby. ¹¹ Fa ze nirehake hoe: "Ao soa tsy hijangajanga," le nirehake ka hoe: "Ko mamono ndaty." Ndra ie tsy mijangajanga nareo fie mbe mamono ndaty, le lasa mpandika lily avao. ¹² Naho ty am'izay areke mirehafa naho ka manahake iareo ho tsaraegne amy ty lily ty fahafahagne. ¹³ Fa ty fitsaragne le hoavy tsy misy famin-dram-po amy ze tsy nampiboake famindra-po ka. Le o famindra-po io ka ty mandrese ty fitsaragne. ¹⁴ Inogne ro soa, ry rahalaheko, naho mirehake ty ndaty raike fa manam-pinoagne reke, faie tsy misy asa? Afake hagnavotse aze vao i finoa'e zay? ¹⁵ Ampanahafo te hoe misy rahalahy ndra rahavave raty ty akanjo'e tsy ampe hanegne lomogn'andro. ¹⁶ Le anovo te hoe misy raike ama'areo mirehake iareo te hoe: "Mandehana am-piadanagne, manoa mafana le mivontsigna soa." Naho tsy magnomey ty raha ila ty vata iareo nareo, inogne ro hahasoa izay? ¹⁷ Le manahake zay ka finoagneo, naho tsy misy asa, le mate. ¹⁸ Fa ie misy ndaty ka mirehake hoe: "Manam-pinoagne rehe, le raho managn'asa." Aboaho amako ty finoa'o tsy misy asa, le haboako ama'o ka ty finoako amy alala ty asako. ¹⁹ Rehe le matoky fa Andriagnahare raike avao, ie niazo'o zay. Fa ndra iareo kokolampogne aza mino izay, ka le mititititike avao iareo. ²⁰ Tea'areo hohay vao, ry rahalahy gege, fa ty finoagne tsy misy asa le tsy misy dika'e? [Fagnamarenagne: Ty ila ty dikan-drehake taloha le mamaky hoe: "Tea'areo hohay vao, ry rahalahy gege, hoe magnino ty finoagne tsy misy asa ro mate?"] ²¹ Tsy amy ty asa ka vao ro nagnamarenagne i Abrahama raentika naho fa nagnomey i Isaka ana-dahi'e amy alitara'y eo reke? ²² Trea'o fa ty finoagne niasa nindre amy ty asa'e, le nivoatse amy asa'y ka ty finoa'e. ²³ Le nilefe i Soratse Masigna manao te hoe: "Abrahama nino an'Andriagnanahare, le nivetsevetse tama'e fa fahamarinagne zay," le nitokavegne hoe sakezan'Andriagnahare reke. ²⁴ Trea'areo henanezay fa amy ty asa ro hagnamarenagne ty ndaty, fa tsy amy ty finoagne avao. ²⁵ Manahake zay ka, Rahaba ampela tsy vokatse tsy nihamarinegne amy ty asa ka vao reke, naho fa nandrae iareo irake sady nandefa iareo amy ty lalagne hafa? ²⁶ Fa mate o vatagneo naho misarake amy ty fagnahy, le manahake zay avao ka, ty finoagne tsy misy asa le mate.