¹ Fa iha koa, mivolana zay mifanaraky amy gny fampianara marina. ² Reo johary fa nahazo tao tsy maintsy mahay manday gny vatany, maonty, mahonon-tena, matanjaky amy finoa, amy fitiava, no sady amy fahareta. ³ Manahaky an'izay koa reo ampela fa nahazo tao, tokony hanoro avao gny tenany reo ho soa fandaisan-tena, fa tsy mpifosa. Tsy tokony ho andevozy gny divay mare reo. Tokony hampianatsy zay soa reo ⁴ mba hampianara reo ampela tanora ho tea mare gny valy sy gny gnanakiny manoka. ⁵ Tokony hampianatsy andreo hahonon-tena, halio, hikarakara tokantrano soa, sady hanenky gny valindreo. Tokony hanao agny raha iaby zay reo mba tsy ho voavola raty gny Safan-Dragnahary. ⁶ Manahaky zay, apatanjao reo johary mbo tanora mba hahonon-tena. ⁷ Amy fomba iaby atorò gny vatanao ho modely gny reo asa soa; ka lafa mampianatsy ia, mampiseho fahitia sy fahamendreha. ⁸ Mivolagna hafatsy salama sy tsy misy tsiny, mba ho megnatsy zay magnohitsy ndra ia ndra ia, fotony tsy mana ndra ino ndra ino raty ho volany mikasiky antsika i. ⁹ Reo mpagnompo tokony hanenky gny tompony amy raha iaby. Hanao gny sitrapony fa tsy hifamaly aminy. ¹⁰ Tsy tokony hangalangalatsy reo. Fa koa, tokony hanoro gny finoa soa iaby reo, mba hampamendriky gny fampianarantsika mikasiky an-Dragnahary Mpamonjy antsika amy lafy gny raha iaby. ¹¹ Fa niseho tamy gny olo iaby gny fahasovan-Dragnahary. ¹² Mampianatsy antsika tsy hanenky gny toetra tsy tian-Dragnahary sy gny fataon'izao tontolo zao. Mampianatsy antsika hiay am-pilamina, am-pahamarina, sady mifanaraky amy lilin-Dragnahary amy tao zao zay, ¹³ ampiambenantsika fatsatsy zay andrambesantsika gny fanantena mahafinaritsy, gny fisehoa gny vonignaitsy gny Ndragnaharintsika bevata sy Mpamonjy Jesosy Kristy. ¹⁴ Jesosy nagnome gny vatany ho antsika mba hanavotsy antsika hiala amy tsy fagnaran-dily iaby sy hanadiova, ho an'ny vatany, olo raiky manoka zay tena mazoto hanao asa soa. ¹⁵ Ambarao sady andeso apatanjàhy reo raha reo. Magnomeza fagnitsia amy fahefa iaby. Ka misy olo henga hanao anao ho tsy misy dikany.